Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 6:1-40

NUHE E BẸHẸN LẸ

  • Midiani gbidikọna Islaeli (1-10)

  • Angẹli de na jide Gideoni (11-24)

  • Gideoni họ́ agbà Baali tọn (25-32)

  • Gbigbọ Jiwheyẹwhe tọn wá Gideoni ji (33-35)

  • Tẹnpọn avọ̀ lẹngbọ-fún tọn (36-40)

6  Ṣigba, Islaelivi lẹ sọ vọ́ wà nuhe ylan to nukun Jehovah tọn mẹ,+ bọ Jehovah jo yé do alọ Midiani tọn mẹ na owhe ṣinawe.+  Midiani sọ gbidikọna Islaeli.+ Na Midiani tọn wutu, Islaelivi lẹ wleawuna fiwhiwhlá* lẹ do osó lẹ po oslò lẹ po mẹ podọ do fihe vẹawu nado yì lẹ.+  Eyin omẹ Islaeli tọn lẹ do jinukun, Midiani, Amalẹki+ po mẹhe nọ nọ̀ Whèzẹtẹn-waji lẹ+ po nọ tọ́nawhàn yé.  Yé nọ dosla lẹdo yé bo nọ hẹn sinsẹ́n aigba lọ tọn lẹ gble kaka yì Gaza bo ma nọ jo núdùdù, lẹngbọ, oyìn kavi kẹtẹkẹtẹ depope dai na Islaeli.+  Na yewlẹ po kanlin-yìnyìn yetọn lẹ po nọ hẹji wá po gòhọ yetọn lẹ po bo nọ sù di owẹ̀n lẹ,+ podọ yewlẹ po kanklosọ́ yetọn lẹ po ma tindo sọha,+ yé sọ nọ wá aigba lọ ji bo nọ hẹn nulẹpo gble.  Enẹwutu, Islaeli lẹzun hẹntọnọ klókló na Midiani tọn wutu; Islaelivi lẹ sọ dawhá ylọ Jehovah na alọgọ.+  Whenue Islaelivi lẹ dawhá ylọ Jehovah na alọgọ na Midiani tọn wutu,+  Jehovah do yẹwhegán de hlan Islaelivi lẹ bọ e dọna yé dọmọ: “Nuhe Jehovah Jiwheyẹwhe Islaeli tọn dọ die, ‘Yẹn wẹ hẹn mì jẹgbonu sọn Egipti bo gbọnmọ dali plan mì sọn kanlinmọgbenu.+  Mọ wẹ yẹn whlẹn mì sọn alọ Egipti tọn mẹ podọ sọn alọ kọgbidinamẹtọ mìtọn lẹpo tọn mẹ do bo yàn yé sẹ̀ sọn nukọn mìtọn bosọ na mì aigba yetọn.+ 10  Yẹn sọ dọna mì dọmọ: “Yẹn wẹ Jehovah Jiwheyẹwhe mìtọn.+ Mìwlẹ ma dona dibusi yẹwhe Amolinu lẹ tọn lẹ, yèdọ aigba mẹhe tọn ji mì nọ nọ̀.”+ Ṣigba, mì ma setonuna mi.’”*+ 11  To godo mẹ, angẹli Jehovah tọn wá+ bo sinai to atin daho he to Ofla lọ sá, ehe yin Joaṣi Abi-ẹzẹlinu+ lọ tọn. Visunnu etọn Gideoni+ sọ to likun flé to ovẹn-finyọ́ndo lọ mẹ nado sọgan whlá ẹ do omẹ Midiani tọn lẹ. 12  Angẹli Jehovah tọn sọawuhia ẹ bo dọmọ: “Jehovah tin hẹ we,+ hiẹ awhànfuntọ huhlọnnọ.” 13  Enẹwutu, Gideoni dọna ẹn dọmọ: “Jaale, oklunọ ṣie, amọ́ eyin Jehovah tin po mí po, naegbọn onú ehe lẹpo do jọ do mí go?+ Fie wẹ azọ́njiawu etọn lẹpo te, ehe otọ́ mítọn lẹ ko pìntàn etọn na mí+ dọ, ‘Be Jehovah ma wẹ plan mí jẹgbonu sọn Egipti?’+ Todin, Jehovah ko gbẹ́ mí dai+ bo jo mí do alọ Midiani tọn mẹ.” 14  Jehovah* pannukọn ẹn bo dọmọ: “Yì po huhlọn he a tindo po, hiẹ nasọ whlẹn Islaeli sọn alọ Midiani tọn mẹ.+ Be e ma yin yẹn wẹ do we hlan?” 15  Gideoni sọ gblọnna ẹn dọmọ: “Jaale, Jehovah. Nawẹ yẹn sọgan whlẹn Islaeli gbọn? Pọ́n! Akọ̀* ṣie wẹ yin pẹvi pete to Manasse, podọ yẹn wẹ whè hugan to owhé otọ́ ṣie tọn gbè.” 16  Ṣigba, Jehovah dọna ẹn dọmọ: “Na yẹn na tin hẹ we+ wutu, hiẹ na hù omẹ Midiani tọn lẹ taidi dọ mẹdopo wẹ.” 17  Whenẹnu, e dọna ẹn dọmọ: “Todin, eyin yẹn mọ nukundagbe to dè we, na mi ohia de dọ hiẹ wẹ mẹlọ he to hodọ hẹ mi. 18  Jaale, a yì sọn fi blo kaka yẹn nado lẹkọwa po nunina ṣie po bo na ze e donukọnna we.”+ To whenẹnu, e dọmọ: “Yẹn na gbọṣi fi kaka hiẹ nado lẹkọwa.” 19  Gideoni sọ yì whégbè bo wleawuna gbọgbọẹvu de bo yí linfin ojlẹnu efa tọn dopo* do basi akla+ madotọ́n lẹ. E bẹ olàn lọ do ohà de mẹ, bo kọ̀n olàn-sin lọ do nudàzẹ́n de mẹ; enẹgodo e hẹn yé wá e dè to atin daho lọ sá bo ze na ẹn. 20  Todin, angẹli Jiwheyẹwhe nugbo lọ tọn dọna ẹn dọmọ: “Ze olàn lọ po akla madotọ́n lọ lẹ po bo bẹ yé do osé daho he to finẹ lọ ji, bosọ kọ̀n olàn-sin lọ do finẹ.” Ewọ sọ wàmọ. 21  Enẹgodo, angẹli Jehovah tọn dlẹn bẹ́nu opò he tin to alọmẹ na ẹn tọn bọ e jẹ olàn lọ po akla madotọ́n lọ lẹ po go, miyọ́n sọ tọ́njẹgbonu sọn osé lọ mẹ bo fiọ olàn lọ po akla madotọ́n lọ lẹ po.+ Whenẹnu, angẹli Jehovah tọn lọ busẹ sọn nukọnna ẹn. 22  Todin, Gideoni mọdọ angẹli Jehovah tọn wẹ.+ To afọdopolọji, Gideoni dọmọ: “Ṣo, Oklunọ Nupojipetọ Jehovah, yẹn ko mọ angẹli Jehovah tọn nukun sọ nukun!”+ 23  Ṣigba, Jehovah dọna ẹn dọmọ: “Jijọho ni tin hlan we. A dibu blo;+ hiẹ ma na kú.” 24  Enẹwutu, Gideoni do agbà de na Jehovah to finẹ, bọ e nọ yin yiylọdọ Jehovah-ṣalomi*+ kakajẹ egbehe. E gbẹ́ pò to finẹ to Ofla Abi-ẹzẹlinu lẹ tọn. 25  To ozán enẹ mẹ, Jehovah dọna ẹn dọmọ: “Yí oyìnsú winyanwinyan otọ́ towe tọn, yèdọ oyìnsú winyanwinyan awetọ lọ he tindo owhe ṣinawe, bo họ́ agbà Baali tọn he yin otọ́ towe tọn lọ liai, bosọ sán dòtin wiwe* he tin to apá etọn lọ liai.+ 26  To whenue hiẹ na ko yí zannu tito lọ lẹ do dó agbà de na Jehovah Jiwheyẹwhe towe to aga figángán ehe tọn godo, yí oyìnsú winyanwinyan awetọ lọ do sanvọ́ taidi avọ́nunina mimẹ̀ de do atin dòtin wiwe* he hiẹ sán liai lọ tọn lẹ ji.” 27  Enẹwutu, Gideoni plan sunnu ao to devi etọn lẹ mẹ bo basi kẹdẹdile Jehovah ko dọna ẹn do. Ṣigba, na e dibuna whédo otọ́ etọn tọn po sunnu tòdaho lọ tọn lẹ po sọmọ nado basi i to okle wutu, e basi i to zánmẹ. 28  To whenue sunnu tòdaho lọ tọn lẹ fọ́n to wunkẹngbe afọnnu fuu, yé mọdọ agbà Baali tọn ko yin hihọliai bọ dòtin wiwe* he tin to apá etọn ko yin sinsánliai podọ oyìnsú winyanwinyan awetọ lọ ko yin yíyí do sanvọ́ to agbà he yin dido lọ ji. 29  Yé kanse ode awetọ dọmọ: “Mẹnu wẹ wà ehe?” Whenue yé dindona, yé dọmọ: “Gideoni visunnu Joaṣi tọn wẹ wàmọ.” 30  Enẹwutu, sunnu tòdaho lọ tọn lẹ dọna Joaṣi dọmọ: “De visunnu towe tọ́njẹgbonu na ewọ nido kú, na e ko họ́ agbà Baali tọn liai bosọ sán dòtin wiwe* he tin to apá etọn lọ liai wutu.” 31  Joaṣi+ sọ dọna mẹhe fọ́n do e ji lọ lẹpo dọmọ: “Be mìwlẹ wẹ na yiavùnlọna Baali ya? Be mìwlẹ wẹ na whlẹn ẹn ya? Mẹdepope he yiavùnlọna ẹn dona yin hùhù to afọnnu ehe.+ Eyin ewọ yin yẹwhe de, mì gbọ e ni yiavùnlọna ede,+ na mẹde ko họ́ agbà etọn liai wutu.” 32  E sọ ylọ Gideoni dọ Jelubaali* to azán enẹ gbè bo dọmọ: “Mì gbọ Baali ni yiavùnlọna ede, na mẹde ko họ́ agbà etọn liai.” 33  Midiani,+ Amalẹki+ po mẹhe nọ nọ̀ Whèzẹtẹn-waji lẹpo po sọ bẹ awhànpa yetọn lẹ pli dopọ;+ yé sọ dasá tọ̀sisa lọ yì Agbàdo Jezleẹli tọn mẹ bosọ dosla do finẹ. 34  To whenẹnu, gbigbọ Jehovah tọn wá* Gideoni+ ji bọ e kún azò,+ Abi-ẹzẹlinu lẹ+ sọ pli dopọ bo hodo e. 35  E sọ do wẹnsagun lẹ hlan aigba Manasse tọn lẹpo ji, bọ yelọsu pli dopọ bo hodo e. Humọ, e do wẹnsagun lẹ hlan aigba Aṣeli, Zebuluni po Naftali po tọn ji, bọ yé hẹji wá pé e. 36  Whenẹnu, Gideoni dọna Jiwheyẹwhe nugbo lọ dọmọ: “Eyin hiẹ na whlẹn Islaeli gbọn alọ ṣie mẹ, kẹdẹdile hiẹ ko dopagbe etọn do,+ 37  na mi ohia ehe: ‘Yẹn na jo avọ̀ lẹngbọ-fún tọn de do titẹ́ to likun-flétẹn lọ. Eyin ahun ja do avọ̀ lọ kẹdẹ ji ṣigba bọ aigba hú lẹdo e pé, whenẹnu yẹn na yọnẹn dọ hiẹ na whlẹn Islaeli gbọn alọ ṣie mẹ, kẹdẹdile hiẹ ko dopagbe etọn do.’” 38  E sọ jọ domọ. Whenue e fọ́n to wunkẹngbe afọnnu fuu bo finyọ́n avọ̀ lọ, osin he e mọ sọn avọ̀ lọ mẹ sù sọmọ bo gọ́ agbán daho de. 39  Ṣigba, Gideoni dọna Jiwheyẹwhe nugbo lọ dọmọ: “A gblehomẹ sinsinyẹn do go e blo, ṣigba dike yẹn ni vọ́ biọ whladopo dogọ poun. Jaale, gbọ yẹn ni yí avọ̀ lọ do basi tẹnpọn de whladopo dogọ poun. Jaale, gbọ avọ̀ lọ kẹdẹ ni hú, bọ ahun ni ja do aigba lọ pete ji.” 40  Jiwheyẹwhe sọ wà domọ to ozán enẹ mẹ; avọ̀ lọ kẹdẹ hú bọ ahun ja do aigba lọ pete ji.

Nudọnamẹ Odò Tọn

Kavi vlavo, “agbànhọ whiwhla.”
To paa mẹ, “mì ma dotoaina ogbè ṣie.”
“Angẹli Jehovah tọn,” Septante.
To paa mẹ, “Pipli omẹ fọtọ́n tọn.”
Nudi L 22. Pọ́n Nud. B14.
Zẹẹmẹdo “Jehovah Wẹ Jijọho.”
Pọ́n Zẹm.
Pọ́n Zẹm.
Pọ́n Zẹm.
Pọ́n Zẹm.
Zẹẹmẹdo “Gbọ Baali Ni Yiavùnlọ (Hoavùn).”
To paa mẹ, “ṣinyọ́n.”