Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 7:1-25

NUHE E BẸHẸN LẸ

  • Owẹ̀n de hlan Ahọlu Ahazi (1-9)

    • Ṣeal-jaṣubi (3)

  • Ohia Emmanuẹli tọn (10-17)

  • Kọdetọn nugbonọ-mayin tọn lẹ (18-25)

7  Todin, to azán Ahazi+ ahọlu Juda tọn, yèdọ visunnu Jotami he yin visunnu Uzia tọn tọn lẹ gbè, Ahọlu Lezini Silia tọn po Peka+ visunnu Lemalia ahọlu Islaeli tọn po hẹji wá nado tọ́nawhàn Jelusalẹm, ṣigba yé ma penugo nado yí i.+  Linlin de sọ yin nina owhé Davidi tọn dọmọ: “Silia ko kọ̀n awhànpa etọn dopọ po Eflaimi po.” Ahun Ahazi tọn po ahun omẹ etọn lẹ tọn po sọ jẹ hihò ji, kẹdẹdi atin zungbo mẹ tọn lẹ he jẹhọn to húnhúnhún.  To whenẹnu, Jehovah dọna Isaia dọmọ: “Jaale bo tọ́njẹgbonu, yèdọ hiẹ po visunnu towe Ṣeal-jaṣubi*+ po, bo yì pé Ahazi to fie osinwhín osindò agawaji tọn lọ tọn nọte do,+ sẹpọ alihogbó he yì ogle dawe avọ̀yantọ lọ tọn mẹ.  Hiẹ dona dọna ẹn dọmọ, ‘Payi dewe go bo ma hanú blo. A dibu kavi dike ahun towe gbàdo na nake flinflin awe he miyọ́n dupò he to azọ̀ti ehelẹ wutu blo, yèdọ na adi sinsinyẹn Lezini, Silia po visunnu Lemalia+ tọn po wutu.  Na Silia, to kọndopọ mẹ hẹ Eflaimi po visunnu Lemalia tọn po ko blasé do gowe dọmọ:  “Mì gbọ mí ni hẹji yì hoavùn hẹ Juda bo tlẹ́n ẹn* bosọ yí i* na míde, podọ mì gbọ mí ni de visunnu Tabeẹli tọn taidi ahọlu do e ji.”+  “‘Nuhe Oklunọ Nupojipetọ Jehovah dọ die: “E ma na tindo kọdetọn dagbe, Mọ e ma to na jọ.   Na Damasku wẹ ota Silia tọn, Podọ Lezini wẹ ota Damasku tọn. To owhe 65 poun gblamẹ, Eflaimi na yin gbigbà hányán mlẹnmlẹn bo ma nasọ yin akọta de ba.+   Samalia+ wẹ ota Eflaimi tọn, Podọ visunnu Lemalia tọn wẹ ota Samalia tọn.+ Eyin mì ma tindo yise he dolido, Mì ma na hẹnai gligli.”’” 10  Jehovah zindonukọn nado dọhona Ahazi dọmọ: 11  “Biọ ohia de Jehovah Jiwheyẹwhe towe;+ e sọgan siso di Yọdò* kavi yiaga di agahomẹ.” 12  Ṣigba, Ahazi dọmọ: “Yẹn ma na biọ nude, mọ yẹn ma na tẹ́n Jehovah pọ́n.” 13  To whenẹnu, Isaia dọmọ: “Mì dotoai, mì owhé Davidi tọn emi. Be homẹfa gbẹtọ tọn whiwhlepọn ma ko pé mì wẹ? Be mìwlẹ sọ dona whlé homẹfa Jiwheyẹwhe tọn pọ́n wẹ ya?+ 14  Enẹwutu wẹ Jehovah lọsu na na mì ohia de: Mì pọ́n! Yọnnu jọja* lọ na mọhò bo na ji visunnu de,+ bọ e na ylọ oyín etọn dọ Emmanuẹli.*+ 15  Ewọ na nọ dù limu anọ́sin tọn po owín po to whenue ewọ na yọ́n lehe yè nọ gbẹ́ oylan dai bo nọ yí dagbe do. 16  Na whẹpo visunnu lọ nado yọ́n lehe yè nọ gbẹ́ oylan dai bo nọ yí dagbe do, aigba ahọlu awe he hiẹ to budina lọ lẹ tọn na ko jẹvọ́ petepete.+ 17  Jehovah na hẹn ojlẹ awusinyẹn tọn de wá hiẹ po omẹ towe lẹ po ji gọna owhé otọ́ towe tọn, yèdọ ojlẹ he nkọ ma ko tin sọn azán he gbè Eflaimi ko klan sọn Juda go,+ na Ewọ na do ahọlu Asilia tọn hlan.+ 18  “To azán enẹ gbè, Jehovah na kúnwhé hlan supọ̀ he to asisa Nile Egipti tọn lẹ kọ̀n to fidindẹn lẹ, podọ hlan owín he to aigba Asilia tọn ji lẹ, 19  yemẹpo nasọ wá bo na sawhé do agbàdo* he to dòdòmẹ lẹ mẹ, do osé-slo lẹ mẹ, do wùnkan lẹpo mẹ, podọ do fie osin sù te lẹpo. 20  “To azán enẹ gbè, gbọn dàlunhi he yin hihaya sọn lẹdo Tọ̀sisa* lọ tọn mẹ de gblamẹ, yèdọ gbọn ahọlu Asilia tọn gblamẹ,+ Jehovah na whlẹ́ ota na ẹn gọna ofún he to afọ na ẹn lẹ bo nasọ whlẹ́ ogbì etọn lẹ lọsu sẹ̀. 21  “To azán enẹ gbè, gbẹtọ na nọ pò oyìnsi winyanwinyan de dai sọn kanlinpa lọ mẹ po lẹngbọ awe po. 22  Podọ na anọ́sin susugege na tin wutu, ewọ na nọ dù limu anọ́sin tọn, na mẹhe pò to aigba lọ ji lẹpo na nọ dù limu anọ́sin tọn po owín po. 23  “To azán enẹ gbè, fidepope he vẹntin 1 000 tin te dai bọ e nọ họ̀ fataka-kuẹ 1 000, wùnkan lẹ po ogbé ylankan lẹ po kẹdẹ wẹ na tin to finẹ. 24  Ogá po ogába po wẹ gbẹtọ lẹ na nọ hẹn yì finẹ, na aigba lọ blebu wẹ na gọ́ na wùnkan lẹ po ogbé ylankan lẹ po wutu. 25  Podọ hiẹ ma na sẹpọ osó depope he yè ko nọ yí alín do whà e ji dai, na hiẹ na dibuna wùnkan po ogbé ylankan lẹ po wutu; yé na lẹzun nọtẹn he oyìnsú lẹ nọ dùnú te podọ aigba he ji lẹngbọ lẹ nọ gbọn.”

Nudọnamẹ Odò Tọn

Zẹẹmẹdo “Pipotọ de Poun Wẹ Na Lẹkọwa.”
Kavi vlavo, “bianukunna ẹn.”
Kavi “zẹ̀ adó etọn lẹ.” To paa mẹ, “kẹ̀ ẹ.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “Awhli.”
Zẹẹmẹdo “Jiwheyẹwhe Tin hẹ Mí.”
Kavi “agbàdo tọ̀sisa tọn.” Pọ́n Zẹm.
Enẹ wẹ, Euflate.