Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 36:1-22

NUHE E BẸHẸN LẸ

  • Sẹnnakelibi tọ́nawhàn Juda (1-3)

  • Labṣake lọ vlẹ Jehovah kò (4-22)

36  To owhe 14tọ Ahọlu Hẹzekia tọn mẹ, Sẹnnakelibi ahọlu Asilia+ tọn hẹji wá funawhàn sọta tòdaho gángán Juda tọn lẹpo bo yí yé.+  Enẹgodo, ahọlu Asilia tọn do Labṣake*+ lọ po awhànpa daho de po hlan sọn Lakiṣi+ nado yì Ahọlu Hẹzekia dè to Jelusalẹm. Yé sọ nọte to osinwhín osindò agawaji tọn lọ tọn kọ̀n,+ sẹpọ alihogbó he yì ogle dawe avọ̀yantọ lọ tọn mẹ.+  Whenẹnu wẹ Eliakimi+ visunnu Hilkia tọn he nọ penukundo whédo* ahọlu tọn go, Ṣẹbna+ he yin wekantọ lọ gọna Joa, kandai-basitọ lọ he yin visunnu Asafi tọn, tọ́njẹgbonu yì e dè.  Enẹwutu, Labṣake lọ dọna yé dọmọ: “Mì jaale bo dọna Hẹzekia dọ, ‘Nuhe ahọlu daho lọ, yèdọ ahọlu Asilia tọn dọ die: “Etẹ go wẹ a to adọgbo do?+  Hiẹ to didọ dọ, ‘N’yọ́n ayiha kàn bosọ tindo huhlọn nado funawhàn,’ ṣigba nùmẹ yozò poun wẹ. Mẹnu go wẹ a dejido, bọ a do gboadọ bo fọngu do ji e?+  Pọ́n! Hiẹ to jidedo alọgọ ofán winwẹ́n* ehe, yèdọ Egipti tọn go, mẹhe eyin mẹde ganjẹ e go, e na sọ́ alọpahomẹ na ẹn luntọ́n. Lehe Falo, ahọlu Egipti tọn te na mẹhe dejido e go lẹpo niyẹn.+  Podọ eyin hiẹ dọna mi dọ, ‘Jehovah Jiwheyẹwhe mítọn go wẹ mí dejido,’ be e ma yin ofi yiaga etọn lẹ po agbà etọn lẹ po wẹ Hẹzekia ko desẹ,+ bosọ dọna Juda po Jelusalẹm po dọ, ‘Agbà ehe nukọn wẹ mìwlẹ dona nọ dẹ́ do odò te ya’?”’+  Enẹwutu todin, jaale bo wá kẹ́n hẹ oklunọ ṣie ahọlu Asilia tọn:+ Yẹn na na we osọ́ 2 000 bọ mí na pọ́n eyin hiẹ na penugo nado mọ osọ́-kùntọ he pé sọha enẹ.  To whelọnu lo, nawẹ hiẹ na wagbọn do duto ayimatẹn-gán dopo ji etlẹ yin dehe whè hugan to devizọnwatọ oklunọ ṣie tọn lẹ mẹ, to whenuena e yindọ Egipti go wẹ hiẹ dejido na osọ́-kẹkẹ lẹ po osọ́nọ lẹ po? 10  Todin, be a lẹndọ yẹn hẹji wá nado và aigba ehe sudo matin aṣẹ yíyí sọn Jehovah dè wẹ ya? Jehovah lọsu wẹ dọna mi dọ, ‘Hẹji yì funawhàn hẹ aigba ehe bo và ẹ sudo.’” 11  To whenẹnu, Eliakimi, Ṣẹbna+ po Joa po dọna Labṣake+ lọ dọmọ: “Jaale, yí Alamaikigbe*+ do dọhona devizọnwatọ towe lẹ, na mí sè ogbè enẹ; a yí ogbè Ju lẹ tọn do dọhona mí blo, na mẹhe to adó lọ ji lẹ nikaa sè.”+ 12  Ṣigba, Labṣake lọ dọmọ: “Be oklunọ mìtọn po mìwlẹ kẹdẹ po wẹ oklunọ ṣie do mi hlan nado wá dọ ohó ehelẹ na ya? Be e ma yin na mẹhe sinai to adó lọ ji lẹ lọsu ga, yèdọ yé mẹhe na dù afọdai yetọn titi bosọ nù adọ́ yetọn titi po mì po lẹ wẹ ya?” 13  Todin, Labṣake lọ fọnṣite bo yí ogbè lélé do dọ to ogbè Ju lẹ tọn mẹ+ dọmọ: “Mì sè owẹ̀n ahọlu daho lọ, yèdọ ahọlu Asilia tọn.+ 14  Nuhe ahọlu lọ dọ die, ‘Mì dike Hẹzekia klọ mì blo, na ewọ ma penugo nado whlẹn mì.+ 15  Mì sọ dike Hẹzekia hẹn mì dejido Jehovah go+ blo, to whenue e dọ dọ: “E họnwun dọ Jehovah na whlẹn mí, bọ tòdaho ehe ma na yin jijodo alọ ahọlu Asilia tọn mẹ.” 16  Mì dotoaina Hẹzekia blo, na nuhe ahọlu Asilia tọn dọ die: “Mì basi jijọho hẹ mi bo jogbe poun,* na dopodopo mìtọn nido nọ dù sọn vẹntin etọn titi mẹ podọ sọn ovòtin etọn titi mẹ bosọ nọ nù osin sọn osindò etọn titi mẹ, 17  kakajẹ whenue yẹn na wá nado bẹ mì yì aigba de he taidi aigba mìtọn titi ji,+ yèdọ aigba he gọ́ na jinukun po ovẹn yọyọ po, aigba he gọ́ na akla po vẹngle lẹ po. 18  Mì dike Hẹzekia hẹn mì buali blo dọmọ, ‘Jehovah na whlẹn mí.’ Be yẹwhe akọta lẹ tọn depope ko whlẹn otò yetọn sọn alọ ahọlu Asilia tọn mẹ pọ́n ya?+ 19  Fie wẹ yẹwhe Hamati po Alpadi po tọn lẹ te?+ Fie wẹ yẹwhe Sefalivaimi tọn lẹ te?+ Podọ be yé ko whlẹn Samalia sọn alọ ṣie mẹ wẹ?+ 20  Detẹ to yẹwhe otò ehelẹ tọn lẹpo mẹ wẹ ko whlẹn otò etọn sọn alọ ṣie mẹ bọ Jehovah nado wá whlẹn Jelusalẹm sọn alọ ṣie mẹ?”’”+ 21  Ṣigba, yé gbọṣi abọẹ bo ma gblọn nudepope na ẹn, na gbedide ahọlu tọn wẹ yindọ, “Mì ma dona gblọn nudepope na ẹn.”+ 22  Amọ́, Eliakimi visunnu Hilkia tọn, he nọ penukundo whédo* ahọlu tọn go, Ṣẹbna+ he yin wekantọ lọ gọna Joa, kandai-basitọ lọ he yin visunnu Asafi tọn, lẹkọwa Hẹzekia dè po awù tintlẹ́n po to okọ̀ bo dọ nuhe Labṣake lọ ko dọ lẹ na ẹn.

Nudọnamẹ Odò Tọn

Kavi “ogán ahànjinọtọ lẹ tọn.”
Kavi “họ̀nmẹ.”
Kavi “gbigbà.”
Kavi “Silia-gbè.”
To paa mẹ, “Mì basi dona de hẹ mi bo tọ́n wá dè e.”
Kavi “họ̀nmẹ.”