Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Isaia 21:1-17

NUHE E BẸHẸN LẸ

  • Whẹdida sọta danfafa ohù tọn (1-10)

    • Nuhihọ́ sọn atọ̀họ̀-nuhihọ́ lọ tọn ji (8)

    • “Babilọni ko họ́!” (9)

  • Whẹdida sọta Duma po danfafa lọ po (11-17)

    • “Nuhọ́tọ, nawẹ ozán te?” (11)

21  Whẹdida de sọta danfafa ohù tọn:*+ E ja di jẹhọn-ahizi lẹ he nọ yìn gbọn hùwaji, Sọn danfafa ji, yèdọ sọn aigba budonamẹ tọn de ji.+   Numimọ sinsinyẹn de ko yin didohia mi: Mẹklọtọ to nuyiwa po oklọ po, Podọ mẹvasudotọ to mẹvasudo. Hẹji yì, hiẹ Elami E! Yì dosla lẹdo e, hiẹ Media E!+ Yẹn na doalọtena azọ̀nwinwẹn he hẹnwa e te lẹpo.+   Enẹwutu wẹ yẹn do tin to awufiẹsa daho mẹ.*+ Yẹn ko biọ awufiẹsa mẹ, Taidi awufiẹsa yọnnu he to viji tọn. N’tin to ayimajai mẹ sọmọ bọ n’ma gán sènu; N’biọ bẹwlu mẹ sọmọ bọ n’ma gán mọnú.   Ahun ṣie nọ gbàdo; n’nọ sisọ na obu wutu. Whèjai plẹplẹ he n’nọ yiwanna dai nọ dobuna mi todin.   Mì tẹ́ tafo bo to azinpo lẹ! Mì dù bosọ nù!+ Mì fọ́n, mì ahọvi lẹ, mì yiamisisadode* awọ̀yinu lọ!   Na nuhe Jehovah dọna mi die: “Yì bo de nuhọ́tọ de, na ewọ ni nọ na linlin nuhe e mọ lẹ tọn.”   Ewọ sọ mọ osọ́-kẹkẹ awhàn tọn de po pipli osọ́ lẹ tọn de po, Awhàn-kẹkẹ kẹtẹkẹtẹ lẹ tọn de, Awhàn-kẹkẹ kanklosọ́ lẹ tọn de. Ewọ yí sọwhiwhe do to alihọ́, yèdọ po ayidonugo daho po.   To whenẹnu, e dawhá jẹgbonu di kinnikinni de dọmọ: “Jehovah E, atọ̀họ̀-nuhihọ́ lọ tọn ji wẹ yẹn nọ ṣite te to whepoponu to okle, Yẹn sọ nọ gbọṣi hihọ́tẹn ṣie to ozán lẹpo mẹ.+   Doayi nuhe ja lọ go: Sunnu lẹ ja to osọ́-kẹkẹ awhàn tọn de mẹ gọna pipli osọ́ lẹ tọn de!”+ To whenẹnu, e dọho dọmọ: “E ko họ́! Babilọni ko họ́!+ Boṣiọ pipà yẹwhe etọn lẹ tọn lẹpo wẹ e ko gbà hányán do kọmẹ!”+ 10  Omẹ ṣie he ko yin tùntùn lẹ emi, Yèdọ mẹhe* wá sọn likun-flétẹn ṣie lẹ,+ Yẹn ko na mì linlin gando nuhe n’sè sọn Jehovah awhànpa lẹ tọn, yèdọ Jiwheyẹwhe Islaeli tọn dè lẹ go. 11  Whẹdida de sọta Duma:* Mẹde to awhádo ylọ mi sọn Seili+ dọmọ: “Nuhọ́tọ, nawẹ ozán te? Nuhọ́tọ, nawẹ ozán te?” 12  Nuhọ́tọ lọ dọmọ: “Ai to hinhọ́n, bọ ozán sọ to kúkú. Eyin mìwlẹ jlo na kàn nude biọ, mì bo kanbiọ. Mì lẹkọwa!” 13  Whẹdida de sọta danfafa lọ: Zungbo he to danfafa ji lọ mẹ wẹ mìwlẹ na dọ́, Mì ogbẹ́ gbejizọnlinzintọ Dedani tọn lẹ emi.+ 14  Mì hẹn osin wá pé mẹhe nugbla to hùhù lẹ, Mì mẹhe nọ nọ̀ aigba Tema tọn+ ji lẹ emi, Bosọ hẹn núdùdù wá na mẹhe to hinhọnyi lẹ. 15  Na yé ko họ̀n sọn ohí nù, yèdọ sọn ohí he yin dindọn sún lọ nù, Sọn ogá he yin dindlẹn lọ nù, podọ sọn awhàn sinsinyẹn nukọn. 16  Na nuhe Jehovah dọna mi die: “To owhe dopo gblamẹ, taidi owhe pakanọ de tọn lẹ,* gigo Kẹdali+ tọn lẹpo na wá vivọnu. 17  Ogádetọ vude poun wẹ na pò to awhànfuntọ Kẹdali tọn lẹ mẹ, na Jehovah Jiwheyẹwhe Islaeli tọn ko dọ ẹ.”

Nudọnamẹ Odò Tọn

Ehe na ko to alọdlẹndo agbegbe Babilọnia hohowhenu tọn.
To paa mẹ, “wẹ alìn ṣie do gọ́ na awufiẹsa.”
Kavi “sá amì do.”
To paa mẹ, “visunnu he.”
Zẹẹmẹdo “Abọẹninọ.”
Kavi “he yin hihia po sọwhiwhe po dile pakanọ de nọ wà do”; enẹ wẹ, to owhe dopo pẹpẹ godo.