Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 37:1-38

NUHE E BẸHẸN LẸ

  • Hẹzekia dín alọgọ Jiwheyẹwhe tọn (1-7)

  • Sẹnnakelibi sìn-adán na Jelusalẹm (8-13)

  • Odẹ̀ Hẹzekia tọn (14-20)

  • Isaia dowẹn Jiwheyẹwhe tọn (21-35)

  • Angẹli de hù Asilianu 185 000 (36-38)

37  Tlolo he Ahọlu Hẹzekia sè ehe, e tlẹ́n awù etọn lẹ bo yí odẹ́vọ̀ ṣinyọ́n na ede bosọ yì ohọ̀ Jehovah tọn mẹ.+  To whenẹnu, e do Eliakimi he nọ penukundo whédo* ahọlu tọn go, Ṣẹbna he yin wekantọ lọ gọna mẹho yẹwhenọ lẹ tọn lẹ hlan yẹwhegán Isaia+ he yin visunnu Amọzi tọn dè to odẹ́vọ̀ mẹ.  Yé sọ dọna ẹn dọmọ: “Nuhe Hẹzekia dọ die, ‘Azán ayimajai, nugbẹnamẹ* po winyan po tọn de wẹ azán egbehe tọn yin; na ovi lẹ ko wleawufo nado yin jiji,* ṣigba huhlọn depope ma pò nado jivi.+  Vlavo Jehovah Jiwheyẹwhe towe na sè ohó Labṣake lọ tọn lẹ, mẹhe oklunọ etọn, ahọlu Asilia tọn dohlan nado wá vlẹ Jiwheyẹwhe ogbẹ̀nọ lọ kò,+ bọ ewọ nasọ hẹn ẹn nado dogbè ohó he Jehovah Jiwheyẹwhe towe ko sè lẹ tọn. Enẹwutu, hodẹ̀+ do pipotọ he luntọ́n lẹ tamẹ.’”+  Devizọnwatọ Ahọlu Hẹzekia tọn lẹ sọ yì Isaia dè,+  bọ Isaia dọna yé dọmọ: “Mì dọna oklunọ mìtọn dọ, ‘Nuhe Jehovah dọ die: “A dibu,+ na ohó he a sè lẹ wutu blo, yèdọ ohó he devizọnwatọ ahọlu Asilia tọn lọ tọn lẹ+ dọ nado zánnu do go e.  Todin, yẹn na ze linlẹn de do ayiha etọn mẹ,* bọ ewọ na sè linlin de bo na lẹkọyi otò etọn titi mẹ;+ yẹn nasọ hẹn ẹn nado jai gbọn ohí dali to otò etọn titi mẹ.”’”+  To whenue Labṣake lọ sè dọ ahọlu Asilia tọn ko bẹ awhànpa etọn sẹ̀ sọn Lakiṣi, e lẹkọyi e dè bo mọdọ e to avùnho hẹ Libna.+  To whenẹnu, ahọlu lọ sè bọ e yin didọ gando Ahọlu Tilhaka Etiopia tọn go dọmọ: “E ko tọ́n wá nado hoavùn hẹ we.” To whenue ewọ sè ehe, e sọ vọ́ do wẹnsagun lẹ hlan Hẹzekia+ dọmọ: 10  “Nuhe mìwlẹ dona dọna Ahọlu Hẹzekia Juda tọn die, ‘A dike Jiwheyẹwhe towe he go hiẹ dejido klọ we blo gbọn didọ dali dọmọ: “Jelusalẹm ma na yin jijodo alọ ahọlu Asilia tọn mẹ.”+ 11  Pọ́n! Hiẹ ko sè nuhe ahọlu Asilia tọn lẹ wà na otò lọ lẹpo gbọn viva yé sudo mlẹnmlẹn dali.+ Be hiẹ dopo wẹ na yin whinwhlẹngán ya? 12  Be yẹwhe akọta he tọgbo ṣie lẹ vasudo tọn lẹ whlẹn yé wẹ?+ Fie wẹ Gozani, Halani,+ Lezẹfi po omẹ Edẹni tọn he to Tẹli-asali dai lẹ po te? 13  Fie wẹ ahọlu Hamati tọn, ahọlu Alpadi tọn, gọna ahọlu tòdaho Sefalivaimi tọn lẹ tọn,+ Hena tọn po Iva tọn po lẹ te?’” 14  Hẹzekia yí wekanhlanmẹ lọ lẹ sọn alọ wẹnsagun lọ lẹ tọn mẹ bo hia yé. Enẹgodo, Hẹzekia hẹji yì ohọ̀ Jehovah tọn mẹ bo hùn yé* tẹ́ to Jehovah nukọn.+ 15  Hẹzekia sọ jẹ dẹ̀ho hlan Jehovah ji+ dọmọ: 16  “Jehovah awhànpa lẹ tọn E,+ Jiwheyẹwhe Islaeli tọn he sinai to ofìn ji to aga* kelubimi lẹ tọn, hiẹ dopo wẹ yin Jiwheyẹwhe nugbo lọ na ahọluduta aigba ji tọn lẹpo. Hiẹ wẹ basi olọn po aigba po. 17  Jehovah E, lẹ́ otó towe hlan mi, bo sè!+ Jehovah E, hùn nukun towe lẹ, bo mọ!+ Sè ohó he Sẹnnakelibi ko dọhlan nado vlẹ Jiwheyẹwhe ogbẹ̀nọ lọ kò lẹpo.+ 18  Jehovah E, nugbo wẹ dọ ahọlu Asilia tọn lẹ ko hẹn otò lọ lẹpo jẹvọ́+ kakajẹ otò yetọn titi ji. 19  Yé ko sọ bẹ yẹwhe yetọn lẹ dlan miyọ́n mẹ,+ na yé ma yin yẹwhe jọ yẹwhe lẹ, adavo alọnuzọ́n gbẹtọvi tọn,+ yèdọ atin po zannu po. Enẹwutu wẹ yé do penugo nado và yé sudo. 20  Ṣigba todin, Jehovah Jiwheyẹwhe mítọn E, whlẹn mí sọn alọ etọn mẹ, na ahọluduta aigba ji tọn lẹpo nido yọnẹn dọ hiẹ Jehovah E, hiẹ dopo kẹdẹ wẹ Jiwheyẹwhe.”+ 21  Whenẹnu wẹ Isaia visunnu Amọzi tọn dowẹn hlan Hẹzekia dọmọ: “Nuhe Jehovah Jiwheyẹwhe Islaeli tọn dọ die, ‘Na hiẹ hodẹ̀ hlan mi gando Ahọlu Sẹnnakelibi Asilia tọn go wutu,+ 22  nuhe Jehovah ko dọ gando ewọ go wẹ yindọ: “Viyọnnu alọji Ziọni tọn vlẹ we kò, ewọ ṣàn we kò. Viyọnnu Jelusalẹm tọn mimí ota etọn sọta we. 23  Mẹnu wẹ hiẹ vlẹko+ podọ mẹnu go wẹ a zánnu do? Mẹnu ji wẹ a dawhá do+ Bo ze nukun goyiyi tọn towe daga sọta? Omẹ Wiwe Islaeli tọn lọ wẹ!+ 24  Gbọn devizọnwatọ towe lẹ gblamẹ, hiẹ ko vlẹ Jehovah kò+ bo dọmọ, ‘Yẹn na yí osọ́-kẹkẹ awhàn tọn susugege ṣie lẹ Do hẹji yì osó lẹ ji aga,+ Yì awà Lẹbanọni tọn he to olá pete lẹ ji. Yẹn na sán kedali etọn he yiaga taun lẹ liai, atin junipeli tọn etọn dagbedagbe lẹ. Yẹn na biọ figángán etọn he yiaga hugan lẹ, yèdọ zungbo daho hugan etọn lẹ mẹ. 25  Yẹn na kùn dotọ̀ lẹ bo nù osin lẹ; Yẹn nasọ yí afọpahomẹ ṣie lẹ do hẹn asisa* Egipti tọn lẹ hú pete.’ 26  Be a ma ko sè wẹ? Ojlẹ dindẹn die gbọ́n wẹ yè ko magbe etọn.* Sọn azán he ko wayi lẹ die wẹ yẹn ko wleawu etọn.+ Todin, yẹn na hẹn ẹn di.+ Hiẹ na hẹn tòdaho gángán lẹ jẹvọ́ bọ yé na lẹzun okiti gbakija tọn lẹ.+ 27  Mẹhe nọ nọ̀ yé mẹ lẹ nasọ lẹzun madogánnọ; Yé na dibu bosọ duwinyan. Yé na wá taidi ogbé danji tọn lẹ po ogbé-mú lẹ po, Yèdọ taidi ogbé họta tọn lẹ he jẹhọn whèzẹtẹn tọn ko hẹn yọ́. 28  Ṣigba, yẹn nọ yọnẹn hezeheze eyin hiẹ sinai, eyin hiẹ tọ́njẹgbonu, eyin hiẹ biọ họmẹ,+ Podọ eyin hiẹ gblehomẹ do go e,+ 29  Na homẹgble towe sọta mi+ podọ gbigbó towe ko jẹ otó ṣie lẹ mẹ.+ Enẹwutu, yẹn na ze omlẹn ṣie do awọntin towe mẹ+ bo nasọ dogàn nùflo towe lẹ, Yẹn nasọ lẹkọna we dile hiẹ wá do.” 30  “‘Podọ ehe wẹ na yin ohia de na we:* To owhe ehe mẹ, mìwlẹ na dù nuhe na wujẹgbonu na yede lẹ;* podọ to owhe awetọ mẹ, mìwlẹ na dù jinukun he na wujẹgbonu sọn enẹ mẹ lẹ; ṣigba to owhe atọ̀ntọ mẹ, mìwlẹ na do jinukun bo na gbẹ̀n, mì nasọ do vẹngle lẹ bo nasọ dù sinsẹ́n yetọn.+ 31  Mẹhe họ̀ngán to whédo Juda tọn mẹ lẹ, yèdọ mẹhe pò lẹ,+ na doadọ̀do bo sẹ́n sinsẹ́n hlan aga. 32  Na pipotọ de na tọ́njẹgbonu yì sọn Jelusalẹm podọ mẹhe na luntọ́n lẹ sọn Osó Ziọni ji.+ Zohunhun Jehovah awhànpa lẹ tọn na wà ehe.+ 33  “‘Enẹwutu, nuhe Jehovah dọ gando ahọlu Asilia tọn go die:+ “Ewọ ma na biọ tòdaho ehe mẹ,+ Mọ e ma na de ogá de to finẹ Kavi yí awọ̀yinu de do pehẹ ẹ Kavi tlẹ wleawuna osla de sọta ẹ.”’+ 34  ‘Aliho he e gbọn wá wẹ e na gbọn lẹkọyi; Ewọ ma na biọ tòdaho ehe mẹ,’ wẹ Jehovah dọ. 35  ‘Yẹn na yiavùnlọna tòdaho ehe+ bo na whlẹn ẹn, na oyín ṣie wutu+ Podọ na devizọnwatọ ṣie Davidi wutu.’”+ 36  Angẹli Jehovah tọn sọ tọ́nyi bo hù sunnu 185 000 to osla Asilianu lẹ tọn mẹ. To whenue gbẹtọ lẹ fọ́n to afọnnu fuu, oṣiọ lẹ kẹdẹ wẹ yé mọ.+ 37  Enẹwutu, Ahọlu Sẹnnakelibi Asilia tọn joagọ bo lẹkọyi Nineve+ bosọ nọ nọ̀ finẹ.+ 38  Podọ dile e to didẹ́ do odò to ohọ̀* yẹwhe etọn Niṣlọki tọn mẹ, visunnu etọn titi lẹ, Adlamelẹki po Ṣalezẹli po, yí ohí do hù i+ bosọ họnyi aigba Alalati tọn ji+ to enẹgodo. Visunnu etọn Esali-hadọni+ sọ lẹzun ahọlu do otẹn etọn mẹ.

Nudọnamẹ Odò Tọn

Kavi “họ̀nmẹ.”
Kavi “mẹzunzun.”
To paa mẹ, “ko wá vidọ̀ nù.”
To paa mẹ, “ze gbigbọ de do ewọ mẹ.”
To paa mẹ, “hùn in.”
Kavi vlavo, “to ṣẹnṣẹn.”
Kavi “osinwhín Nile tọn.”
To paa mẹ, “ko basi i.”
Enẹ wẹ, Hẹzekia.
Kavi “wujẹgbonu sọn jinukun he flẹ jai lẹ mẹ.”
Kavi “tẹmpli.”