Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 38:1-22

NUHE E BẸHẸN LẸ

  • Hẹzekia jẹazọ̀n bo jẹgangan (1-22)

    • Ohàn pẹdido tọn (10-20)

38  To azán enẹlẹ gbè, Hẹzekia jẹazọ̀n kakajẹ kúdonu.+ Yẹwhegán Isaia,+ visunnu Amọzi tọn sọ wá e dè bo dọna ẹn dọ, “Nuhe Jehovah dọ die: ‘Na anademẹ lẹ whédo towe, na hiẹ na kú; a ma na jẹgangan.’”+  To whenẹnu, Hẹzekia lilẹ́ nukunmẹ etọn pannukọn adó bo jẹ dẹ̀ho hlan Jehovah ji dọmọ:  “N’vẹ̀ we, Jehovah E, jaale flin+ lehe n’ko yí nugbonọ-yinyin do zinzọnlin to nukọn towe po ahun pipé de po do,+ podọ n’ko wà nuhe yin dagbe to nukun towe mẹ lẹ.” Hẹzekia sọ jẹ avivi ji badabada.  To whenẹnu, ohó Jehovah tọn wá Isaia dè dọmọ:  “Lẹkọyi bo dọna Hẹzekia dọ,+ ‘Nuhe Jehovah, Jiwheyẹwhe Davidi tọgbo towe tọn dọ die: “N’ko sè odẹ̀ towe.+ N’ko sọ mọ dasin towe lẹ.+ Todin, yẹn to owhe 15 yidogọ gbẹzan* towe,+  podọ yẹn na whlẹn hiẹ po tòdaho ehe po sọn alọ ahọlu Asilia tọn mẹ, yẹn nasọ yiavùnlọna tòdaho ehe.+  Ohia de die sọn Jehovah dè nado dohia we dọ Jehovah na hẹn ohó he e ko dọ lọ di:+  Yẹn na hẹn oyẹ̀ owhè tọn he ko to doyi to pèkán* Ahazi tọn go lọ yigodo na afọdide ao.”’”+ Oyẹ̀ owhè tọn lọ sọ yigodo na afọdide ao to pèkán lọ go sọn fihe e ko sẹ̀ yìdo jẹ dai.  Ehe wẹ kandai Ahọlu Hẹzekia Juda tọn to whenue e ko jẹazọ̀n bo ko jẹgangan sọn azọ̀njijẹ etọn mẹ godo. 10  Yẹn dọmọ: “To ṣẹnṣẹn gbẹzan ṣie tọn Wẹ n’na ko yì biọ họngbo Yọdò* tọn lẹ mẹ. Pipotọ owhe ṣie lẹ tọn na yin titẹ̀ mi.” 11  Yẹn dọmọ: “N’ma na mọ Jah,* yèdọ Jah to aigba mẹhe togbẹ̀ lẹ tọn ji.+ Yẹn ma na mọ gbẹtọvi lẹ ba To whenue yẹn na ko tin hẹ mẹhe nọ nọ̀ fihe nulẹpo nọ doalọte te lẹ. 12  Nọtẹn ṣie titi ko yin dindọn sún bo yin didesẹ Taidi gòhọ lẹngbọhọtọ de tọn.+ N’ko há ogbẹ̀ ṣie sẹ̀ taidi avọ̀lọ̀ntọ de; E sán mi sẹ̀ taidi avọ̀lọn-kàn lẹ. Hiẹ nọ to hinhẹn mi wá opodo sọn okle kakajẹ zánmẹ.+ 13  N’nọ dava dee kakajẹ afọnnu. Ewọ nọ to ohú ṣie lẹpo gbà mapote taidi kinnikinni de; Hiẹ nọ to hinhẹn mi wá opodo sọn okle kakajẹ zánmẹ.+ 14  Kẹdẹdi agadawhlé po owhlẹ́n po, mọ wẹ yẹn nọ to núdọ do;+ N’nọ to núdọ di apoe.+ Nukun ṣie lẹ ko pọ́n aga kaka bọ agbọ́pe:+ ‘Jehovah E, ayimajai sinsinyẹn mẹ wẹ n’te; Lẹzun alọgọtọ* ṣie!’+ 15  Etẹwẹ n’gán dọ din? Ewọ ko dọhona mi bo ko sọ hẹn ẹn di. Yẹn na nọ yí whiwhẹ* do zinzọnlin to gbẹzan ṣie lẹpo mẹ Na ayimajai sinsinyẹn ṣie* wutu. 16  ‘Jehovah E, gbọn onú ehelẹ* dali wẹ gbẹtọ lẹpo togbẹ̀, Podọ yé mẹ wẹ gbigbọ ogbẹ̀ tọn ṣie tin te. Hiẹ na hẹn mi jẹgangan bo hẹn mi dogbẹ̀.+ 17  Pọ́n! Kakati nido yin jijọho, awufiẹsa daho wẹ n’tindo; Ṣigba, na owanyi he a tindo na mi* wutu, Hiẹ whlẹn mi sọn odò vasudo tọn lọ mẹ.+ Hiẹ ko bẹ ylando ṣie lẹpo dlan godo towe.*+ 18  Na Yọdò* ma sọgan pagigona we,+ Okú ma sọgan pà we.+ Mẹhe jẹte yì odò lọ mẹ lẹ ma sọgan tindo todido to nugbonọ-yinyin towe mẹ.+ 19  Mẹhe togbẹ̀, yèdọ mẹhe togbẹ̀ lẹ wẹ sọgan pà we, Kẹdẹdile yẹn sọgan wàmọ to egbehe do. Otọ́ de sọgan plọn oyọnẹn visunnu etọn lẹ gando nugbonọ-yinyin towe go.+ 20  Jehovah E, whlẹn mi, Míwlẹ nasọ nọ jihàn ṣie lẹ to hànjinu okànnọ lẹ ji+ To gbẹzan mítọn lẹpo mẹ to ohọ̀ Jehovah tọn mẹ.’”+ 21  Whenẹnu wẹ Isaia dọmọ: “Mì hẹn akla hìhì ovò sinsẹ́n húhú he yin finfinyọ́n dopọ tọn de wá bo sá ẹ do nutitẹ̀ lọ mẹ, na ewọ nido jẹgangan.”+ 22  Hẹzekia ko kanse dai dọ: “Etẹwẹ na yin ohia lọ dọ n’na hẹji yì ohọ̀ Jehovah tọn mẹ?”+

Nudọnamẹ Odò Tọn

To paa mẹ, “azán.”
Vlavo pèkán ehelẹ nọ yin yiyizan nado hia gànmẹ, taidi to owhè-gàn de ji.
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
“Jah” yin sándogli yinkọ lọ Jehovah tọn.
To paa mẹ, “alọyitọ.”
Kavi “sọwhiwhe.”
Kavi “Na awufiẹsa alindọn ṣie tọn.”
Enẹ wẹ, ohó po nuyiwa Jiwheyẹwhe tọn lẹ po.
Kavi “alindọn ṣie.”
Kavi “ko de ylando ṣie lẹpo sẹ̀ sọn nukọn towe.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.