Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Yẹwhehodọtọ 7:1-29

NUHE E BẸHẸN LẸ

  • Oyín dagbe po okúzán po (1-4)

  • Wọhẹ nuyọnẹntọ tọn (5-7)

  • Opodo nọ pọnte hú bẹjẹeji (8-10)

  • Ale nuyọnẹn tọn (11, 12)

  • Azán dagbe po ylankan po (13-15)

  • Dapana wazẹjlẹgo (16-22)

  • Ayidonugo yẹwhehodọtọ lọ tọn (23-29)

7  Oyín dagbe* yọ́n hú amì he họakuẹ,+ podọ okúzán pọnte hú jijizan.  E pọnte nado yì fie gbẹtọ lẹ to aluẹmẹ te hú nado yì hùnwhẹ tẹnmẹ,+ na enẹ wẹ opodo gbẹtọvi lẹpo tọn, podọ mẹhe togbẹ̀ dona hẹn ẹn do ayiha mẹ.  Awubla pọnte hú nukiko,+ na nukunmẹ yinylọ́n nọ hẹn ahun jẹgangan.+  Ahun nuyọnẹntọ tọn tin to owhé he gbè yè to aluẹmẹ te, ṣigba ahun nulunọ tọn tin to owhé ayajẹ* tọn gbè.+  E yọ́n nado dotoaina nugbẹnamẹ gbẹtọ nuyọnẹntọ de tọn+ hú nado dotoaina ohàn nulunọ lẹ tọn.  Na dile wúwú owùn he to jiji to ozẹ́n glọ lẹ tọn nọ dọnú do, mọ wẹ nukiko nulunọ tọn te do niyẹn;+ ovọ́ wẹ ehe lọsu.  Ṣigba, kọgbidinamẹ sọgan hẹn nuyọnẹntọ dàlẹ̀, podọ alọgodo-kuẹ nọ hẹn ahun flu.+  Opodo whẹho de tọn pọnte hú bẹjẹeji etọn. E sọ yọ́n hugan nado fahomẹ hú nado joawuna sakla.+  A yawu* nado gblehomẹ blo,+ na ohò nulunọ lẹ tọn mẹ wẹ homẹgble gbọṣi.*+ 10  A dọ blo dọ, “Naegbọn azán he wayi lẹ do pọnte hú azán ehelẹ?” na e ma yin nuyọnẹnnu nado kàn ehe sè.+ 11  Nudagbe wẹ e yin dọ nuyọnẹn ni zọnpọ hẹ ogú de, podọ ale de wẹ e yin na mẹhe nọ mọ hinhọ́n okle tọn lẹ.* 12  Na hihọ́ de wẹ nuyọnẹn yin,+ kẹdẹdile akuẹ yin hihọ́ de do,+ ṣigba ale oyọnẹn tọn die: Nuyọnẹn nọ whlá ogbẹ̀ mẹhe tindo e tọn.+ 13  Lẹnnupọndo azọ́n Jiwheyẹwhe nugbo lọ tọn ji, na mẹnu wẹ sọgan jlọ nuhe ewọ ko hẹn gbán?+ 14  To azán dagbe de ji, nọ do ayajẹ enẹ hia,+ ṣigba to azán kanyinylan* tọn gbè, nọ flindọ Jiwheyẹwhe ko basi tintan taidi awetọ+ sọmọ bọ gbẹtọ lẹ ma sọgan dọ* nuhe na jọ do yé go to sọgodo na taun tọn.+ 15  To gbẹzan ovọ́ tọn ṣie whenu,+ yẹn ko mọ nulẹpo—sọn dodonọ he nọ dọ̀n to dodowiwa etọn mẹ+ ji kakajẹ mẹylankan he nọ dọ́jì mahopọnna kanyinylan etọn ji.+ 16  A yin dodonọ lánkan+ kavi do dewe hia taidi nuyọnẹntọ glanglan blo.+ Naegbọn hiẹ nado hù dewe sudo?+ 17  A yin mẹylankan zẹjlẹgo blo, a sọ yin nulunọ blo.+ Naegbọn hiẹ nado kú jẹnukọnna ojlẹ towe?+ 18  Nudagbe hugan wẹ e yin nado tẹdo avase ehe lọ go bo ma jo awetọ do blo;+ na mẹhe nọ dibusi Jiwheyẹwhe na setonuna awe lẹ. 19  Nuyọnẹn nọ hẹn gbẹtọ nuyọnẹntọ yin huhlọnnọ hú sunnu hlọnhlọnnọ ao to tòdaho de mẹ.+ 20  Na gbẹtọ dodonọ de ma tin to aigba ji he nọ wà dagbe to whepoponu bo ma nọ waylando gbede.+ 21  Humọ, a dotó nuhe gbẹtọ lẹ nọ dọ lẹpo blo;+ eyin e ma yinmọ, hiẹ sọgan sè bọ devi towe na to zunzun* we; 22  na hiẹ yọnẹn ganji to ahun towe mẹ dọ whlasusu wẹ hiẹ lọsu ko zun mẹdevo lẹ.+ 23  Yẹn ko yí nuyọnẹn do tẹ́n ehe lẹpo pọ́n bo dọmọ: “Yẹn na lẹzun nuyọnẹntọ.” Ṣigba, e zẹ̀ nugopipe ṣie go. 24  Nuhe ko wá aimẹ zẹ̀ nugopipe gbẹtọ tọn go bosọ siso taun. Mẹnu wẹ sọgan mọnukunnujẹemẹ?+ 25  Yẹn wleawuna ahun ṣie nado yọnẹn bo gbeje pọ́n bosọ dindona nuyọnẹn po whẹwhinwhẹ́n he to godona nulẹ po, podọ nado mọnukunnujẹ kanyinylan wunvinọ tọn po gúgú nulunọ tọn po mẹ.+ 26  Whenẹnu wẹ yẹn mọdọ: Yọnnu he taidi odọ̀ gbéyantọ tọn bọ ahun etọn taidi odọ̀-gbó lẹ bọ alọ etọn lẹ sọ taidi gẹdẹ gànpamẹ tọn lẹ vẹadi hú okú. Mẹhe nọ hẹn homẹ Jiwheyẹwhe nugbo lọ tọn hùn na họ̀ngán sọn e si,+ ṣigba ewọ na duto ylandonọ ji.+ 27  “Pọ́n, ehe wẹ yẹn mọ,” wẹ yẹwhehodọtọ+ lọ dọ. “Yẹn dindona nudopodopo debọdo-dego nado wá tadona ṣie kọ̀n, 28  ṣigba nuhe yẹn* to dindin mapote, yẹn ma ko mọ. Yẹn mọ sunnu* dopo to fọtọ́n ji, ṣigba yẹn ma mọ yọnnu dopo to ṣẹnṣẹn yetọn. 29  Onú dopo gee ehe wẹ yẹn ko mọ: Jiwheyẹwhe nugbo lọ dá gbẹtọvi lẹ jijlọ,+ ṣigba yewlẹ ko kàn ayiha susu.”+

Nudọnamẹ Odò Tọn

To paa mẹ, “Yinkọ de.”
Kavi “aihundida.”
To paa mẹ, “yawu to gbigbọ towe mẹ.”
Kavi vlavo, “na homẹgble wẹ ohia nulunọ tọn.”
Enẹ wẹ, mẹhe togbẹ̀ lẹ.
Kavi “nugbajẹmẹji.”
Kavi “yọ́n.”
To paa mẹ, “to dẹ̀hodo.”
Kavi “alindọn ṣie.”
Kavi “sunnu jijọ dagbenọ.”