Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jelemia 46:1-28

NUHE E BẸHẸN LẸ

  • Dọdai sọta Egipti (1-26)

    • Nẹbukadnẹzali na duto Egipti ji (13, 26)

  • Opagbe lẹ na Islaeli (27, 28)

46  Ohó he Jehovah dọna Jelemia yẹwhegán lọ gando akọta lẹ go die:+  Hlan Egipti,+ gando awhànpa Falo Neko+ ahọlu Egipti tọn go, yèdọ mẹhe to Tọ̀sisa Euflate pá bọ Ahọlu Nẹbukadnẹzali* Babilọni tọn gbawhàn etọn to Kalkemiṣi to owhe ẹnẹtọ gandudu Jehoiakimi+ visunnu Josia tọn he yin ahọlu Juda tọn mẹ:   “Mì wleawuna gaglo* po awọ̀yinu daho mìtọn lẹ po, Mì tọ́nyi nado funawhàn.   Mì osọ́nọ lẹ emi, mì wleawuna osọ́ lẹ bo hẹ yé ji. Mì to mìde bo ṣinyọ́n ogangbakun mìtọn lẹ. Mì gàn owhán lẹ bo blagbajana mìde.   ‘Naegbọn yẹn do mọ bọ ahun yetọn gbàdo? Yé to agọjoyigodo, yè ko gídí awhànfuntọ yetọn lẹ. Obu ko jẹ yé ji bọ yé họ̀n, awhànfuntọ yetọn lẹ ma lẹgodo. Obu ko jẹ mẹlẹpo ji,’ wẹ Jehovah dọ.   ‘Mẹhe yin awuyatọ lẹ ma sọgan họ̀n, podọ awhànfuntọ lẹ ma sọgan họ̀ngán. To agewaji, to Tọ̀sisa Euflate tó, Yé ko dahli bo jai.’+   Mẹnu wẹ ehe he hẹji ja taidi Tọ̀sisa Nile tọn, Taidi agbówhẹn osin tọn lẹ he to sisà?   Egipti hẹji taidi Tọ̀sisa Nile tọn,+ Taidi agbówhẹn osin tọn lẹ he to sisà, E sọ dọ dọ, ‘Yẹn na hẹji yì bo na ṣinyọ́n aigba ji. Yẹn na và tòdaho lọ po mẹhe nọ nọ̀ e mẹ lẹ po sudo.’   Mì osọ́ lẹ emi, mì hẹji yì! Mì osọ́-kẹkẹ lẹ emi, mì kùn kẹkẹ po huhlọn mìtọn lẹpo po! Dike awhànfuntọ lẹ ni dọnsẹpọ, Enẹ wẹ Kuṣinu po Putinu lẹ po, yèdọ mẹhe nọ hẹn awọ̀yinu lẹ,+ Podọ Ludinu lẹ,+ yèdọ mẹhe yin ogádetọ azọ́nyọnẹntọ lẹ.+ 10  “Oklunọ Nupojipetọ Jehovah awhànpa lẹ tọn tọn wẹ azán enẹ, yèdọ azán ahọsuyi tọn, nado yiahọsu to kẹntọ etọn lẹ go. Ohí lọ na và yé sudo bo na hẹn pekọ wá na ede bo nasọ gọ́ po ohùn yetọn po, na Oklunọ Nupojipetọ Jehovah awhànpa lẹ tọn tindo avọ́sinsan* de to aigba agewaji tọn ji sẹpọ Tọ̀sisa Euflate.+ 11  Hẹji yì Giliadi nado dín balsami,*+ Hiẹ viyọnnu alọji Egipti tọn E. Ovọ́ mẹ wẹ hiẹ ko dín amasin susu te, Na hiẹ ma na yin azọ̀nhẹngbọna.+ 12  Akọta lẹ ko sè dogbọn winyan towe dali,+ Avigbè towe ko sọ gbayipe gbọn aigba lọ ji. Na awhànfuntọ de dahli jẹ awetọ etọn ji, Yé omẹ awe lẹ sọ jai dopọ.” 13  Nuhe Jehovah dọna Jelemia yẹwhegán lọ gando wiwá Ahọlu Nẹbukadnẹzali* Babilọni tọn nado wá linú aigba Egipti tọn go die:+ 14  “Dọ ẹ to Egipti, lá ẹ to Migdoli.+ Lá ẹ to Nofi* podọ to Tahapanhẹsi.+ Dọna yé dọ, ‘Mì to mìde bo wleawudai, Na ohí de na và nulẹpo sudo lẹdo mì pé. 15  Naegbọn sunnu huhlọnnọ towe lẹ do yin zizasẹ? Yé ma gbọṣi otẹn yetọn mẹ, Na Jehovah ko sisẹ́ yé liai wutu. 16  Mẹsusu to yé mẹ to ahlida bo to aijẹ. Yé to didọna ode awetọ dọmọ: “Fọnṣite! Gbọ mí ni lẹkọyi omẹ mítọn lẹ dè podọ yì owhé mítọn lẹ gbè Na ohí didá mlanmlan lọ wutu.”’ 17  Yé ko lá to finẹ dọ, ‘Nùgoyitọ tata de poun wẹ Falo ahọlu Egipti tọn Yèdọ mẹhe ko dike bọ dotẹnmẹ hundote* lọ juwayi.’+ 18  ‘Dile yẹn togbẹ̀,’ wẹ Ahọlu lọ, yèdọ mẹhe nọ yin Jehovah awhànpa lẹ tọn dọ, ‘Ewọ* na wá taidi Taboli+ to osó lẹ ṣẹnṣẹn Podọ taidi Kalmẹli+ to huto. 19  Wleawuna agbàn towe nado yì kanlinmọgbenu, Hiẹ viyọnnu he nọ nọ̀ Egipti E. Na Nofi* na lẹzun nudobu de; Yè na dozò e* bọ mẹdepope ma nasọ nọ nọ̀ e mẹ.+ 20  Egipti taidi oyìn asiwhe he yọ́npọ́n de, Ṣigba, supọ̀ adínọ lẹ na wá sọta ẹ sọn agewaji. 21  Awhànfuntọ etọn he tlẹ yin hihaya to ṣẹnṣẹn etọn lẹ tin taidi oyìnvu he dojó lẹ, Ṣigba, yelọsu lẹ ko lẹgodo bo họnyi dopọ. Yé ma sọgan gbọṣi otẹn yetọn mẹ,+ Na azán nugbajẹmẹji tọn yetọn ko wá yé ji, Yèdọ ojlẹ lẹnjo tọn yetọn.’ 22  ‘Nudidọ etọn taidi odàn he to lìnlìn de tọn, Na yé yí asiọvi lẹ do dómọna ẹn po huhlọn po, Taidi sunnu he to atin sán liai lẹ.* 23  Yé na sán zungbo etọn liai,’ wẹ Jehovah dọ, ‘dile e tlẹ taidi nuhe mẹ yè ma sọgan biọ. Na yé sù hú owẹ̀n lẹ, yè ma sọgan hia yé. 24  Viyọnnu Egipti tọn na yin winyando. Ewọ na yin zizedo alọmẹ na omẹ agewaji tọn lẹ.’+ 25  “Jehovah awhànpa lẹ tọn, yèdọ Jiwheyẹwhe Islaeli tọn dọmọ: ‘Todin, yẹn na lẹ́ ayidonugo ṣie hlan Amọni+ sọn No,*+ hlan Falo, hlan Egipti, hlan yẹwhe etọn lẹ+ podọ hlan ahọlu etọn lẹ—mọwẹ, yèdọ hlan Falo po mẹhe dejido ewọ go lẹpo po.’+ 26  “‘Yẹn nasọ jo yé do alọmẹ na mẹhe to ogbẹ̀* yetọn dín lẹ, enẹ wẹ Ahọlu Nẹbukadnẹzali* Babilọni tọn+ po devizọnwatọ etọn lẹ po. Ṣigba to godo mẹ, gbẹtọ lẹ na nọ e mẹ taidi to ojlẹ hohowhenu tọn lẹ mẹ,’ wẹ Jehovah dọ.+ 27  ‘Na nuhe dù hiẹ, yèdọ Jakọbu devizọnwatọ ṣie, a dibu blo, Islaeli E, a dike ahun towe gbàdo blo.+ Na yẹn na whlẹn we sọn fidindẹn Podọ kúnkan* towe sọn aigba kanlinmọgbenu tọn etọn ji.+ Jakọbu na lẹkọ bo na nọ fẹẹmẹ bo ma nasọ yin tuklado, Bọ mẹde ma na nọ dobuna ẹn.+ 28  Enẹwutu, a dibu blo, yèdọ Jakọbu devizọnwatọ ṣie,’ wẹ Jehovah dọ, ‘na yẹn tin po hiẹ po. Yẹn na sukúndona akọta he mẹ yẹn vúnvún we pé gbọn lẹpo,+ Ṣigba, yẹn ma na sukúndona hiẹ.+ Yẹn na domẹplọnlọ gowe* jẹ obá he jẹ mẹ,+ Ṣigba, yẹn ma na nọma sayana we.’”

Nudọnamẹ Odò Tọn

To paa mẹ, “Nẹbukadlẹzali,” wunmẹ yinkọ lọ tọn devo.
Awọ̀yinu pẹvi he ogádetọ lẹ nọ saba hẹn.
Kavi “mẹhuhu.”
Pọ́n Zẹm.
To paa mẹ, “Nẹbukadlẹzali,” wunmẹ yinkọ lọ tọn devo.
Kavi “Mẹmfisi.”
To paa mẹ, “ojlẹ sisọ.”
Enẹ wẹ, Mẹhe na gbawhàn Egipti tọn.
Kavi “Mẹmfisi.”
Kavi vlavo, “na hẹn ẹn zun aigba gbọgbé de.”
Kavi “to nake bẹpli lẹ.”
Enẹ wẹ, Tebẹsi.
Kavi “alindọn.”
To paa mẹ, “Nẹbukadlẹzali,” wunmẹ yinkọ lọ tọn devo.
To paa mẹ, “okún.”
Kavi “wọhẹ we.”