Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 8:1-22

NUHE E BẸHẸN LẸ

  • Mẹgbeyinyan Asilia tọn he ja (1-8)

    • Mahẹl-ṣalal-haṣ-baz (1-4)

  • “Jiwheyẹwhe tin hẹ mí!” (9-17)

  • Isaia po ovi etọn lẹ po taidi ohia lẹ (18)

  • Mì lẹhlan osẹ́n, e ma yin aovi lẹ (19-22)

8  Jehovah dọna mi dọmọ: “Yí wekan-whlẹ daho+ de bo yí wekantin paa de* do kàn ‘Mahẹl-ṣalal-haṣ-baz’* do e ji.  Podọ gbọ kunnudetọ nugbonọ lẹ, yèdọ Ulia+ yẹwhenọ lọ po Zekalia visunnu Jebelekia tọn po ni basi kandai nado dekunnu etọn na mi.”  Enẹgodo, yẹn tindo kọndopọ zanhẹmẹ tọn hẹ* yẹwhegán-yọnnu lọ* bọ ewọ mọhò bo wá ji visunnu de.+ Whenẹnu, Jehovah dọna mi dọmọ: “Ylọ oyín etọn dọ Mahẹl-ṣalal-haṣ-baz,  na whẹpo visunnu lọ nado yọ́n ‘Otọ́ ṣie!’ po ‘Onọ̀ ṣie!’ po dọ, nutindo Damasku tọn lẹ po ogblànnu Samalia tọn po na ko yin bibẹ sọyi ahọlu Asilia tọn nukọn.”+  Jehovah sọ dọna mi dọmọ:   “Na akọta ehe ko gbẹ́ osin Ṣiloa* tọn he to sisà dẹẹdẹ lẹ dai+ Bo to ayajẹ do Lezini po visunnu Lemalia tọn po ji wutu,+   Enẹwutu, pọ́n! Jehovah na hẹn Osin Tọ̀sisa* lọ tọn he to zingidi ji bo sù taun lẹ wá yé ji, Yèdọ ahọlu Asilia tọn+ po gigo etọn lẹpo po. Ewọ na wá bo gọ́ otọ̀-zànmẹ etọn lẹpo Bosọ hẹn tọ̀tó etọn lẹpo gọfla   Bo nasọ sà gbọn Juda wayi. Ewọ na taidi singigọ de bo na gbọn finẹ wayi bo nasọ wá aga jẹ okọ̀;+ Awà kikẹ̀ etọn lẹ na dlẹnkan pé aigba towe ji, Emmanuẹli* E!”+   Mì gbẹtọ lẹ emi, mì gbleawunamẹ, ṣigba mì na yin gbigbà hányán. Mì dotoai, mì mẹhe wá sọn awà aigba tọn he dẹn lẹ ji lẹpo emi! Mì wleawudaina awhàn,* ṣigba mì na yin gbigbà hányán!+ Mì wleawudaina awhàn, ṣigba mì na yin gbigbà hányán! 10  Mì kàn ayiha wintinwintin de, ṣigba e na yin hinhẹngble! Mì dọ nuhe jlo mì, ṣigba e ma na tindo kọdetọn dagbe, Na Jiwheyẹwhe tin hẹ mí!*+ 11  Nuhe Jehovah dọna mi die, dile ewọ ze alọ huhlọnnọ etọn do ji e nado na mi avase ma nado hodo nuyiwa akọta ehe tọn dọmọ: 12  “Mì ylọ nuhe akọta ehe nọ ylọdọ sébibla dọ sébibla blo! Mì dibuna nuhe yewlẹ nọ dibuna blo; Mì sọ sisọ na enẹ wutu blo. 13  Jehovah awhànpa lẹ tọn—ewọ wẹ Mẹhe mìwlẹ dona nọ pọnhlan di wiwe,+ Ewọ wẹ Mẹlọ he mì dona nọ dibusi, Podọ ewọ wẹ Mẹlọ he dona nọ hẹn mì sisọ.”+ 14  Ewọ na wá taidi fiwiwe de, Ṣigba, taidi zannu he nọ hẹnmẹ klẹnafọ de Podọ taidi osé he nọ hẹnmẹ dahli de+ Na whédo Islaeli tọn awe lẹ, Podọ taidi fẹ́ṣà de po omọ̀ de po Na mẹhe nọ nọ̀ Jelusalẹm lẹ. 15  Susu to yé mẹ na dahli bo jai bo na gbleawu; Omọ̀ na yin dido na yé bọ yé na yin wiwle. 16  Há kandai kunnudenu tọn lọ; Bo yí hiadonu do tlẹ́ osẹ́n* lọ to devi ṣie lẹ ṣẹnṣẹn! 17  Yẹn na to nukundo Jehovah zọnmii,*+ mẹhe to nukunmẹ etọn whlá do whédo Jakọbu tọn,+ podọ yẹn na ze todido ṣie do ewọ mẹ. 18  Mì pọ́n! Yẹn po ovi he Jehovah ko na mi lẹ po+ taidi ohia+ lẹ po azọ́njiawu lẹ po to Islaeli sọn Jehovah awhànpa lẹ tọn dè, yèdọ mẹhe nọ nọ̀ Osó Ziọni ji. 19  Podọ eyin yé dọna mì dọ: “Mì dindona to afinyọnnọ lẹ dè kavi dọṣẹdọtọ he nọ to nuwladọ bosọ nọ to hùnhlún lẹ dè,” be e ma yin Jiwheyẹwhe akọta de tọn dè wẹ akọta lọ dona nọ dindonanu te ya? Be yé dona nọ dindonanu sọn oṣiọ lẹ dè do mẹhe togbẹ̀ lẹ tamẹ wẹ?+ 20  Kakatimọ, osẹ́n lọ po kandai kunnudenu tọn lọ po mẹ wẹ yé dona nọ dindonanu sọn! Eyin yé ma dọho to kọndopọ mẹ hẹ ohó ehe, yé ma na tindo hinhọ́n.*+ 21  Humọ, mẹdopodopo na jugbọn aigba lọ ji wayi to oyà po huvẹ po mẹ;+ podọ na huvẹ to mẹlọ hù bọ homẹ to gbigble e wutu, e na hodẹ̀do ahọlu etọn po Jiwheyẹwhe etọn po dile e pọ́n aga hlan. 22  Enẹgodo, e na pọ́n aigba ji bo ma na mọ nudevo hú ayimajai po zinvlu po, zinvlu titli po ojlẹ awusinyẹn tọn po, podọ zinvlu gọ́ngọ́n matin hinhọ́n.

Nudọnamẹ Odò Tọn

To paa mẹ, “wekantin gbẹtọ tata de tọn.”
Vlavo zẹẹmẹdo “Awuyiya Nado Jẹ Ogblànnu lọ Kọ̀n.”
To paa mẹ, “yẹn sẹpọ.”
Enẹ wẹ, asi Isaia tọn.
Ṣiloa yin osinwhín de.
Enẹ wẹ, Euflate.
Pọ́n Isa 7:14.
Kavi “Mì blagbajana mìde.”
Hogbe Heblugbe tọn he yin lilẹdogbedevomẹ dọ “Jiwheyẹwhe tin hẹ mí” wẹ Emmanuli. Pọ́n Isa 7:14; 8:8.
Kavi “anademẹ.”
Kavi “to tenọpọn Jehovah po jejejininọ po.”
To paa mẹ, “wunkinkẹn.”