Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 34:1-17

NUHE E BẸHẸN LẸ

  • Ahọsuyi Jehovah tọn do akọta lẹ go (1-8)

  • Edomi na jẹvọ́ (9-17)

34  Akọta lẹ emi, mì sẹwá sè, Podọ mì gbẹtọ lẹ emi, mì dotoai. Na aigba po nuhe tin to e ji lẹpo po ni dotoai, Yèdọ aigba po sinsẹ́n etọn lẹpo po.   Na homẹgble Jehovah tọn tin sọta akọta lẹpo,+ Podọ adi etọn tin sọta awhànpa yetọn lẹpo.+ Ewọ na và yé sudo mlẹnmlẹn; E na jo yé nado yin hùhù.+   Omẹ yetọn he yin hùhù lẹ na yin bibẹ dlan gbonu, Bọ oṣiọ yetọn lẹ na to wánlùn sinsinyẹn;+ Ohùn yetọn na hẹn osó lẹ yọ́.*+   Awhànpa olọn tọn lẹpo wẹ na gble pete, Bọ olọn na yin hihá di owe-hihá de. Awhànpa yetọn lẹpo wẹ na hú, Dile amà húhú nọ flẹ sọn vẹntin ji Bọ ovò sinsẹ́n he ko hú de nọ flẹ sọn ovòtin ji do.   “Na ohùn na hẹn ohí ṣie yọ̀n to olọn mẹ.+ E na jẹte wá Edomi ji to whẹdida mẹ,+ Yèdọ wá akọta he yẹn ko magbe nado vasudo lọ ji.   Jehovah tindo ohí de; e na gọ́ na ohùn. E na gọ́ na ojó,+ Yèdọ ohùn agbò winyanwinyan lẹ po gbọgbọẹ lẹ po tọn, Gọna ojó he nọ nọ̀ ayi agbò lẹ tọn go. Na Jehovah tindo avọ́sinsan de to Bozla, Yèdọ husudo daho de to aigba Edomi tọn ji.+   Oyìnsú gbémẹ tọn lẹ na jẹte yì hẹ yé, Yèdọ oyìnsú winyanwinyan lẹ po huhlọnnọ lẹ po. Ohùn na hẹn aigba yetọn yọ̀n, Podọ kọ́gudu yetọn na gọ́ na ojó.”   Na Jehovah tindo azán ahọsuyi tọn de,+ Yèdọ owhe ahọsumẹ tọn de nado yíwhẹ̀ do Ziọni ji.+   Tọ̀sisa etọn* lẹ na yin didiọ zun osẹ̀n pinpẹn, Podọ kọ́gudu etọn zun whèmi, Aigba etọn nasọ wá taidi osẹ̀n pinpẹn he to miyọ́n ji. 10  E ma na yin ṣíṣí to zánmẹ kavi to okle; Azọ̀ etọn na to tìtì kakadoi. E na gbọṣi vọjijẹ mẹ sọn whẹndo de mẹ jẹ devo mẹ; Mẹdepope ma na gbọn finẹ wayi kakadoi podọ doidoi.+ 11  Tọ̀pápá-bẹ́gaa po ajinján po na yí i do basi nutindo yetọn, Ajankusu otó-gbónọ lẹ po ohọ́n lẹ po nasọ nọ nọ̀ finẹ. Ewọ na dlẹn nujlẹkàn vọjijẹ tọn do e ji Gọna okàn nujijlẹ* gbakija tọn lọ. 12  Depope to omẹ nukundeji etọn lẹ mẹ ma na yin yiylọ nado wá duahọlu, Ahọvi etọn lẹpo wẹ nasọ lẹzun mẹvọ́nu. 13  Owùntin lẹ na wú do atọ̀họ̀ gángán etọn lẹ mẹ, Yèdọ wùnkan po ogbé owùnnọ lẹ po to figángán etọn lẹ. E na lẹzun fininọ avún gbémẹ tọn lẹ tọn,+ Yèdọ nọtẹn de na ogongo lẹ. 14  Nudida danfafa ji tọn lẹ na nọ pé kanlin he nọ dawhá lẹ to finẹ, Bọ gbọgbọẹ gbémẹ tọn* na nọ ylọ ogbẹ́ etọn. Mọwẹ, ohẹ̀ he nọ tọ́n to zánmẹ na sawhé bosọ mọ gbọjẹtẹn to finẹ. 15  Finẹ wẹ odàn awuyatọ na basi adọ́ etọn do bo na nọ doazìn do, E na nọ flé yé to finẹ bo na nọ bẹ yé pli do oyẹ̀ etọn glọ. Mọwẹ, finẹ wẹ gàngàn lẹ na nọ pli do, yèdọ dopodopo yetọn po awetọ etọn po. 16  Mì dindona to owe Jehovah tọn mẹ bo hia ẹ daga: Dopo to yé mẹ ma na whèpo; Depope to yé mẹ ma na ba awetọ etọn pò, Na onù Jehovah tọn mẹ wẹ gbedide lọ tọ́n sọn, Podọ gbigbọ etọn wẹ bẹ yé pli. 17  Ewọ wẹ Mẹlọ he ko de ovò na yé, Podọ alọ etọn titi wẹ jlẹ nọtẹn he yin dide na yé.* E na yin yetọn kakadoi; Yé nasọ nọ nọ̀ e mẹ sọn whẹndo de mẹ jẹ devo mẹ.

Nudọnamẹ Odò Tọn

Kavi “na sà to osó lẹ ji.”
E họnwun dọ ehe to alọdlẹndo Bozla, he yin tatọ́-tònọ Edomi tọn.
To paa mẹ, “Gọna zannu.”
Kavi vlavo, “aovi he taidi gbọgbọẹ.”
To paa mẹ, “wẹ yí nujlẹkàn de do má ẹn na yé.”