Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Hosea 9:1-17

NUHE E BẸHẸN LẸ

  • Jiwheyẹwhe gbẹ́ Eflaimi dai (1-17)

    • Klandowiwe hlan yẹwhe he huwinyan (10)

9  “A jaya blo, Islaeli E,+ A yinuwa po homẹhunhun po taidi akọta lẹ blo. Na hiẹ ko danbú sọn Jiwheyẹwhe towe dè gbọn galilọ* dali.+ Hiẹ yiwanna ale galilọ tọn to likun-flétẹn lẹpo.+   Ṣigba, likun-flétẹn po ovẹn-finyọ́ndo po ma na de núdùdù tọ́n na yé, Podọ ewọ ma na tindo ovẹn yọyọ ba.+   Yé ma na zindonukọn nado nọ nọ̀ aigba Jehovah tọn ji;+ Kakatimọ, Eflaimi na lẹkọyi Egipti, Bo na nọ dù onú mawé lẹ to Asilia.+   Yé ma nasọ nọ kọ̀n ovẹn jẹgbonu taidi avọ́nunina hlan Jehovah ba;+ Avọ́sinsan yetọn lẹ ma na nọ hẹn homẹhun in.+ Yé taidi akla aluẹmẹninọ tọn; Mẹhe to dùdù i lẹpo wẹ na hẹn yede flu. Na yedetiti* kẹdẹ wẹ akla yetọn tin na; E ma na yin hinhẹnwa ohọ̀ Jehovah tọn mẹ.   Etẹwẹ mìwlẹ na wà to azán opli tọn* lọ gbè, Yèdọ to azán hùnwhẹ Jehovah tọn gbè?   Na pọ́n! yé na to dandannu glọ nado họnyi, na vasudo wutu.+ Egipti wẹ na bẹ yé pli+ bọ Mẹmfisi na diṣiọ yetọn.+ Atin owùnnọ lẹ wẹ na dugu nutindo họakuẹ fataka tọn yetọn lẹ tọn, Bọ wùnkan lẹ na wú do gòhọ yetọn lẹ mẹ.   Azán lẹnjo tọn lẹ na wá,+ Azán ahọsuyiyi tọn lẹ na wá, Bọ Islaeli na yọ́n ehe. Yẹwhegán yetọn na lẹzun nulunọ bọ mẹhe yin wuntuntunnọ na lẹzun alẹ̀nọ; Na nuṣiwa towe lẹ ko gọfla bọ yè gbẹwanna we tlala wutu.”   Nuhọ́tọ+ Eflaimi tọn tin to Jiwheyẹwhe ṣie dè dai.+ Ṣigba todin, aliho yẹwhegán etọn lẹ tọn lẹpo+ wẹ ko wá taidi omọ̀ hẹ̀hùtọ de tọn; Wangbẹnamẹ tin to ohọ̀ Jiwheyẹwhe etọn tọn mẹ.   Yé ko tlọ pete biọ nuhe nọ hẹn husudo wá lẹ mẹ taidi to azán Gibea tọn lẹ gbè.+ Ewọ na flin nuṣiwa yetọn bo na sayana yé, na ylando yetọn lẹ wutu.+ 10  “Whenue Islaeli gbẹ́ taidi ovẹn sinsẹ́n to danfafa ji wẹ yẹn mọ ẹn.+ Whenue tọgbo mìtọn lẹ taidi ovò sinsẹ́n tintan lẹ to ovòtin ji wẹ yẹn mọ yé. Ṣigba, yé wá lẹhlan Baali Peọli tọn;+ Yé klan yede do wiwe na nuhe huwinyan,*+ Bo wá lẹzun awuhiọnu taidi nuhe yé yiwanna lọ lẹ. 11  Gigo Eflaimi tọn ko zlọn yì taidi ohẹ̀ de; Vijiji masọ tin, mọ hohonọ de ma tin bọ hòmimọ masọ tin ba.+ 12  Eyin yé tlẹ mọ viji, Yẹn na hẹn yé biọ aluẹmẹ kaka bọ sunnu de ma na pò;+ Mọwẹ, dindọn wẹ na yé to whenue yẹn lẹgodo do yé!+ 13  Eflaimi, he yin dido do yìndugbo mẹ, tin taidi Tile to nukun ṣie mẹ dai;+ Todin, Eflaimi dona nọ hẹn visunnu etọn lẹ wá hùhùtẹn.” 14  Jehovah E, na yé nuhe hiẹ dona na yé; Vidọ̀ he ohò nọ to gbigble do podọ anọ́ he ma dósin* lẹ. 15  “Gilgali wẹ kanyinylan yetọn lẹpo wá aimẹ te,+ na finẹ wẹ n’gbẹwanna yé te. Yẹn na yàn yé tọ́n sọn ohọ̀ ṣie mẹ, na ylanwiwa yetọn lẹ wutu.+ Yẹn ma nasọ yiwanna yé ba;+ Ahọvi yetọn lẹpo wẹ yin tasinyẹntọ. 16  Eflaimi na yin hihò liai.+ Adọ̀ yetọn na hú bọ yé ma na de sinsẹ́n tọ́n. Eyin yé tlẹ jivi, yẹn na hù ovi yetọn he yé to bowlena lọ lẹ.” 17  Jiwheyẹwhe ṣie na gbẹ́ yé dai, Na yé ma dotoaina ẹn,+ Yé nasọ lẹzun mẹhe họ̀njẹgbé lẹ to akọta lẹ ṣẹnṣẹn.+

Nudọnamẹ Odò Tọn

Kavi “fẹnnuwiwa; walọ gblezọn.”
Kavi “alindọn yetọn titi.”
Kavi “hùnwhẹ dide mìtọn tọn.”
Kavi “na yẹwhe he huwinyan.”
Kavi “he dẹ̀.”