Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 29:1-24

NUHE E BẸHẸN LẸ

  • Dindọn na Aliẹli! (1-16)

    • Sinsẹ̀nzọn nukunta tọn (13)

  • Tókunọ na sènu; nukuntọ́nnọ na mọnú (17-24)

29  “Dindọn wẹ na Aliẹli,* yèdọ tòdaho Aliẹli he mẹ Davidi dosla do!+ Mì gbọ owhe lẹ ni to jujuwayi; Na hùnwhẹ whemẹwhemẹ tọn lẹ+ ni zindonukọn.   Ṣigba, yẹn na hẹn ayimajai wá Aliẹli ji,+ Bọ aluẹmẹninọ po avigbè po na tin to finẹ,+ E na wá taidi adò agbà Jiwheyẹwhe tọn de na mi.+   Yẹn na dosla lẹdo we pé to awà lẹpo ji nado funawhàn hẹ we, Yẹn nasọ yí opò lẹ do dó figángán de lẹdo we Bo do adó daho lẹ lẹdo we.+   Hiẹ na yin hinhẹnwa odò; Kọmẹ wẹ hiẹ na nọ dọho sọn, Bọ kọ́gudu na zọ́n bọ hodidọ towe ma na tátá. Ogbè towe na nọ yin sisè sọn kọmẹ+ Kẹdẹdi ogbè afinyọnnọ de tọn, Podọ kọ́gudu mẹ wẹ ohó towe lẹ na nọ dọnú sọn.   Agundaho kẹntọ* towe lẹ tọn na taidi nuhe yè lì pọ́dọ́pọ́dọ́,+ Agundaho kọgbidinamẹtọ lẹ tọn na taidi ofló he jẹhọn to zize yì.+ Enẹ na jọ to nukunwhiwhe kleun de mẹ, yèdọ to ajiji mẹ.+   Jehovah awhànpa lẹ tọn na na we ayidonugo nado whlẹn we Gbọn hẹviosò, aigba sisọsisọ po zingidi daho po dali, Podọ gbọn yujẹhọn, jẹhọn-ahizi po miyọ́n nuvasudotọ he to jiji de po dali.”+   To whenẹnu, agundaho akọta he to awhànfun sọta Aliẹli lọ lẹpo tọn+ —Yèdọ yé he to awhànfun sọta ẹ lẹpo, Atọ̀họ̀ he yé ko yí do dosla lẹdo e lẹ, Po mẹhe to ayimajai hẹnwa e ji lẹ po— Na wá taidi odlọ de, yèdọ numimọ zánmẹ tọn de.   Mọwẹ, e na taidi whenue mẹhe huvẹ to hùhù de kudlọ dọ emi to núdù, Ṣigba, whenue e fọ́n, huvẹ gbẹ́ to hùhù i,* Podọ e na taidi whenue mẹhe nugbla to hùhù de kudlọ dọ emi to osin nù, Ṣigba, whenue e fọ́n, nuṣikọna ẹn bọ nugbla gbẹ́ to hùhù i.* Mọ wẹ e na jọ do agundaho akọta lọ lẹpo tọn go do niyẹn He tọ́nawhàn Osó Ziọni.+   Mì jọsi, awú ni ji mì;+ Mì tọ́nnukun na mìde bo lẹzun nukuntọ́nnọ.+ Yé ko nùahànmú, ṣigba e ma yin ovẹn wẹ yé nù; Yé to sàmù, ṣigba e ma yin na ahàn sinsinyẹn wutu. 10  Na Jehovah ko kọ̀n gbigbọ amlọn yìkànmẹ tọn de do mì ji;+ E ko sú nukun mìtọn lẹ, enẹ wẹ yẹwhegán lẹ,+ Bo ko ṣinyọnnudo ota mìtọn lẹ, enẹ wẹ numọtọ lẹ.+ 11  Na mìwlẹ, numimọ lẹpo nọ taidi ohó he tin to owe he yè yí hiadonu do tlẹ́ de mẹ.+ Whenue yé ze e na mẹhe yọ́n wehia de bo dọmọ: “Jaale, hia ẹ po gbèzeyiaga po,” ewọ na dọmọ: “Yẹn ma gán hia ẹ, na yè ko yí hiadonu do tlẹ́ ẹ.” 12  Podọ whenue yé ze owe lọ na mẹhe ma yọ́n wehia de bo dọmọ: “Jaale, hia ẹ,” ewọ na dọmọ: “N’ma yọ́n wehia paali.” 13  Jehovah dọmọ: “Onù wẹ omẹ ehelẹ nọ yí do dọnsẹpọ mi Bo nọ yí nùflo yetọn lẹ do gbògbéna mi,+ Ṣigba, ahun yetọn dẹn do mi tlala; Podọ budisi he yé tindo na mi sinai do gbedide gbẹtọ tọn he ko yin pinplọn yé lẹ ji.+ 14  Enẹwutu, yẹn wẹ Mẹlọ he na wà nudabla lẹ na omẹ ehelẹ whladopo dogọ,+ Yèdọ nudabla de-to-deji; Podọ nuyọnẹn nuyọnẹntọ yetọn lẹ tọn na sudo, Bọ nukunnumọjẹnumẹ zinzintọ yetọn lẹ tọn na yin whiwhla.”+ 15  Dindọn wẹ na mẹdepope he nọ dovivẹnu nado ze tito* yetọn lẹ whlá do Jehovah.+ Fie dózin wẹ yé nọ wazọ́n yetọn lẹ te, Bo nọ to didọmọ: “Mẹnu wẹ to mimọ mí? Mẹnu wẹ yọ́n nuhe wà mí te?”+ 16  Mì pọ́n lehe mì to tasọdonanu* do! Be nukun dopolọ wẹ yè na yí do pọ́n zẹ́ndotọ po okò po ya?+ Be nuhe yin bibasi na dọ gando mẹhe basi i go dọ: “E ma yin ewọ wẹ basi mi” ya?+ Podọ be nuhe yin didá na dọ gando mẹhe dá ẹ go dọ: “Ewọ ma yọnnuin” ya?+ 17  To ojlẹ kleun de godo, Lẹbanọni na yin hinhẹn zun fie gọ́ na atin dido lẹ,+ Podọ atin dido lọ lẹ na nọ yin pinpọnhlan di zungbo.+ 18  To azán enẹ gbè, tókunọ na sè ohó he to owe lọ mẹ lẹ, Podọ nukun nukuntọ́nnọ tọn na mọnú sọn zinvlu po zinvlu gọ́ngọ́n po mẹ.+ 19  Homẹmimiọnnọ lẹ na jẹaglin tlala to Jehovah mẹ, Mẹhe yin wamọnọ to gbẹtọ lẹ ṣẹnṣẹn nasọ jaya to Omẹ Wiwe Islaeli tọn lọ mẹ.+ 20  Na kọgbidinamẹtọ ma nasọ tin ba, Awagundotọ na sudo, Podọ mẹhe nọ to dotẹnmẹ dín nado waylan domẹgo lẹ na yin vivasudo,+ 21  Yèdọ mẹhe nọ gbọn lalo dali hẹn mẹdevo lẹ zun whẹhutọ, Mẹhe nọ do omọ̀ na avùnlọyitọ* he to họngbo tòdaho lọ tọn ji,+ Bo nọ yí whẹsadokọnamẹ he ma tindo dodonu lẹ do tẹ̀ whẹdida dodo dodonọ lẹ.+ 22  Enẹwutu, nuhe Jehovah, mẹhe fli Ablaham gọ̀+ dọna whédo Jakọbu tọn die: “Jakọbu ma nasọ duwinyan ba, Podọ nukunmẹ etọn ma nasọ kúṣiọ ba.*+ 23  Na to whenue ewọ na mọ ovi etọn lẹ, Yèdọ azọ́n alọ ṣie tọn lẹ, to ṣẹnṣẹn etọn,+ Yé na klan oyín ṣie do wiwe; Mọwẹ, yé na klan Omẹ Wiwe Jakọbu tọn do wiwe, Bọ awú na ji yé gando Jiwheyẹwhe Islaeli tọn go.+ 24  Mẹhe sinyẹnta to ayiha mẹ lẹ na tindo nukunnumọjẹnumẹ, Podọ mẹhe nọ wule lẹ na kẹalọyi anademẹ.”

Nudọnamẹ Odò Tọn

Vlavo zẹẹmẹdo “Adò Agbà Jiwheyẹwhe Tọn,” ehe na ko to alọdlẹndo Jelusalẹm.
To paa mẹ, “jonọ.”
Kavi “alindọn etọn to ovọ́.”
Kavi “bọ alindọn etọn hú.”
Kavi “ayinamẹ.”
Kavi “mì gblezọn.”
To paa mẹ, “na mẹhe to wiwọhẹmẹ.”
Enẹ wẹ, na winyan po flumẹjijẹ po wutu.