Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 58:1-14

NUHE E BẸHẸN LẸ

  • Nùbibla nugbo po lalo po (1-12)

  • Awuvivi to Gbọjẹzan yìnyìn mẹ (13, 14)

58  “Yí vẹ́go-kàn towe lẹpo do dawhá; a doalọte blo! Ze ogbè towe daga taidi kúnkún azò de tọn. Lá atẹṣiṣi omẹ ṣie lẹ tọn na yé,+ Podọ ylando owhé Jakọbu tọn lẹ na yé.   Egbesọegbesọ wẹ yé nọ dín mi, Bosọ nọ do ojlo hia nado yọ́n aliho ṣie lẹ, Taidi dọ akọta de wẹ yé yin he nọ wà dodo Bo ma ko gbẹ́ whẹdida dodo Jiwheyẹwhe yetọn tọn dai nkọ.+ Yé nọ to whẹdida dodo lẹ biọ mi, Bo nọ to ojlo dohia nado dọnsẹpọ Jiwheyẹwhe,+   Bosọ nọ to kinkanse dọmọ: ‘Naegbọn hiẹ ma mọ whenue míwlẹ to nùbla?+ Podọ naegbọn hiẹ ma doayi e go to whenue mí to yasana míde?’*+ Na to azán he gbè mìwlẹ to nùbla, ale* mìtọn titi lẹ wẹ mì nọ to afọdona, Bosọ nọ to kọgbidina pakanọ mìtọn lẹ.+   Jlẹdidọ po avùnhiho po wẹ mì nọ yí do fó nùbibla mìtọn, Bosọ nọ yí kanyinylan do to akotokún yìn. Mì ma gán to nùbla dile mì to bibasi do to egbehe bo na hẹn ogbè mìtọn nado yin sisè to olọn mẹ gba.   Be nùbibla he nkọ yẹn jlo lọ die, Yèdọ azán de he gbè mẹde nọ sayana ede,* Bo nọ dẹ́ ota etọn do odò taidi owóko de, Bosọ nọ yí odẹ́vọ̀ po afín lẹ po do basi adọzan etọn ya? Be nuhe mì to yiylọdọ nùbibla podọ azán de he na hẹn homẹhun Jehovah niyẹn ya?   Paali, nùbibla he yẹn jlo lọ die: Nado de afọgàn kanyinylan tọn lẹ sẹ̀, Nado tún okàn opò zẹgẹ tọn lẹ sẹ̀,+ Nado tún mẹhe yè to kọgbidina lẹ dote,+ Bo wẹ́n opò zẹgẹ tọn lẹpo do awe;   Podọ nado má núdùdù towe hẹ mẹhe huvẹ to hùhù,+ Nado hẹn wamọnọ podọ mẹhe ma tindo owhé lẹ wá owhé towe gbè, Nado na avọ̀ mẹdepope he a mọ bọ e to omẹ́,+ Podọ ma nado lilẹ́ godo towe do hatọ towe.   Whenẹnu wẹ hinhọ́n towe na họnwun di wunkinkẹn,+ Bọ azọ̀nhẹngbọ towe na tọ́nkun po awuyiya po. Dodowiwa towe na tin to nukọn towe, Bọ gigo Jehovah tọn na yin hihọ́tọ towe to godo.+   To whenẹnu, hiẹ na ylọ bọ Jehovah na siọ we; Hiẹ na dawhá na alọgọ bọ ewọ na dọmọ, ‘Yẹn die!’ Eyin hiẹ de opò zẹgẹ tọn lọ sẹ̀ sọn ṣẹnṣẹn towe Bo doalọtena alọvi towe dindlẹn po ohó mẹhẹngble tọn didọ po,+ 10  Eyin hiẹ nọ ze nuhe hiẹ lọsu* yiwanna jo na mẹhe huvẹ to hùhù+ Bo nọ hẹn pekọ wá na mẹhe* yè to yasana lẹ, To whenẹnu, hinhọ́n towe na nọ họnwun etlẹ yin to zinvlu mẹ, Bọ zinvlu gọ́ngọ́n towe na nọ taidi owhè ṣádada.+ 11  Jehovah na nọ deanana we to whepoponu Bo na nọ hẹn pekọ wá na we* etlẹ yin to aigba-klo de ji;+ Ewọ na hẹn ohú towe lẹ sinyẹn, Bọ hiẹ na wá taidi jipa he yè húsinna ganji de,+ Yèdọ taidi asisa de he osin etọn ma nọ vọ̀ gbede. 12  Na hiẹ tọn wutu, yé na vọ́ gbakija hohowhenu tọn lẹ gbá,+ Hiẹ nasọ vọ́ dodonu whẹndo he ko wayi lẹ tọn lẹ doai.+ Hiẹ na nọ yin yiylọdọ mẹhe nọ vọ́ adó gbigbà* lẹ jlado,+ Podọ mẹhe nọ vọ́ alihogbó fininọ lẹ tọn lẹ jlado. 13  Eyin hiẹ dapana* afọdidona ale* towe titi lẹ to azán wiwe ṣie gbè, na Gbọjẹzan wutu+ Bọ hiẹ ylọ Gbọjẹzan lọ dọ awuvivinu daho de, azán wiwe de na Jehovah, yèdọ azán he dona yin gigopana de,+ Bọ hiẹ nọ pagigona ẹn kakati nado nọ doafọna ale towe titi lẹ po ohó fúsa lẹ didọ po, 14  To whenẹnu, hiẹ na nọ mọ awuvivi susu to Jehovah mẹ, Bọ yẹn na nọ hẹn we nado hẹ ofi yiaga aigba tọn lẹ  ji.+ Yẹn na hẹn we nado nọ dù sọn* ogú Jakọbu tọgbo towe tọn mẹ,+ Na onù Jehovah tọn wẹ dọ ẹ.”

Nudọnamẹ Odò Tọn

Kavi “alindọn mítọn?”
Kavi “awuvivi.”
Kavi “alindọn ede tọn.”
Kavi “alindọn towe.”
Kavi “alindọn he.”
Kavi “alindọn towe.”
To paa mẹ, “fihe zẹ̀.”
To paa mẹ, “lilẹ́ afọ towe do godo sọn.”
Kavi “awuvivi.”
Kavi “nado nọ duvivi.”