Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 3:1-31

NUHE E BẸHẸN LẸ

  • Jehovah whlé Islaeli pọ́n (1-6)

  • Otniẹli, whẹdatọ tintan (7-11)

  • Whẹdatọ Ehudi hù Ahọlu Eglọni (12-30)

  • Whẹdatọ Ṣamgali (31)

3  Ehelẹ wẹ akọta he Jehovah dike bọ yé gbọṣi finẹ, na yé nido tẹ́n omẹ Islaeli tọn he ma ko tindo numimọ awhànfunfun hẹ Kenaninu lẹ tọn lẹpo pọ́n+  (ehe yinmọ na whẹndo Islaelivi lẹ tọn he bọdego lẹ nido tindo numimọ awhàn tọn, yèdọ mẹhe ma ko tindo numimọ mọnkọtọn pọ́n lẹ):  akọta lọ lẹ wẹ, ogán atọ́n Filistinu+ lẹ tọn lẹ, gọna Kenaninu lẹpo, Sidoninu+ lẹ po Hivinu+ he nọ nọ̀ lẹdo Osó Lẹbanọni tọn+ mẹ lẹ po sọn Osó Baali-hẹlmọni kọ̀n kaka yì Lebo-hamati.*+  Yé yinuwa taidi nuyizan lẹ nado tẹ́n omẹ Islaeli tọn lẹ pọ́n nado yọnẹn eyin Islaeli na setonuna gbedide Jehovah tọn lẹ he e ko na otọ́ yetọn lẹ gbọn Mose gblamẹ.+  Enẹwutu, Islaelivi lẹ nọ nọ̀ Kenaninu+ lẹ, Hetinu lẹ, Amolinu lẹ, Pelizinu lẹ, Hivinu lẹ po Jẹbusinu lẹ po ṣẹnṣẹn.  Yé sọ nọ dà viyọnnu yetọn lẹ taidi asi bo nọ na viyọnnu yetọn titi lẹ hlan visunnu yetọn lẹ bosọ jẹ yẹwhe yetọn lẹ sẹ̀n ji.+  Islaelivi lẹ sọ wà nuhe ylan to nukun Jehovah tọn mẹ bo wọnji Jehovah Jiwheyẹwhe yetọn go bosọ jẹ Baali lẹ+ po dòtin wiwe* lẹ po sẹ̀n ji.+  Enẹwutu, Jehovah gblehomẹ sinsinyẹn do Islaeli go bo sà yé do alọ Kuṣani-liṣataimi ahọlu Mẹsopotamia* tọn mẹ. Islaelivi lẹ sọ yin mẹmẹglọ na Kuṣani-liṣataimi na owhe ṣinatọ̀n.  Whenue Islaelivi lẹ dawhá ylọ Jehovah na alọgọ,+ Jehovah de mẹwhlẹngántọ de nado whlẹn Islaelivi lẹ,+ yèdọ Otniẹli+ visunnu Kenazi he yin nọvisunnu pẹvi Kalẹbi tọn. 10  Gbigbọ Jehovah tọn wá e ji,+ bọ e lẹzun whẹdatọ Islaeli tọn. To whenuena e tọ́nyi nado funawhàn, Jehovah jo Kuṣani-liṣataimi ahọlu Mẹsopotamia* tọn do alọ etọn mẹ bọ e duto Kuṣani-liṣataimi ji. 11  Enẹgodo, aigba lọ vò* na owhe 40. To godo mẹ, Otniẹli visunnu Kenazi tọn kú. 12  Islaelivi lẹ sọ jẹ nuhe ylan to nukun Jehovah tọn mẹ wà ji whladopo dogọ.+ Enẹwutu, Jehovah dike bọ Eglọni ahọlu Moabi tọn+ duto Islaeli ji, na yé ko wà nuhe ylan to nukun Jehovah tọn mẹ wutu. 13  Humọ, ewọ bẹ Amọninu+ lẹ po Amalẹkinu+ lẹ po pli sọta yé. Yé sọ tọ́nawhàn Islaeli bo yí tòdaho odétin lẹ tọn.+ 14  Islaelivi lẹ sọ yin mẹmẹglọ na Eglọni ahọlu Moabi tọn na owhe 18.+ 15  Enẹgodo, Islaelivi lẹ dawhá ylọ Jehovah na alọgọ+ bọ Jehovah de mẹwhlẹngántọ de+ na yé, yèdọ Ehudi+ visunnu Gela tọn, he yin Bẹnjamininu+ amiyọnnọ+ de. To nukọn mẹ, Islaelivi lẹ gbọn ewọ gblamẹ do nunina* lẹ hlan Eglọni ahọlu Moabi tọn. 16  To ojlẹ enẹ mẹ, Ehudi basi ohí onù awenọ de na ede, he dite na awagbà* dopo, ewọ sọ sìn in do asapada adusi tọn etọn go to awù etọn glọ. 17  Enẹgodo, e hẹn nunina lọ lẹ yì na Eglọni ahọlu Moabi tọn. Nalete, omẹ kiklo tlala de wẹ Eglọni yin. 18  Whenue Ehudi ko bẹ nunina lọ lẹ jo godo, e do mẹhe hẹn nunina lọ lẹ wá lẹ hlan. 19  Ṣigba, whenue yé jẹ boṣiọ pipà lẹ kọ̀n* to Gilgali,+ ewọ lọsu lẹkọ bo dọmọ: “Ahọlu E, yẹn tindo owẹ̀n aṣli tọn de na we.” Enẹwutu, ahọlu lọ dọmọ: “Mì nabọẹ!” Whenẹnu, devizọnwatọ etọn lẹpo tọ́nyi sọn e dè. 20  Ehudi sọ wá e dè dile e to aisinsin ewọ kẹdẹ to ohọ̀ fifá aga tọn etọn mẹ. Todin, Ehudi dọmọ: “Yẹn tindo owẹ̀n de na we sọn Jiwheyẹwhe dè.” Enẹwutu, e fọ́n sọn ofìn* etọn ji. 21  Enẹgodo, Ehudi yí amiyọnlọ etọn do dọ̀n ohí lọ sún sọn asapada adusi tọn etọn go bo ylọn ẹn do adọ̀mẹ na ẹn. 22  Akún ohí lọ tọn biọ e mẹ hodo onù lọ bọ ojó ṣinyọ́n onù ohí lọ tọn, na e ma dọ̀n ohí lọ tọ́n sọn adọ̀mẹ na ẹn, omí sọ tọ́njẹgbonu. 23  Ehudi tọ́nyi gbọn awánu ohọ̀ lọ tọn,* bo sú ohọ̀n ohọ̀ aga tọn lọ tọn lẹ bosọ dogàn yé ji. 24  To whenue e ko tọ́nyi godo, devizọnwatọ lọ lẹ lẹkọwa bo mọdọ yè dogàn ohọ̀n ohọ̀ aga tọn lọ tọn lẹ ji. Enẹwutu, yé dọmọ: “Afọdai* wẹ e na ko te to abò fifá lọ mẹ.” 25  Yé sọ nọte kaka bọ winyan hù yé, ṣigba whenue yé mọdọ e ma to ohọ̀n ohọ̀ aga tọn lọ tọn lẹ hùn janwẹ, yé ze họnhungan lọ bo hùn yé, bosọ mọdọ oklunọ yetọn ko kú do kọmẹ!* 26  Ehudi họnyi to whenue yé to gbàndọn bo gbọn boṣiọ pipà lọ lẹ kọ̀n*+ yì Seila. 27  Whenue e jẹ finẹ, e kún azò+ to lẹdo osó tọn Eflaimi tọn mẹ;+ Islaelivi lẹ sọ jẹte hodo e sọn lẹdo osó tọn lọ mẹ bọ ewọ tin to nukọnna yé. 28  Whenẹnu, e dọna yé dọmọ: “Mì hodo mi, na Jehovah ko jo kẹntọ mìtọn lẹ, yèdọ Moabinu lẹ, do alọ mìtọn mẹ.” Enẹwutu, yé hodo e bo gbòalina Moabinu lẹ to fie tọ̀sisa Jọdani ma siso te lẹ, yé masọ dike mẹdepope ni wayi. 29  To ojlẹ enẹ mẹ, yé hù nudi Moabinu 10 000,+ he yemẹpo yin sunnu he tọ́nalùn bo yin adọgbotọ lẹ; mẹdopo tata ma họ̀ngán.+ 30  Gbọnmọ dali, Moabi yin hinhẹn zun mẹmẹglọ to alọ omẹ Islaeli tọn lẹ tọn mẹ to azán enẹ gbè; aigba lọ sọ vò* na owhe 80.+ 31  Mẹhe bọdo ewọ go wẹ Ṣamgali+ visunnu Anati tọn, he yí opò tlọ́ntlọ́n+ he yè nọ yí do deanana oyìn lẹ do hù sunnu Filistinu 600;+ ewọ lọsu whlẹn Islaeli ga.

Nudọnamẹ Odò Tọn

Kavi “họntonu Hamati tọn.”
Pọ́n Zẹm.
To paa mẹ, “Alami-nahalaimi.”
To paa mẹ, “Alami.”
Kavi “tindo jijọho.”
“Nunina” ehelẹ yin takuẹ wunmẹ de he yé dona nọ sú.
Vlavo awagbà pẹvi de he nọtena nudi cm 38. Pọ́n Nud. B14.
Kavi vlavo, “jẹ osé-kùntẹn lẹ.”
Kavi “azinpo.”
Kavi vlavo, “gbọn fie jẹhọn nọ gbọn biọ họmẹ.”
To paa mẹ, “Nuṣinyọndo afọ etọn lẹ.”
To paa mẹ, “aigba.”
Kavi vlavo, “gbọn osé-kùntẹn lọ lẹ.”
Kavi “tindo jijọho.”