Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 35:1-10

NUHE E BẸHẸN LẸ

  • Paladisi yin hinhẹngọwa (1-7)

    • Nukuntọ́nnọ na mọnú; tókunọ na sènu (5)

  • Aliho Wiwe-Yinyin tọn na mẹhe yè fligọ lẹ (8-10)

35  Danfafa po aigba-klo po na jẹaglin,+ Bọ dankló na jaya bo na gbàsẹ́ di vounvoun gbémẹ tọn.*+   Matin ayihaawe, e na gbàsẹ́;+ E na jaya bo yí ayajẹ do dawhá. Gigo Lẹbanọni tọn na yin yíyí na ẹn,+ Whanpẹ daho Kalmẹli+ po Ṣalọni+ po tọn. Yé na mọ gigo Jehovah tọn, yèdọ whanpẹ daho Jiwheyẹwhe mítọn tọn.   Mì hẹn alọ he ko gbọjọ lẹ lodo, Bosọ hẹn kligonu he to sisọsisọ lẹ sinyẹn.+   Mì dọna mẹhe yin magbọjẹnọ to ahun mẹ lẹ dọmọ: “Mì yin huhlọnnọ. Mì dibu blo. Mì pọ́n! Jiwheyẹwhe mìtọn na wá po ahọsuyiyi po, Jiwheyẹwhe na wá po ahọsumẹ po.+ Ewọ na wá bo whlẹn mì.”+   To ojlẹ enẹ mẹ, nukun nukuntọ́nnọ lẹ tọn na yin hùnhùn,+ Bọ otó tókunọ lẹ tọn na nọ sènu.+   To ojlẹ enẹ mẹ, sẹkunọ na nọ lọ́n di agbanlin,+ Bọ odẹ́ unbọpẹnnọ tọn na nọ yí ayajẹ do dawhá.+ Na osin na nọ ví jẹgbonu susugege to danfafa ji, Podọ asisa osin tọn lẹ to dankló ji.   Aigba-klo he gọ́ na yozò na lẹzun osindò he gọ́ na ofán lẹ, Podọ aigba húhú na lẹzun asisa osin tọn lẹ.+ To fihe avún gbémẹ tọn lẹ nọ gbọjẹ te lẹ,+ Ogbé-mú lẹ, ofán lẹ po ofán papilus tọn lẹ po wẹ na tin to finẹ.   Alihogbó de nasọ tin to finẹ,+ Mọwẹ, aliho de he na yin yiylọdọ Aliho Wiwe-Yinyin tọn. Mẹhe yin mawé de ma na nọ zingbejizọnlin gbọn e ji.+ Mẹhe nọ zinzọnlin gbọn aliho lọ ji lẹ kẹdẹ wẹ e na tin na; Nulunọ de ma na nọ danbú wá e ji.   Kinnikinni de ma na tin to finẹ, Mọ gbekanlin nuwledutọ de ma na wá e ji. Yé ma na yin mimọ to finẹ;+ Mẹhe ko yin fifligọ lẹ kẹdẹ wẹ na nọ zinzọnlin gbọn finẹ.+ 10  Mẹhe Jehovah ko fligọ lẹ na lẹkọwa+ bo na wá Ziọni po awhágbe ayajẹ tọn de po.+ Ayajẹ madoalọte wẹ na to ota na yé di jẹgbakun.+ Aglinjijẹ po ayajẹ po wẹ na yin yetọn, Podọ awubla po azọ̀nwinwẹn po na nọla na yé.+

Nudọnamẹ Odò Tọn

To paa mẹ, “saflọni.”