Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Yẹwhehodọtọ 10:1-20

NUHE E BẸHẸN LẸ

  • Nulú pẹvide nọ ṣinyọnyẹ nuyọnẹn ji (1)

  • Owù nugomape tọn lẹ (2-11)

  • Ninọmẹ nulunọ tọn blawu (12-15)

  • Nulú to ahọlu lẹ ṣẹnṣẹn (16-20)

    • Ohẹ̀ sọgan yì dogbè (20)

10  Dile supọ̀ kúkú lẹ nọ hẹn amì owán gblingblinnọ gble bọ e nọ lunwán do, mọ wẹ nulú pẹvide nọ ṣinyọnyẹ nuyọnẹn po gigo po ji do niyẹn.+  Ahun nuyọnẹntọ tọn nọ plan ẹn gbọn aliho jijlọ ji,* ṣigba ahun nulunọ tọn nọ plan ẹn gbọn aliho ylankan ji.*+  Fidepope he nulunọ to zọnlinzin gbọn, e nọ gbọagba lẹnpọn dagbe tọn,*+ e sọ nọ dike mẹlẹpo ni yọnẹn dọ nulunọ de wẹ ewọ.+  Eyin gandutọ de* gblehomẹ sinsinyẹn do gowe, a sẹtẹn blo,+ na abọẹninọ nọ de huhlọn pò na ylando daho lẹ.+  Nuhe nọ hẹnmẹ jẹflumẹ de tin he yẹn ko mọ to owhè glọ, yèdọ nuṣiwa wunmẹ de he nọ yin wiwà gbọn mẹhe to aṣẹpa lẹ dali:+  Nulunọ lẹ nọ yin zizedo otẹn he yiaga susu lẹ mẹ, ṣigba mẹhe jẹ* lẹ nọ gbọṣi otẹn he yìdo lẹ mẹ.  Yẹn ko mọ bọ devi lẹ to osọ́ ji, ṣigba bọ ahọvi lẹ to afọ zọ̀n taidi devi lẹ.+  Mẹhe kùn odò de sọgan jai jẹ e mẹ;+ podọ mẹhe de nùvo do adó zannu tọn de mẹ, odàn sọgan hẹ̀nadu i.  Mẹhe to zannu lẹ kùn tọ́n, zannu lẹ sọgan gbleawu i, podọ mẹhe to nake zẹ̀ sọgan tin to owù mẹ.* 10  Eyin azọ́nwanu gànyuu tọn de pò bọ yè ma gàn ẹn, e nọ hẹnmẹ zan huhlọn susu. Ṣigba, nuyọnẹn nọ gọalọ nado tindo kọdetọn dagbe. 11  Eyin odàn hẹ̀nadu mẹde whẹpo yè do hù aṣẹ na odàn lọ, ale de ma tin to e mẹ na mẹhe hù aṣẹ na ẹn lọ.* 12  Ohó he tọ́n sọn onù nuyọnẹntọ tọn mẹ nọ hẹn nukundagbe wá,+ ṣigba nùflo nulunọ tọn lẹ wẹ na hù i sudo.+ 13  Ohó tintan he tọ́n sọn onù etọn mẹ lẹ nọ yin ohó nulú tọn lẹ,+ podọ ohó godo tọn etọn lẹ yin nulú he nọ tlọ omẹ. 14  Ṣigba, nulunọ nọ to hodọ mapote.+ Gbẹtọ ma yọ́n nuhe na wá jọ; mẹnu wẹ sọgan dọ nuhe na jọ to godo etọn na ẹn?+ 15  Azọ́n sinsinyẹn nulunọ tọn nọ hẹn agbọ́ pé e, ewọ ma tlẹ yọ́n ali he e na gbọn yì tòdaho lọ mẹ. 16  Lehe e ylan na otò de dọ ahọlu etọn yin yọpọ sunnu+ bọ ahọvi etọn lẹ nọ bẹ hùnwhẹ yetọn jẹeji to afọnnu do sọ! 17  Lehe e nọ yin ayajẹnu na otò lọ do sọ dọ ahọlu etọn yin visunnu omẹ nukundeji lẹ tọn bọ ahọvi etọn lẹ sọ nọ dùnú to ojlẹ sisọ mẹ nado mọ huhlọn bọ e ma yin nado nùahànmú!+ 18  Na adidọ zẹjlẹgo wutu, ozà-tin lẹ nọ dẹ́, podọ na alọ biblá dogo wutu, ohọ̀ nọ kùn.+ 19  Akla* yin bibasi na nukiko, podọ ovẹn nado duvivi ogbẹ̀ tọn;+ ṣigba akuẹ nọ didẹ nulẹpo.+ 20  Etlẹ yin to linlẹn towe lẹ mẹ,* a zun* ahọlu blo,+ a sọ zun adọkunnọ to abò towe mẹ blo; na ohẹ̀* de sọgan yì dowẹn kavi nudida he nọ zlọn de sọgan yì dogbè.

Nudọnamẹ Odò Tọn

To paa mẹ, “nọ tin to adusilọ etọn mẹ.”
To paa mẹ, “nọ tin to amiyọnlọ etọn mẹ.”
To paa mẹ, “ahun etọn nọ gbọagba.”
To paa mẹ, “Eyin gbigbọ gandutọ de tọn; Eyin gbọfufu gandutọ de tọn.”
Kavi “penugo.”
Kavi vlavo, “dona payi.”
To paa mẹ, “na mẹhe paṣẹ do odẹ́ ji.”
Kavi “Núdùdù.”
Kavi vlavo, “to adọzan towe ji.”
Kavi “hodẹ̀do.”
Kavi “nudida he nọ zlọn to agahomẹ.”