Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Jelemia 20:1-18

NUHE E BẸHẸN LẸ

  • Paṣuli linú Jelemia (1-6)

  • Jelemia ma gán doalọtena yẹwhehodidọ (7-13)

    • Owẹ̀n Jiwheyẹwhe tọn taidi miyọ́n (9)

    • Jehovah taidi awhànfuntọ asuka (11)

  • Lewuwu Jelemia tọn (14-18)

20  Todin, Paṣuli yẹwhenọ lọ he yin visunnu Imẹli tọn, he sọ yin nukọntọ anadenanutọ lẹ tọn to ohọ̀ Jehovah tọn mẹ, to todoai to whenue Jelemia to dọdai onú ehelẹ tọn dọ.  To whenẹnu, Paṣuli linú Jelemia yẹwhegán lọ bo ze e do osópò+ he tin to Họngbo Aga tọn Bẹnjamini tọn kọ̀n lẹ mẹ, ehe tin to ohọ̀ Jehovah tọn mẹ.  Ṣigba, to aihọngbè, whenue Paṣuli tún Jelemia dote sọn osópò lẹ mẹ, Jelemia dọna ẹn dọmọ: “Jehovah ko ylọ oyín towe dọ Obu to Filẹpo, kakati nido yin Paṣuli.+  Na nuhe Jehovah dọ die, ‘Yẹn na hẹn we zun nudobu de hlan dewe po họntọn towe lẹpo po, yé nasọ jai gbọn ohí dali to alọ kẹntọ yetọn lẹ tọn mẹ to nukun towe mẹ;+ yẹn nasọ jo mẹhe nọ nọ̀ Juda lẹpo do alọ ahọlu Babilọni tọn mẹ, ewọ nasọ bẹ yé yì kanlinmọgbenu to Babilọni bo na yí ohí do hù yé.+  Yẹn nasọ jo adọkun tòdaho ehe tọn lẹpo, nutindo etọn lẹpo, nuhọakuẹ etọn lẹpo po adọkunnu ahọlu Juda tọn lẹ tọn lẹpo po do alọmẹ na kẹntọ yetọn lẹ.+ Podọ yé na hò yé yí bo na bẹ yé taidi ogblànnu de yì Babilọni.+  Podọ hiẹ Paṣuli po mẹhe nọ nọ̀ owhé towe gbè lẹpo po, mì na yì kanlinmọgbenu. Mì na yì Babilọni bo nasọ kú do finẹ, hiẹ po họntọn towe lẹpo po nasọ yin dìdì do finẹ, na hiẹ ko dọ dọdai lalo tọn lẹ na yé wutu.’”+   Jehovah E, hiẹ ko blẹ mi, bọ yẹn ko sọ yin biblẹ. Hiẹ ko yí huhlọn towe zan sọta mi, bosọ duto e ji.+ Yẹn ko lẹzun aṣagbọ́nu de to azán lẹpo ji; Mẹlẹpo wẹ nọ ṣàn mi kò.+   Whedepopenu he yẹn na kẹnù, yẹn dona dawhá bo lá dọ, “Danuwiwa po vasudo po!” Na ohó Jehovah tọn wẹ zọ́n bọ yè nọ to zunzun mi bo nọ to ṣinṣàn mi kò to azán lẹpo ji.+   Enẹwutu, yẹn dọmọ: “Yẹn ma nasọ dọho gando ewọ go ba, Yẹn ma nasọ dọho to oyín etọn mẹ ba.”+ Ṣigba, ohó etọn taidi miyọ́n de he to jiji to ahun ṣie mẹ bosọ yin ginglọndo ohú ṣie lẹ mẹ, Agbọ́ ko pé mi nado hẹn ẹn do homẹ; Yẹn ma sọgan gbọṣi abọẹ ba.+ 10  Na yẹn ko sè nuhlundọ ylankan susu; Obu sọ lẹdo mi pé.+ “De e gbà; dike míwlẹ ni de ewọ gbà!” Mẹhe to odẹ̀ jijọho tọn hò na mi lẹpo wẹ nọ to aijijẹ ṣie din:+ “Vlavo ewọ na gbọn nulú dali ṣì nude wà, Míwlẹ nasọ duto e ji bo víhlọ̀n to ewọ go.” 11  Ṣigba, Jehovah tin hẹ mi taidi awhànfuntọ asuka de.+ Enẹwutu wẹ mẹhe to homẹkẹndo mi lẹ na dahli bo ma na duto e ji.+ Yé na mọ winyan tlala, na yé ma na tindo kọdetọn dagbe. Winyan yetọn na gbọṣi aimẹ kakadoi.+ 12  Ṣigba, Jehovah awhànpa lẹ tọn E, hiẹ to dodonọ gbeje pọ́n; Hiẹ nọ mọ linlẹn he whlá lẹ* po ahun po.+ Dike yẹn ni mọ ahọsuyi towe do yé ji,+ Na yẹn ko ze owhẹ̀ ṣie do alọ towe mẹ.+ 13  Mì jihàn hlan Jehovah! Mì pagigona Jehovah! Na ewọ ko whlẹn wamọnọ* sọn alọ ylanwatọ lẹ tọn mẹ. 14  Dẹ̀hodo wẹ azán he gbè yẹn yin jiji te! Na azán he gbè onọ̀ ṣie ji mi te ni ma yin didona blo!+ 15  Mẹhodẹ̀do wẹ dawe lọ he hẹn owẹ̀n dagbe wá na otọ́ ṣie dọmọ: “Ovi de ko yin jiji na we, yèdọ visunnu de!” Bo hẹn ẹn jaya tlala. 16  Na dawe enẹ ni tin taidi tòdaho he Jehovah họliai bọ e ma vẹna ẹn lẹ. Na ewọ ni sè awhágbe de to afọnnu podọ ogbè opẹ̀n tọn to owhè ṣádada mẹ. 17  Naegbọn ewọ ma do hù mi to ohò onọ̀ ṣie tọn mẹ, Na onọ̀ ṣie nido yin yọdò ṣie Bọ ewọ nasọ tin to ohò to whepoponu?+ 18  Naegbọn yẹn do tọ́njẹgbonu sọn adọ̀mẹ Nado mọ tukla po awubla po, Nado hẹn azán ṣie lẹ wá opodo to winyan mẹ?+

Nudọnamẹ Odò Tọn

Kavi “numọtolanmẹ sisosiso lẹ.” To paa mẹ, “ayi lẹ.”
Kavi “alindọn wamọnọ tọn.”