Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 32:1-20

NUHE E BẸHẸN LẸ

  • Ahọlu po ahọvi lẹ po na dugán to dodo mẹ (1-8)

  • Avase na yọnnu vọdonanutọ lẹ (9-14)

  • Dona lẹ whenue gbigbọ yin kinkọnjẹgbonu (15-20)

32  Pọ́n! Ahọlu de+ na duahọlu to dodowiwa mẹ,+ Ahọvi lẹ nasọ dugán to whẹdida dodo mẹ.   Mẹdopodopo nasọ taidi bẹtẹn* de sọn jẹhọn nù, Yèdọ fiwhiwhlá* de sọn yujẹhọn nù, Taidi asisa osin tọn lẹ to aigba húhú de ji,+ Podọ taidi oyẹ̀ osé daho de tọn to aigba-klo de ji.   To whenẹnu, nukun mẹhe sọgan mọnú lẹ tọn ma nasọ yin súsú ba, Podọ otó mẹhe sọgan sènu lẹ tọn na nọ dotoai.   Ahun mẹhe ma nọ whesọ lẹ tọn na nọ lẹnnupọndo oyọnẹn ji, Podọ odẹ́ dẹ́kúnọ lẹ tọn na nọ dọho po dẹ́didi po to aliho he họnwun mẹ.+   Mẹhe yin gugutọ ma nasọ nọ yin yiylọdọ alọtlútọ ba, Podọ mẹhe ma tindo walọ dagbe ma na nọ yin yiylọdọ omẹ nukundeji;   Na ohó nulú tọn wẹ gugutọ na nọ dọ, E nasọ nọ kàn ayiha ylankan lẹ to ahun etọn mẹ,+ Nado nọ fọ́n atẹṣiṣi dote* podọ nado dọho jẹagọdo Jehovah, Nado nọ jo mẹhe huvẹ to hùhù* do adọ̀vọ Podọ nado nọ tẹ̀ osin mẹhe nugbla to hùhù.   Oylan wẹ ayikinkan mẹhe ma tindo walọ dagbe tọn lẹ;+ E nọ na tuli walọ he huwinyan Nado yí lalo do hù mẹhe yè to yasana sudo,+ Etlẹ yin to whenue wamọnọ to nuhe sọgbe dọ.   Ṣigba, mẹhe yin alọtlútọ nọ kàn ayiha nado tlúalọ, Bo nọ zindonukọn to nuyiwa alọtútlú* tọn lẹ mẹ.   “Mì yọnnu vọdonanutọ lẹ emi, mì fọ́n bo dotoaina ogbè ṣie! Mì viyọnnu he ma nọ kiyananu lẹ emi,+ mì na ayidonugo nuhe dọ n’te! 10  To nuhe lán vude to owhe dopo ji godo, mì mẹhe ma nọ kiyananu lẹ na sisọ, Na sinsẹ́n depope ma na ko yin bibẹpli to whenue ojlẹ jibẹwawhé ovẹn sinsẹ́n tọn na wá vivọnu.+ 11  Mì jọsi, mì yọnnu vọdonanutọ lẹ emi! Mì sisọ, mì mẹhe ma nọ kiyananu lẹ emi! Mì de avọ̀ mìtọn lẹ, Bo sìn odẹ́vọ̀ do alinkàn.+ 12  Mì zìn alọ do akọ́n bo doavigbè Na nuhe jọ do ogle dagbedagbe lẹ po vẹntin sinsẹ́nnọ lọ po go wutu. 13  Na owùn po vẹwùn lẹ po wẹ na gọ́ aigba omẹ ṣie lẹ tọn ji; Yé na ṣinyọ́n owhé he nọ gọ́ na ayajẹ dai lẹpo ji, Mọwẹ, tòdaho he nọ gọ́ na aglinjijẹ lọ.+ 14  Na atọ̀họ̀ gángán lọ ko yin jiwọn e go; Tòdaho zingidinọ lọ ko yin jijodo.+ Ofẹli+ po atọ̀họ̀-nuhihọ́ lọ tọn po ko lẹzun ofi gbọgbé tẹgbẹ tọn de, Yèdọ homẹhunnu de na kẹtẹkẹtẹ gbémẹ tọn lẹ, Podọ kanlindugbo de na kanlinpa lẹ,+ 15  Kakajẹ whenue gbigbọ na ko yin kinkọ̀n do míwlẹ ji sọn aga,+ Bọ danfafa na ko lẹzun fie gọ́ na atin dido lẹ, Bọ atin dido lọ lẹ na nọ yin pinpọnhlan di zungbo.+ 16  To whenẹnu, whẹdida dodo na tin to danfafa ji, Bọ dodowiwa na nọ nọ̀ atin dido lẹ ṣẹnṣẹn.+ 17  Ale he dodowiwa nugbo na hẹnwa wẹ jijọho,+ Podọ sinsẹ́n he dodowiwa nugbo na detọ́n wẹ vivomẹninọ po hihọ́ he na dẹn-to-aimẹ po.+ 18  Omẹ ṣie lẹ na nọ nọ̀ lẹdo jijọho tọn de mẹ, To fininọ he tindo hihọ́ lẹ podọ to gbọjẹtẹn he vò fẹẹ lẹ mẹ.+ 19  Ṣigba, kẹ́njikun na họ́ zungbo lọ liai, Bọ tòdaho lọ na yin zínzín do odò petepete. 20  Ayajẹnọ wẹ mì mẹhe nọ do jinukun do otọ̀ depope tó lẹ, Yèdọ mẹhe nọ tún oyìnsú po kẹtẹkẹtẹ po yìnte lẹ.”+

Nudọnamẹ Odò Tọn

Kavi “họta.”
Kavi “fibẹtado.”
Kavi “Nado nọ yinuwa matin sisi.”
Kavi “jo alindọn mẹhe huvẹ to hùhù tọn.”
Kavi “yẹyi.”