Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 5:1-30

NUHE E BẸHẸN LẸ

  • Ohàn gando vẹngle Jehovah tọn go (1-7)

  • Dindọn lẹ na vẹngle Jehovah tọn (8-24)

  • Homẹgble Jiwheyẹwhe tọn sọta omẹ etọn lẹ (25-30)

5  Jaale, gbọ ma jihàn na mẹyiwanna ṣie Yèdọ ohàn de gando mẹyiwanna ṣie po vẹngle etọn po go.+ Mẹyiwanna ṣie tindo vẹngle de to okọ́ta he nọ de sinsẹ́n tọ́n de ji.   E jlo aigba lọ bo ṣinyan zannu lẹ sọn e mẹ. E do vẹntin vẹẹ dagbedagbe do e mẹ, Bo gbá atọ̀họ̀ de do ṣẹnṣẹn etọn, Bosọ kùn ovẹn-finyọ́ndo de do e mẹ.+ Enẹgodo, e to nukundo dọ e na de ovẹn sinsẹ́n dagbe lẹ tọ́n, Ṣigba, ovẹn sinsẹ́n ylankan lẹ kẹdẹ wẹ e detọ́n.+   “Enẹwutu todin, mì mẹhe nọ nọ̀ Jelusalẹm lẹ po mì omẹ Juda tọn lẹ po emi, Mì jaale bo dawhẹ to yẹn po vẹngle ṣie po ṣẹnṣẹn.+   Etẹwẹ pò bọ yẹn dona ko wà na vẹngle ṣie Bọ yẹn ma ko wà?+ Naegbọn bọ to whenue yẹn to nukundo ovẹn sinsẹ́n dagbe lẹ, Ovẹn sinsẹ́n ylankan lẹ kẹdẹ wẹ e detọ́n?   Todin, mì jaale bo dike ma dọ Nuhe n’na wà na vẹngle ṣie na mì: Yẹn na de pákàn etọn sẹ̀, Bọ e na yin mimẹ̀ petepete.+ Yẹn na họ́ adó zannu tọn etọn liai, Bọ e na yin afọtùn e ji.   Yẹn na hẹn ẹn zun aigba gbọgbé;+ Yè ma na de alà na ẹn, mọ yè ma na yí alín do pọ̀ e mẹ. Wùnkan lẹ po ogbé ylankan lẹ po wẹ na wú gọ́ e mẹ,+ Yẹn nasọ degbena aslọ lẹ ma nado ja jikun depope do e mẹ.+   Na vẹngle Jehovah awhànpa lẹ tọn lọ wẹ whédo Islaeli tọn;+ Vẹngle he ewọ yiwanna lọ wẹ omẹ Juda tọn lẹ. E nọ to nukundo whẹdida dodo,+ Ṣigba, pọ́n! whẹdida mawadodo kẹdẹ wẹ e nọ mọ; E nọ to nukundo dodowiwa, Ṣigba, pọ́n! awhágbe ayimajai tọn kẹdẹ sè wẹ e nọ te.”+   Dindọn wẹ na mẹhe nọ hẹn ohọ̀ de gblo jẹ devo kọ̀n+ Podọ mẹhe nọ yí ogle de dogọ devo lẹ+ Kaka otẹn de ma nọ tin ba Bọ mìwlẹ kẹdẹ wẹ nọ wá to aigba lọ ji!   Jehovah awhànpa lẹ tọn ko whlé do otó ṣie lẹ mẹ Dọ ohọ̀ susu lẹ, mahopọnna dọ yé klo bo yọnwhanpẹ, Yé na lẹzun nudobu de, He mẹ mẹdepope ma na nọ.+ 10  Na vẹngle jijlẹ ao* na nọ de ojlẹnu bati* tọn dopo poun tọ́n, Podọ okún ojlẹnu homẹli* dopo tọn na nọ de ojlẹnu efa* tọn dopo poun tọ́n.+ 11  Dindọn wẹ na mẹhe nọ fọ́n to afọnnu fuu nado nù ahàn sinsinyẹn lẹ,+ Mẹhe nọ dọngbàn to e kọ̀n jẹ whèjai pete kakajẹ whenue ovẹn nọ mú yé! 12  Yé nọ tindo ajalẹn po hànjinu okànnọ po, Gọna ohún, ován po ovẹn po to hùnwhẹ yetọn lẹ tẹnmẹ; Ṣigba, yé ma nọ lẹnnupọndo azọ́n Jehovah tọn ji, Yé masọ nọ mọ azọ́n alọ etọn lẹ tọn. 13  Enẹwutu, omẹ ṣie lẹ na yì kanlinmọgbenu, Na yé ma tindo oyọnẹn wutu;+ Huvẹ na hù sunnu gigonọ yetọn lẹ,+ Bọ nugbla sinsinyẹn nasọ hù omẹ yetọn lẹpo. 14  Enẹwutu, Yọdò* ko hẹn ede* gblodeji Bo ko sọ kẹ̀ onù etọn pete matin dogbó;+ Podọ whanpẹ daho etọn,* gbẹtọgun etọn he nọ to awhádo lẹ po paṣadutọ etọn lẹ po Na jẹte yì e mẹ dandan. 15  Gbẹtọ nasọ dẹ́ do odò, Gbẹtọ na yin hinhẹnwa odò, Bọ nukun saklanọ tọn lẹ na yin hinhẹnwa odò. 16  Jehovah awhànpa lẹ tọn na yin zizedaga gbọn whẹdida* etọn dali; Jiwheyẹwhe nugbo, yèdọ Omẹ Wiwe lọ,+ na klan ede do wiwe gbọn dodowiwa dali.+ 17  Podọ lẹngbọvu lẹ na nọ dù amà taidi to kanlindugbo yetọn mẹ; Mẹhe to jonọ-gbéji lẹ na nọ dùnú to fijẹvọ lẹ fie kanlin he dùnú gọ́ho lẹ nọ nọ̀ dai. 18  Dindọn wẹ na mẹhe nọ yí okàn oklọ tọn lẹ do to whẹhuhu yetọn dọ̀n pé lẹ Bo nọ yí okàn agbàn-kẹkẹ tọn lẹ do to ylando yetọn dọ̀n pé; 19  Yé mẹhe nọ dọmọ: “Gbọ Ewọ ni hẹn azọ́n etọn yá; Gbọ ni yawu wá na mí nido mọ ẹn. Gbọ lẹndai* Omẹ Wiwe Islaeli tọn ni yin hinhẹndi Na mí nido yọ́n ẹn!”+ 20  Dindọn wẹ na mẹhe nọ ylọ dagbe dọ oylan podọ oylan dọ dagbe lẹ,+ Mẹhe nọ yí zinvlu do diọtẹnna hinhọ́n podọ hinhọ́n do diọtẹnna zinvlu lẹ, Mẹhe nọ yí vivẹ́ do vivi tẹnmẹ podọ vivi do vivẹ́ tẹnmẹ lẹ! 21  Dindọn wẹ na mẹhe yọnnuin to nukun yede tọn mẹ Bosọ yin nuyọnẹntọ to nukun yede tọn mẹ lẹ!+ 22  Dindọn wẹ na mẹhe sinyẹn to ovẹn nùnù mẹ lẹ Podọ mẹhe yin ogán to ahàn sinsinyẹn fuflusọ mẹ lẹ,+ 23  Mẹhe nọ suwhẹna mẹylankan na alọgodo-kuẹ wutu lẹ+ Podọ mẹhe nọ tẹ̀ whẹdida dodo dodonọ lẹ!+ 24  Enẹwutu, kẹdẹdile miyọ́n he to jiji nọ fiọ getin Bọ ogbé húhú nọ fiọ to miyọ́n mẹ do, Mọ wẹ adọ̀ yetọn lẹ na yọ̀n, Bọ osẹ́ yetọn lẹ na vúnvún pé di afínfín do, Na yé gbẹ́ osẹ́n* Jehovah awhànpa lẹ tọn dai Bosọ yí nukunpẹvi do pọ́n ohó Omẹ Wiwe Islaeli tọn lọ tọn wutu.+ 25  Enẹwutu wẹ Jehovah gblehomẹ do omẹ etọn lẹ go sinsinyẹn, Ewọ nasọ dlẹnalọ etọn jẹgbonu bo na sayana yé.+ Osó lẹ na whàn, Oṣiọ yetọn lẹ nasọ taidi ogbó to tòhomẹ-liho lẹ ji.+ Po ehe lẹpo po, homẹgble etọn ma ko doalọte, Ṣigba, alọ etọn gbẹ́ pò to dindlẹn nado sayana yé. 26  Ewọ ko ze ohia* de daga hlan akọta he to fidindẹn de;+ E ko kúnwhé hlan yé nado wá sọn opodo aigba tọn lẹ;+ Podọ pọ́n! yé ja po awuyiya daho po.+ 27  Onú ma ṣikọna depope to yé mẹ, mọ depope to yé mẹ masọ dahli. Mẹdepope masọ samlọngọ kavi damlọn. Gbànnú he to alìn na yé ma tún, Mọjanwẹ afọpakàn yetọn lẹ ma ṣùn do niyẹn. 28  Ogába yetọn lẹpo wẹ dá, Bọ ogá yetọn lẹpo wẹ ko yin dindlẹn.* Ofẹ̀n osọ́ yetọn lẹ tọn taidi osé didá, Podọ kẹkẹfọ yetọn lẹ taidi jẹhọn-ahizi de.+ 29  Lìlì yetọn nọ taidi kinnikinni de tọn; Yé nọ lì di kinnikinni winyanwinyan lẹ.+ Yé na hlún bo zọ̀n nuhe yé jlo na wle ji Bo na ze e yì bọ mẹdepope ma sọgan yí i sọn yé si. 30  Yé na hlún do e ji to azán enẹ gbè Kẹdẹdi hùnhlún ohù tọn.+ Mẹdepope he yìnnukunpọn aigba lọ ji na mọ zinvlu ayimajai tọn; Hinhọ́n lọsu tlẹ ko diọ zun zinvlu, na aslọ lẹ wutu.+

Nudọnamẹ Odò Tọn

To paa mẹ, “alọpapa ao.”
Pọ́n Nud. B14.
Pọ́n Nud. B14.
Pọ́n Nud. B14.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “alindọn etọn.”
Kavi “omẹ nukundeji etọn lẹ.”
Kavi “whẹdida dodo.”
Kavi “nudide; ayinamẹ.”
Kavi “anademẹ.”
Kavi “opò ohia tọn.”
Kavi “ko sọgbe nado yin dide.”