Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 49:1-26

NUHE E BẸHẸN LẸ

  • Azọ́n he yè dena devizọnwatọ Jehovah tọn (1-12)

    • Hinhọ́n akọta lẹ tọn (6)

  • Homẹmimiọn na Islaeli (13-26)

49  Mì dotoaina mi, mì lopo lẹ emi, Mì na ayidonugo, mì akọta he to fidindẹn lẹ.+ Jehovah ko ylọ mi whẹpo yẹn do yin jiji.*+ Sọn whenue gbọ́n n’gbẹ́ to ohò onọ̀ ṣie tọn mẹ wẹ ewọ ko ylọ oyín ṣie.   E basi onù ṣie taidi ohí didá de; Oyẹ̀ alọ etọn tọn glọ wẹ ewọ ko whlá mi do.+ E yí mi do basi ogá sisẹ́ de; E yí mi whlá do ogába-hẹnnu etọn mẹ.   Ewọ dọna mi dọmọ: “Devizọnwatọ ṣie wẹ hiẹ, Islaeli E,+ Mẹhe gblamẹ yẹn na do whanpẹ daho ṣie hia te.”+   Ṣigba, yẹn dọmọ: “N’ko jẹtukla do ovọ́ mẹ. N’ko yí huhlọn ṣie lẹpo zan na nuvọ́ lẹ podọ do ovọ́ mẹ. Ṣigba, e họnwun dọ Jehovah dè wẹ whẹdida ṣie tin te,* Bọ ale* ṣie lẹ tin to Jiwheyẹwhe ṣie dè.”+   Podọ todin, Jehovah, Mẹhe ko wleawuna mi sọn adọ̀mẹ taidi devizọnwatọ etọn, Ewọ ko dọna mi nado hẹn Jakọbu lẹkọwa e dè, Na Islaeli nido yin bibẹpli do ewọ dè.+ Yẹn na yin gigopana to nukun Jehovah tọn lẹ mẹ, Bọ Jiwheyẹwhe ṣie na ko sọ lẹzun huhlọn ṣie.   Ewọ sọ dọmọ: “E ma ko pé dọ hiẹ yin devizọnwatọ ṣie Nado fọ́n hẹnnu Jakọbu tọn lẹ dote Podọ nado hẹn omẹ Islaeli tọn he ko yin hihla dai lẹ lẹkọwa gba. Yẹn ko sọ ze we jo taidi hinhọ́n akọta lẹ tọn,+ Na whlẹngán ṣie nido jẹ opodo aigba tọn lẹ.”+  Nuhe Jehovah, yèdọ Mẹflitọ Islaeli tọn, Omẹ Wiwe etọn,+ dọna mẹhe yin vivlẹko* lọ,+ mẹhe akọta lọ gbẹwanna, yèdọ devizọnwatọ gandutọ lẹ tọn lọ die: “Ahọlu lẹ na mọ bo na fọ́n, Bọ ahọvi lẹ na dẹ́ do odò, Na Jehovah, mẹhe yin nugbonọ lọ wutu,+ Omẹ Wiwe Islaeli tọn lọ, he ko de we.”+   Nuhe Jehovah dọ die: “Yẹn siọ we to ojlẹ nukundagbe* tọn mẹ,+ Yẹn sọ gọalọna we to azán whlẹngán tọn gbè;+ Yẹn to hihọ́-basina we zọnmii nado ze we jo taidi alẹnu de na gbẹtọ lẹ,+ Nado vọ́ otò lọ jlado, Podọ nado gọalọna yé, na yé nido yí ogú yetọn he ko jẹvọ́ lẹ,+   Nado dọna gàntọ lẹ dọ, ‘Mì tọ́n!’+ Podọ na mẹhe tin to zinvlu mẹ lẹ dọ,+ ‘Mì do mìde hia!’ Aliho lẹ tó wẹ yé na nọ dùnú te, Ali he ji mẹsusu nọ gbọn* lẹpo pá wẹ na yin kanlindugbo yetọn lẹ. 10  Huvẹ ma na hù yé, mọ nugbla ma na hù yé,+ Mọjanwẹ yozò sinsinyẹn kavi owhè ma na vẹ́ do yé ji do niyẹn.+ Na Mẹhe nọ do lẹblanu hia yé lọ wẹ na nọ deanana yé,+ Ewọ nasọ nọ deanana yé gbọn asisa osin tọn lẹ tó.+ 11  Yẹn na hẹn osó ṣie lẹpo zun aliho de, Podọ alihogbó ṣie lẹ na yin zizedaga.+ 12  Pọ́n! Fidindẹn wẹ omẹ ehelẹ na wá sọn,+ Podọ pọ́n! mẹdelẹ na wá sọn agewaji podọ sọn whèyihọ-waji, Mẹdevo lẹ nasọ wá sọn aigba Sinimi tọn ji.”+ 13  Mì olọn lẹ emi, mì yí ayajẹ do dawhá, podọ aigba ni hùnhomẹ.+ Gbọ osó lẹ ni yí awhágbe ayajẹ tọn do jẹaglin.+ Na Jehovah ko miọnhomẹna omẹ etọn lẹ,+ Bo ko sọ do lẹblanu hia omẹ etọn he yin yasana lẹ.+ 14  Ṣigba, Ziọni to didọ mapote dọmọ: “Jehovah ko gbẹ́ mi dai,+ podọ Jehovah ko wọn mi.”+ 15  Be yọnnu de sọgan wọn ovi to anọ́nù etọn Kavi nọma tindo awuvẹmẹ na visunnu he tọ́n sọn ohò etọn mẹ ya? Eyin yọnnu ehelẹ tlẹ wọn, yẹn ma na wọn we gbede.+ 16  Pọ́n! Yẹn ko kàn yinkọ towe do alọpahomẹ ṣie lẹ. Adó towe lẹ tin to nukọn ṣie to whepoponu. 17  Visunnu towe lẹ ko lẹkọwa po awuyiya po. Yé mẹhe ko zìn we dai bo ko hẹn we jẹvọ́ lẹ na joagọyigodo sọn dè we. 18  Ze nukun towe lẹ daga bo pọ́n lẹdo pé. Yemẹpo wẹ to yedelẹ bẹpli dopọ.+ Yé ja dè we. “Dile yẹn togbẹ̀,” wẹ Jehovah dọ, “Hiẹ na yí yemẹpo do doaṣọ́ taidi aṣọ́donu lẹ, Hiẹ nasọ sìn yé dogo dile asiyọyọ de nọ wà do. 19  Dile etlẹ yindọ nọtẹn towe lẹ ko yin gbigbakija bo ko yin hinhẹn jẹvọ́ bọ aigba towe ko yin huhusudo,+ Todin, e na wá finyọ́n gbau na mẹhe nọ nọ̀ finẹ lẹ,+ Bọ mẹhe ko ze we mì pete lẹ+ na dẹn do we taun.+ 20  Visunnu he yin jiji to whenue hiẹ to aluẹmẹ lẹ na dọna we dọ, ‘File ko finyọ́n gbau na mi. Natẹn mi dogọ nado nọ nọ̀.’+ 21  Hiẹ nasọ dọ to ahun towe mẹ dọ, ‘Mẹnu wẹ ka ji ovi ehelẹ na mi, To whenuena e yindọ ovi ṣie lẹ ko kú bọ yẹn sọ yin wẹnsinọ, Bo ko yì kanlinmọgbenu bosọ yin gàntọ? Mẹnu wẹ ko plọn ovi ehelẹ whẹ́n?+ Pọ́n! Yẹn dopo gee wẹ yin jijodo to whenẹnu,+ Enẹwutu, fie wẹ ovi ehelẹ wá sọn?’”+ 22  Nuhe Oklunọ Nupojipetọ Jehovah dọ die: “Pọ́n! Yẹn na ze alọ ṣie daga hlan akọta lẹ, Yẹn nasọ ze ohia* ṣie daga hlan gbẹtọ lẹ.+ Yé na bẹ visunnu towe lẹ wá to awà* yetọn lẹ mẹ Bo nasọ bẹ viyọnnu towe lẹ wá to abọ́ yetọn lẹ ji.+ 23  Ahọlu lẹ wẹ na lẹzun mẹgopọntọ towe lẹ,+ Bọ ahọvi-yọnnu yetọn lẹ na lẹzun nukunpedomẹgotọ towe lẹ. Yé na nọ dẹ́ do odò na we bo na nọ ṣinyọ́n nukunmẹ ai+ Bo nasọ nọ didọ́ kọ́gudu he to afọ towe go lẹ,+ Bọ hiẹ na wá yọnẹn dọ yẹn wẹ Jehovah; Mẹhe dejido go e lẹ ma na duwinyan.”+ 24  Be mẹhe ko yin wiwle lẹ sọgan yin yíyí sọn dawe huhlọnnọ de si ya, Kavi be kanlinmọ kọgbidinamẹtọ de tọn lẹ sọgan yin tuntundote wẹ ya? 25  Ṣigba, nuhe Jehovah dọ die: “Etlẹ yin kanlinmọ dawe huhlọnnọ de tọn lẹ na yin yíyí sọn e si,+ Podọ mẹhe yin wiwle gbọn kọgbidinamẹtọ de dali lẹ na yin tuntundote.+ Yẹn na diọnukunsọ mẹhe diọnukunsọ we lẹ,+ Bo nasọ whlẹn visunnu towe titi lẹ. 26  Yẹn na hẹn mẹhe nọ yinuwa hẹ we to aliho agọ̀ mẹ lẹ nado dù olàn yedetiti tọn, Yé nasọ nù ohùn yedetiti tọn mú taidi ovẹn he vivi. Gbẹtọ* lẹpo nasọ wá yọnẹn dọ yẹn wẹ Jehovah,+ Mẹwhlẹngántọ+ towe podọ Mẹflitọ+ towe, Yèdọ Omẹ Huhlọnnọ Jakọbu tọn lọ.”+

Nudọnamẹ Odò Tọn

To paa mẹ, “sọn adọ̀ mẹ.”
Kavi “Jehovah na na mi whẹdida dodo.”
Kavi “ahọsumẹ.”
Kavi “yin vivlẹko to alindọn mẹ.”
Kavi “ojlo dagbe.”
Kavi vlavo, “Okọ́ta he to tata.”
Kavi “opò ohia tọn.”
To paa mẹ, “akọ́nnu.”
To paa mẹ, “Agbasalan.”