Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 44:1-28

NUHE E BẸHẸN LẸ

  • Dona do mẹdide Jiwheyẹwhe tọn lẹ ji (1-5)

  • Jiwheyẹwhe devo ma tin (6-8)

  • Ovọ́ wẹ boṣiọ he gbẹtọ basi lẹ (9-20)

  • Jehovah, Mẹflitọ Islaeli tọn (21-23)

  • Hinhẹngọwa gbọn Kilusi gblamẹ (24-28)

44  “Todin dotoai, hiẹ devizọnwatọ ṣie Jakọbu E, Podọ hiẹ Islaeli E, mẹhe yẹn ko de.+   Nuhe Jehovah dọ die, Yèdọ Mẹdatọ towe po Basitọ towe po,+ Mẹhe ko gọalọna we sọn adọ̀mẹ:* ‘A dibu blo, devizọnwatọ ṣie Jakọbu,+ Podọ hiẹ, Jeṣuluni,*+ mẹhe yẹn ko de.   Na yẹn na kọ̀n osin do mẹhe* nugbla to hùhù ji+ Bo na hẹn asisa osin tọn lẹ nado nọ sà to aigba húhú ji. Yẹn na kọ̀n gbigbọ ṣie do kúnkan* towe ji+ Podọ dona ṣie do ovi towe lẹ ji.   Yé nasọ tọ́nkun taidi to ogbé-mú lẹ ṣẹnṣẹn,+ Taidi atin pọpila tọn he to asisa osin tọn lẹ tó.   Mẹde na dọ dọ: “Jehovah tọn wẹ yẹn yin.”+ Mẹdevo nasọ nọ yí oyín Jakọbu tọn do ylọ ede, Podọ mẹdevo na kàn do alọ ede tọn go dọmọ: “Jehovah tọn die.” Ewọ nasọ kẹalọyi oyín Islaeli tọn.’   Nuhe Jehovah dọ die, Yèdọ Ahọlu Islaeli tọn+ podọ Mẹflitọ etọn,+ Jehovah awhànpa lẹ tọn: ‘Yẹn wẹ omẹ tintan podọ yẹn wẹ omẹ godo tọn.+ Jiwheyẹwhe devo de ma tin gbọnvona mi.+   Mẹnu wẹ sọ tin finẹ he taidi yẹn?+ Gbọ ewọ ni dawhá jẹgbonu bo lá ede bosọ do kunnudenu etọn hia mi!+ Sọn whenue gbọ́n n’ko hẹn akọta lọ wá aimẹ sọn whenu dindẹn die, Gbọ yé ni dọ nuhe to nukọn ja lẹ Podọ nuhe na wá jọ to nukọn mẹ lẹ.   Ahun mìtọn gbàdo blo, Mì sọ dike obu hẹn awuku mì blo.+ Be n’ma ko dọna dopodopo mìtọn lẹ jẹnukọn bo ko sọ lá ẹ na mì ya?+ Mìwlẹ wẹ kunnudetọ ṣie lẹ. Be Jiwheyẹwhe de sọ tin gbọnvona mi wẹ? Paali, Osé devo depope masọ tin;+ yẹn ma yọ́n devo de.’”   Ovọ́ wẹ mẹdepope he nọ basi boṣiọ pipà lẹ, Boṣiọ yiwanna yetọn lẹ ma nasọ hẹn ale depope wá.+ Taidi kunnudetọ yetọn lẹ, yé* ma nọ mọ nude kavi yọ́n nude,+ Enẹwutu, mẹhe basi yé lẹ na duwinyan.+ 10  Mẹnu wẹ na wleawuna yẹwhe de kavi basi boṣiọ kinkọ̀n de He ma sọgan hẹn ale depope wá?+ 11  Pọ́n! Gbẹdohẹmẹtọ etọn lẹpo wẹ na duwinyan!+ Gbẹtọ tata lẹ wẹ anazọ́nwatọ lẹ yin. Gbọ yemẹpo ni bẹ yede pli bo wá ṣite. Obu na jẹ yé ji bọ yemẹpo na duwinyan dopọ. 12  Ayáwatọ nọ yí azọ́nwanu etọn do hẹn gànyuu do miyọ́nkán ji. E nọ yí ṣówhènú lẹ do tùn in, Bo nọ yí awà huhlọnnọ etọn do wazọ́n deji.+ Enẹgodo, huvẹ nọ hù i bọ onú nọ ṣikọna ẹn; E ma nọ nùsin bọ agbọ́ nọ pé e. 13  Atinpatọ nọ dlẹn nujlẹkàn etọn bo nọ yí nukànnú vẹẹ do dohiagona ẹn. E nọ yí atinwhlẹ́nú de do whlẹ́ ẹ bo nọ yí nuhe nọ jlẹnu do yí ojlẹ etọn. E nọ pà ẹ sọgbe hẹ apajlẹ gbẹtọ de tọn,+ Yèdọ sọgbe hẹ whanpẹ gbẹtọ de tọn, Nado sinai to ohọ̀* de mẹ.+ 14  Mẹde tin he azọ́n ewọ tọn wẹ nado nọ sán atin kedali tọn lẹ liai. E nọ de atin wunmẹ tangan de, yèdọ atin oaki tọn, Bo nọ dike atin lọ ni whẹ́n bo sinyẹn to atin zungbo mẹ tọn lẹ ṣẹnṣẹn.+ Ewọ nọ do atin lolẹli tọn bọ jikun nọ hẹn ẹn whẹ́n. 15  Enẹgodo, e nọ lẹzun miyọ́n-flọnú na gbẹtọ. E nọ yí apadewhe etọn zan nado hú miyọ́n; E nọ yí i do flọ miyọ́n bo nọ dà akla to e ji. Ṣigba, e sọ nọ yí i do basi yẹwhe de bo nọ sẹ̀n ẹn. E nọ yí i do basi boṣiọ pipà bo nọ dẹ́ do odò to nukọn etọn.+ 16  E nọ yí odaa etọn do flọ miyọ́n; Odaa etọn enẹ wẹ e nọ yí do hì olàn he e nọ dù bo nọ gọ́ho. Ewọ sọ nọ hú miyọ́n bo nọ dọmọ: “Ẹn hẹn! N’ko hú miyọ́n dile n’to miyọ́n lọ pọ́n.” 17  Ṣigba, pipotọ etọn wẹ e nọ yí do basi yẹwhe de, yèdọ boṣiọ pipà de na ede. E sọ nọ dẹ́ do odò na ẹn bo nọ sẹ̀n ẹn. Ewọ nọ hodẹ̀ hlan ẹn dọmọ: “Whlẹn mi, na hiẹ wẹ yin yẹwhe ṣie.”+ 18  Yé ma yọ́n nude, yé ma mọnukunnujẹ nude mẹ,+ Na nukun yetọn lẹ ko yin titlẹ́ bọ yé ma sọgan mọnú, Podọ ahun yetọn ma tindo wuntuntun. 19  Depope to yé mẹ ma lẹnnupọndeji to ahun etọn mẹ Kavi tindo oyọnẹn kavi nukunnumọjẹnumẹ nado dọmọ: “Odaa etọn wẹ n’yí do flọ miyọ́n, Bọ miyọ́nkán etọn ji wẹ n’dà akla te bosọ hì olàn te nado dù. Enẹwutu, be e jẹ dọ ma yí pipotọ etọn do basi osùnú de ya?+ Be e jẹ dọ ma nọ basi sinsẹ̀n hlan atinpo* de he yin pipà sọn atin de mẹ ya?” 20  Afín wẹ e nọ dù. Ahun etọn he ko yin yẹdoklọ ko hẹn ẹn danbú. E ma sọgan whlẹn ede,* mọ e masọ dọmọ: “Be oklọ-nú de ma tin to adusilọ ṣie mẹ?” 21  “Flin onú ehelẹ, hiẹ Jakọbu E, podọ hiẹ Islaeli E, Na devizọnwatọ ṣie wẹ hiẹ yin. Yẹn wẹ basi we, podọ devizọnwatọ ṣie wẹ hiẹ yin.+ Islaeli E, yẹn ma na wọn we.+ 22  Yẹn na súnsún sẹ́nhẹngba towe lẹ sẹ̀ taidi po aslọ de po+ Bo na súnsún ylando towe lẹ sẹ̀ taidi po aslọ titli de po. Lẹkọwa dè e, na yẹn na fli we gọ̀.+ 23  Mì yí ayajẹ do dawhá, mì olọn lẹ emi, Na Jehovah ko yinuwa! Mì dawhá awhàngbigba tọn, mì odò he siso aigba tọn lẹ emi! Mì dawhá na ayajẹ, mì osó lẹ emi,+ Gọna mì zungbo lẹ po atin mìtọn lẹpo po! Na Jehovah ko fli Jakọbu gọ̀, Bosọ nọ do whanpẹ daho etọn hia do Islaeli ji.”+ 24  Nuhe Jehovah, Mẹflitọ towe dọ die,+ Yèdọ mẹhe wleawuna we sọn whenue gbọ́n hiẹ tin to adọ̀mẹ: “Yẹn wẹ Jehovah, mẹhe basi nulẹpo. Yẹnlọsu wẹ dlẹn olọn lẹ jẹgbonu,+ Podọ yẹn wẹ tẹ́ aigba.+ Mẹnu wẹ tin to finẹ hẹ mi? 25  Yẹn wẹ nọ diọ ohia mẹhe nọ dọ ohó ovọ́* lẹ tọn lẹ, Podọ yẹn wẹ nọ hẹn dọṣẹdọtọ lẹ nado yinuwa di nulunọ;+ Yẹn wẹ nọ hẹn nuyọnẹntọ lẹ biọ bẹwlu mẹ Bo nọ diọ nuyọnẹn yetọn zun nulú;+ 26  Yẹn wẹ Mẹlọ he nọ hẹn ohó devizọnwatọ etọn tọn ṣẹ Bosọ nọ hẹn dọdai wẹnsagun etọn lẹ tọn lẹ di mlẹnmlẹn;+ Mẹhe dọ gando Jelusalẹm go dọ, ‘E na lẹzun fininọ de,’+ Podọ gando tòdaho Juda tọn lẹ go dọ, ‘Yé na yin vivọgbá,+ Yẹn nasọ hẹn gbakija etọn lẹ nado yin vivọgbá’;+ 27  Mẹhe dọna otọ̀ he siso lẹ dọ, ‘Mì hú, Podọ tọ̀sisa mìtọn lẹpo wẹ yẹn na hẹn hú pete’;+ 28  Mẹhe dọ gando Kilusi+ go dọ, ‘Lẹngbọhọtọ ṣie wẹ ewọ, Bọ ewọ nasọ hẹn ojlo ṣie lẹpo di mlẹnmlẹn’;+ Mẹhe dọ gando Jelusalẹm go dọ, ‘E na yin vivọgbá,’ Podọ gando tẹmpli lọ go dọ, ‘Dodonu towe na yin didoai.’”+

Nudọnamẹ Odò Tọn

Kavi “sọn jiji whenu.”
Zẹẹmẹdo “Nugbonọ,” yèdọ tẹnmẹ-yinkọ gigonọ de na Islaeli.
Kavi “aigba he.”
To paa mẹ, “okún.”
Enẹ wẹ, boṣiọ lẹ.
Kavi “tẹmpli pẹvi.”
Kavi “atinpo húhú.”
Kavi “alindọn ede tọn.”
Kavi “ohia yẹwhegán lalo.”