Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Hagai 2:1-23

NUHE E BẸHẸN LẸ

  • Tẹmpli awetọ na gọ́ na gigo (1-9)

    • Akọta lẹpo na yin whinwhàn (7)

    • Nuhọakuẹ akọta lẹ tọn na biọ ohọ̀ ehe mẹ (7)

  • Tẹmpli lọ vivọgbá hẹn dona lẹ wá (10-19)

    • Nude ma gán lẹzun wiwe domọ poun (10-14)

  • Owẹ̀n de hlan Zelubabẹli (20-23)

    • ‘Hiẹ na taidi alọkẹ hiadonugo tọn’  (23)

2  To azán 21tọ osun ṣinawetọ tọn, ohó Jehovah tọn wá gbọn yẹwhegán Hagai+ gblamẹ dọmọ,  “Jaale bo kanse Zelubabẹli+ visunnu Ṣealtiẹli tọn, yèdọ ayimatẹn-gán Juda tọn+ po Jọṣua+ visunnu Jehozadaki+ tọn he yin yẹwhenọ daho lọ po gọna mẹhe pò lẹ dọmọ:  ‘Mẹnu to mì mẹ wẹ mọ ohọ̀* ehe po gigo etọn dai tọn po?+ Nawẹ e te do to nukun mìtọn mẹ todin? Be e ma gbọnvo pete todin ya?’+  “‘Ṣigba todin, yin huhlọnnọ, hiẹ Zelubabẹli,’ wẹ Jehovah dọ, ‘podọ yin huhlọnnọ, hiẹ Jọṣua visunnu Jehozadaki tọn he yin yẹwhenọ daho lọ.’ “‘Podọ mì mẹhe nọ nọ̀ aigba lọ ji lẹpo emi, mì yin huhlọnnọ,’+ wẹ Jehovah dọ, ‘bo wazọ́n.’ “‘Na yẹn tin hẹ mì,’+ wẹ Jehovah awhànpa lẹ tọn dọ.  ‘Mì flin opà he yẹn do na mì to whenue mì tọ́n sọn Egipti+ bọ gbigbọ ṣie gbọṣi* ṣẹnṣẹn mìtọn.+ Mì dibu blo.’”+  “Na nuhe Jehovah awhànpa lẹ tọn dọ die, ‘Whladopo dogọ—to ojlẹ vude godo—yẹn nasọ whàn olọn, aigba, ohù po aigba-klo po.’+  “‘Yẹn nasọ whàn akọta lẹpo bọ nuhọakuẹ* akọta lẹpo tọn na biọ ohọ̀ ehe mẹ;+ yẹn nasọ hẹn ohọ̀ ehe gọ́ na gigo,’+ wẹ Jehovah awhànpa lẹ tọn dọ.  “‘Ṣie wẹ fataka, podọ ṣie sọ wẹ sika,’ wẹ Jehovah awhànpa lẹ tọn dọ.  “‘Gigo sọgodo tọn ohọ̀ ehe tọn na klohu dai tọn,’+ wẹ Jehovah awhànpa lẹ tọn dọ. “‘Yẹn nasọ namẹ jijọho tofi,’+ wẹ Jehovah awhànpa lẹ tọn dọ.” 10  To azán 24tọ osun ṣinẹnẹtọ tọn, to owhe awetọ Daliusi tọn mẹ, ohó Jehovah tọn wá yẹwhegán Hagai+ dè dọmọ: 11  “Nuhe Jehovah awhànpa lẹ tọn dọ die, ‘Jaale kanhose yẹwhenọ lẹ gando osẹ́n go dọmọ:+ 12  “Eyin mẹde ze olàn wiwe de do yinyẹ́n awù etọn tọn mẹ bọ awù etọn jẹ akla kavi nusọnu kavi ovẹn kavi amì kavi núdùdù wunmẹ depope go, be e na lẹzun wiwe wẹ ya?”’” Yẹwhenọ lẹ gblọn dọmọ: “Lala!” 13  Whenẹnu wẹ Hagai kanse dọmọ: “Eyin mẹde he lẹzun mawé gbọn alọdido oṣiọ* de go dali doalọ depope to onú ehelẹ mẹ go, be nulọ na lẹzun mawé wẹ ya?”+ Yẹwhenọ lẹ gblọn dọmọ: “E na lẹzun mawé.” 14  Enẹwutu, Hagai dọmọ: “‘Mọ wẹ omẹ ehelẹ te do podọ mọ wẹ akọta ehe te do to nukọn ṣie,’ wẹ Jehovah dọ, ‘mọ wẹ azọ́n alọ yetọn tọn lẹpo sọ te do; nudepope he yé yí do sanvọ́ to finẹ nọ yin mawé.’ 15  “‘Ṣigba todin, mì jaale bo ze ahun mìtọn do* ehe ji bẹsọn egbé sọyi: Whẹpo zannu de do yin zizedo devo ji to tẹmpli Jehovah tọn mẹ,+ 16  nawẹ e te do to whenẹnu? To whenue mẹde wá jinukun he yin bibẹpli dopọ kọ̀n bo to nukundo nujlẹnu 20, 10 poun wẹ e mọ; podọ to whenue mẹde wá ovẹn-dò kọ̀n nado dọ̀n nujlẹnu 50 sọn ovẹn-dò mẹ, 20 poun wẹ e mọ;+ 17  yẹn yí akúdido, azọ̀n jinukun tọn+ po kẹ́njikun po do linú mì—gọna azọ́n alọ mìtọn tọn lẹpo—ṣigba mẹdopo tata to mì mẹ ma lẹkọ do dè e,’ wẹ Jehovah dọ. 18  “‘Mì jaale bo ze ahun mìtọn do* ehe ji bẹsọn egbé sọyi, sọn azán 24tọ osun ṣinẹnẹtọ tọn gbè, yèdọ sọn azán he gbè dodonu tẹmpli Jehovah tọn yin didoai;+ mì ze ahun mìtọn do ehe ji: 19  Be okún gbẹ́ pò to agbànhọ* mẹ wẹ ya?+ Vẹntin, ovòtin, atin pomeglanate* tọn po atin olivie tọn po—yé ma ko sẹ́n sinsẹ́n, kavi e ma yin mọ wẹ? Bẹsọn egbé, dona wẹ yẹn na nọ dohlan mì.’”+ 20  Ohó Jehovah tọn wá Hagai dè whla awetọ to azán 24tọ osun lọ tọn gbè+ dọmọ: 21  “Dọna Zelubabẹli, ayimatẹn-gán Juda tọn dọ, ‘N’jlo na whàn olọn po aigba po.+ 22  N’na họ́ ofìn ahọluduta lẹ tọn bo na sukúndona huhlọn ahọluduta akọta lẹ tọn;+ n’nasọ zìn osọ́-kẹkẹ po kùnkùntọ yetọn lẹ po dai podọ osọ́ po kùnkùntọ yetọn lẹpo po na jai, dopodopo yetọn gbọn ohí nọvisunnu etọn tọn dali.’”+ 23  “‘To azán enẹ gbè,’ wẹ Jehovah awhànpa lẹ tọn dọ, ‘N’na yí we, yèdọ hiẹ devizọnwatọ ṣie Zelubabẹli+ visunnu Ṣealtiẹli+ tọn,’ wẹ Jehovah dọ, ‘yẹn na hẹn we tin taidi alọkẹ hiadonugo tọn de, na hiẹ wẹ yẹn ko de,’ wẹ Jehovah awhànpa lẹ tọn dọ.”

Nudọnamẹ Odò Tọn

Kavi “tẹmpli.”
Kavi vlavo, “gbigbọ ṣie tin to ote to.”
Kavi “onú dagbedagbe.”
Kavi “alindọn.” Pọ́n Zẹm.
Kavi “bo yí sọwhiwhe do lẹnnupọndo.”
Kavi “bo yí sọwhiwhe do lẹnnupọndo.”
Kavi “odò jinukun tọn.”
Atin-sinsẹ́n de he nọ tindo sinmẹ taidi vẹẹ bo nọ di pọmu. Pọ́n Zẹm.