Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 43:1-28

NUHE E BẸHẸN LẸ

  • Jehovah vọ́ omẹ etọn lẹ bẹpli (1-7)

  • Yè ylọwhẹ yẹwhe lẹ (8-13)

    • “Mìwlẹ wẹ kunnudetọ ṣie lẹ” (10, 12)

  • Tundote sọn Babilọni (14-21)

  • “Gbọ mí ni ylọwhẹ míde” (22-28)

43  Todin, nuhe Jehovah dọ die, Yèdọ Mẹdatọ towe, hiẹ Jakọbu E, podọ Mẹhe basi we, hiẹ Islaeli E:+ “A dibu blo, na yẹn ko fli we gọ̀.+ N’ko yí oyín towe do ylọ we. Hiẹ ko lẹzun ṣie.   Eyin hiẹ to osin mẹ gbọn, yẹn na tin hẹ we,+ Eyin hiẹ sọ to tọ̀sisa lẹ mẹ gbọn, yé ma na ṣinyọ́n ji we.+ Eyin hiẹ to zọnlinzin gbọn miyọ́n mẹ, e ma na mẹ̀ we, Mọjanwẹ miyọ́n he to jiji lọ ma na fiọ we do niyẹn.   Na yẹn wẹ Jehovah Jiwheyẹwhe towe, Omẹ Wiwe Islaeli tọn, yèdọ Whlẹngántọ towe. Yẹn ko ze Egipti jo taidi ofligọ de do ota towe mẹ, Bo ko ze Etiopia po Seba po jo do otẹn towe mẹ.   Na hiẹ lẹzun nuhọakuẹ to nukun ṣie mẹ wutu,+ Hiẹ yin gbégbòna, bọ yẹn ko sọ yiwanna we.+ Enẹwutu, yẹn na ze gbẹtọ lẹ jo do ota towe mẹ Bo nasọ ze akọta lẹ jo do ogbẹ̀* towe tẹnmẹ.   A dibu blo, na yẹn tin hẹ we.+ Yẹn na hẹn kúnkan* towe wá sọn whèzẹtẹn-waji Bo na bẹ mì pli dopọ sọn whèyihọ-waji.+   Yẹn na dọna agewaji dọ, ‘Jo yé!’+ Podọ na hùwaji dọ, ‘A glọnalina yé blo. Hẹn visunnu ṣie lẹ wá sọn fidindẹn, podọ viyọnnu ṣie lẹ sọn opodo aigba tọn lẹ,+   Yèdọ mẹdepope he nọ yin yiylọ gbọn oyín ṣie dali+ Podọ mẹhe yẹn dá na gigo ṣie titi wutu, Mẹhe yẹn ko basi bo ko hẹnwa aimẹ lẹ.’+   Hẹn mẹhe tindo nukun ṣogan bo yin nukuntọ́nnọ lẹ jẹgbonu wá, Gọna mẹhe tindo otó ṣogan bo yin tókunọ lẹ.+   Gbọ akọta lẹpo ni bẹ yede pli do fidopo, Na gbẹtọ lẹ ni yin bibẹpli dopọ.+ Mẹnu to yé mẹ wẹ sọgan dọ ehe? Kavi be yé sọgan hẹn míwlẹ nado sè onú tintan lẹ* wẹ ya?+ Gbọ yé ni hẹn kunnudetọ yetọn lẹ wá nado suwhẹna yede, Kavi gbọ yé ni sè bosọ dọmọ, ‘Nugbo wẹ!’”+ 10  “Mìwlẹ wẹ kunnudetọ ṣie lẹ,”+ wẹ Jehovah dọ, “Mọwẹ, devizọnwatọ ṣie he yẹn ko de,+ Na mìwlẹ nido yọnẹn bo tindo yise to yẹn mẹ* Bosọ mọnukunnujẹemẹ dọ yẹn Mẹdopolọ wẹ.+ Yẹwhe de ma ko yin didoai jẹnukọnna mi, Podọ devo de ma ko tin to godo ṣie.+ 11  Yẹn—yèdọ yẹn wẹ Jehovah,+ podọ whlẹngántọ de ma tin gbọnvona mi.”+ 12  “Yẹn wẹ Mẹlọ he ko dọ bo whlẹngán bosọ hẹn ẹn zun yinyọnẹn To whenue yẹwhe jonọ de ma ko tin to ṣẹnṣẹn mìtọn.+ Enẹwutu, mìwlẹ wẹ kunnudetọ ṣie lẹ,” wẹ Jehovah dọ, “podọ yẹn wẹ Jiwheyẹwhe.+ 13  Humọ, yẹn Omẹ dopolọ wẹ tẹgbẹ;+ Podọ mẹdepope ma sọgan hò nude yí sọn alọ ṣie mẹ.+ To whenue yẹn yinuwa, mẹnu wẹ sọgan glọnalina mi?”+ 14  Nuhe Jehovah dọ die, yèdọ Mẹflitọ mìtọn,+ Omẹ Wiwe Islaeli tọn:+ “Na mìwlẹ tọn wutu, yẹn na domẹhlan Babilọni bo na họ́ dòtin họngbo tọn lẹpo liai,+ Bọ Kaldeanu lẹ na yí ayimajai do dawhá jẹgbonu to tọjihun yetọn lẹ mẹ.+ 15  Yẹn wẹ Jehovah, Omẹ Wiwe mìtọn,+ yèdọ Mẹdatọ Islaeli tọn,+ Ahọlu mìtọn.”+ 16  Nuhe Jehovah dọ die, Yèdọ Mẹlọ he nọ de aliho gbọn hùmẹ Bo nọ deali gbọn osin he tlẹ to zingidi ji lẹ mẹ,+ 17  Mẹlọ he nọ hẹn osọ́-kẹkẹ awhàn tọn lẹ po osọ́ lẹ po tọ́njẹgbonu,+ Gọna awhànpa lẹ po awhànfuntọ huhlọnnọ lẹ po: “Yé na mlọnai bo ma na fọ́n.+ Yé na yin ṣíṣí, bo na yin hihò ṣí taidi miyọ́ngbán-kàn de.” 18  “Mì flin onú hoho tọn lẹ blo, Mì sọ hẹn nuhe ko jọ wayi lẹ do ayiha mẹ blo. 19  Pọ́n! Onú yọyọ de wẹ yẹn to bibasi;+ E tlẹ ko to tintọ́njẹgbonu to alọnu. Be mì ma ko doayi e go wẹ? Yẹn na de aliho de gbọn danfafa ji+ Podọ tọ̀sisa lẹ gbọn danfafa ji.+ 20  Gbekanlin danji tọn lẹ na nọ gbògbéna mi, Yèdọ avún gbémẹ tọn lẹ po ogongo lẹ po, Na yẹn ko hẹn osin tin to danfafa ji, Podọ tọ̀sisa lẹ to danfafa ji,+ Na omẹ ṣie he yin mẹdide ṣie lẹ+ nido nọ nù, 21  Yèdọ na mẹhe yẹn ko hẹnwa aimẹ na dee lẹ, Na yé nido nọ lá pipà ṣie.+ 22  Ṣigba, hiẹ ma ko dawhá ylọ mi, Jakọbu E,+ Na apọ̀ ṣie ko do we wutu, Islaeli E.+ 23  Hiẹ ma hẹn lẹngbọ lẹ wá na mi taidi avọ́nunina mimẹ̀ blebu lẹ Kavi yí avọ́sinsan towe lẹ do pagigona mi. Yẹn ma hẹn we gánnugánnu nado hẹn nunina de wá na mi, Mọjanwẹ n’ma hẹn apọṣi we gbọn nuyọnwan gblingblin lẹ bibiọ dali do niyẹn.+ 24  Hiẹ ma yí akuẹ towe do họ̀ ofán owán gblingblinnọ wá na mi, Podọ hiẹ ma yí ojó avọ́sinsan towe lẹ tọn do hẹn pekọ wá na mi.+ Kakatimọ, ylando towe lẹ wẹ hiẹ yí do hẹn agbàn pẹ̀n mi Bosọ yí nuṣiwa towe lẹ do hẹn apọṣi mi.+ 25  Yẹn, yèdọ yẹn wẹ Mẹlọ he nọ to sẹ́nhẹngba* towe lẹ súnsúnsẹ̀,+ na oyín ṣie tọn wutu,+ Yẹn ma nasọ flin ylando towe lẹ ba.+ 26  Flinnu mi; gbọ mí ni ylọwhẹ míde; Dọ adà towe nado suwhẹna dewe. 27  Tọgbo towe tintan ko waylando, Podọ hoyidọtọ* towe titi lẹ ko ṣiatẹ sọta mi.+ 28  Enẹwutu, yẹn na de yẹyi sọn ahọvi ofi wiwe lọ tọn lẹ go, Yẹn na ze Jakọbu jo na vasudo Bo na ze Islaeli jo na zungbe lẹ.+

Nudọnamẹ Odò Tọn

Kavi “alindọn.”
To paa mẹ, “okún.”
Vlavo ehe na ko to alọdlẹndo onú tintan he na jọ to sọgodo lẹ.
Kavi “bo dejido go e.”
Kavi “nuyiwa atẹṣiṣi tọn.”
Vlavo ehe na ko to alọdlẹndo mẹplọntọ Osẹ́n lọ tọn lẹ.