Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 20:1-48

NUHE E BẸHẸN LẸ

  • Awhàn sọta Bẹnjamininu lẹ (1-48)

20  Enẹwutu, Islaelivi lẹpo tọ́n wá, sọn Dani+ kaka yì Beẹli-ṣeba podọ sọn aigba Giliadi tọn ji+ bo bẹ yedelẹ pli dopọ to kọndopọ mẹ* to Jehovah nukọn to Mizpa.+  Whenẹnu, mẹhe yin ogán to gbẹtọ lọ lẹ ṣẹnṣẹn lẹ po hẹnnu Islaeli tọn lẹpo po ṣite to agun omẹ Jiwheyẹwhe tọn lẹ tọn mẹ—yèdọ awhànfuntọ 400 000 he nọ zọ̀n afọ bo nọ hẹn ohí lẹ.+  Bẹnjamininu lẹ sè dọ sunnu Islaeli tọn lẹ ko hẹji yì Mizpa. Whenẹnu, sunnu Islaeli tọn lẹ dọmọ: “Mì dọna mí, nawẹ nuylankan ehe wagbọn do jọ?”+  Enẹwutu, dawe Levinu lọ,+ yèdọ asu yọnnu he yin hùhù lọ tọn, gblọn dọmọ: “Yẹn po asimọwhlá ṣie po wẹ jẹ Gibea+ he yin Bẹnjamini tọn nado dọ́ finẹ.  Omẹ* Gibea tọn lẹ sọ fọ́n do ji e bo lẹdo owhé he gbè yẹn te to zánmẹ. Yẹn wẹ yé to linlẹn nado hù, ṣigba asimọwhlá ṣie wẹ yé wá zanhẹ gánnugánnu bọ e kú to godo mẹ.+  Whenẹnu, yẹn ze oṣiọ asimọwhlá ṣie tọn bo já ẹ bosọ do yé hlan aigba he Islaeli dugu etọn lẹpo ji,+ na walọ gblezọn he huwinyan he yé zan to Islaeli wutu.  Todin, mì omẹ Islaeli tọn lẹpo emi, mì kẹnù dego bo na ayinamẹ+ mìtọn tofi.”  Whenẹnu, gbẹtọ lọ lẹpo fọ́n bo kọngbedopọ* bosọ dọmọ: “Depope to mí mẹ ma na yì gòhọ etọn mẹ kavi lẹkọyi owhé etọn gbè.  Todin, nuhe mí dona wà na Gibea die: Mì ni de ovò bo hẹji yì nado tọ́nawhàn ẹn.+ 10  To hẹnnu Islaeli tọn lẹpo mẹ, mí na de sunnu 10 sọn omẹ 100 mẹ, sunnu 100 sọn omẹ 1 000 mẹ, podọ sunnu 1 000 sọn omẹ 10 000 mẹ, na yé nido bẹ núdùdù pli na awhànfuntọ lọ lẹ, bọ yé nado tọ́nawhàn Gibea he yin Bẹnjamini tọn, na nuhe huwinyan he yé wà to Islaeli wutu.” 11  Gbọnmọ dali, sunnu Islaeli tọn lẹpo yin bibẹpli bo kọngbedopọ* nado tọ́nawhàn tòdaho lọ taidi awhànfun-gbẹ́ de. 12  Whenẹnu, hẹnnu Islaeli tọn lẹ do sunnu lẹ hlan mẹhe tin to hẹnnu Bẹnjamini tọn mẹ lẹpo dè bo dọmọ: “Nuylankan tẹ die he ko yin wiwà to ṣẹnṣẹn mìtọn? 13  Todin, mì de sunnu nuvọ́nọ he tin to Gibea lọ lẹ+ tọ́n, na mí nido hù yé bo de oylan lọ sẹ̀ sọn Islaeli.”+ Ṣigba, Bẹnjamininu lẹ ma dotoaina nọvisunnu yetọn Islaelivi lẹ. 14  Whenẹnu, Bẹnjamininu lẹ bẹ yedelẹ pli dopọ sọn tòdaho Gibea tọn lẹ mẹ nado tọ́nyi bo funawhàn hẹ sunnu Islaeli tọn lẹ. 15  To gbenẹgbe, Bẹnjamininu lẹ bẹ sunnu 26 000 he nọ hẹn ohí lẹ pli sọn tòdaho yetọn lẹ mẹ, gbọnvona sunnu ṣinṣinyan 700 Gibea tọn lẹ. 16  Sunnu ṣinṣinyan 700 he yin amiyọnnọ wẹ tin to awhànpa ehe mẹ. Alọ dopodopo sunnu ehelẹ tọn jlọ sọmọ bọ yé sọgan yí akòtopẹ́ do dlan zannu do nude bọ e ma na zẹ̀ na ẹn sọ oda kún dopo tata. 17  Omẹ Islaeli tọn lẹ bẹ sunnu 400 000 he nọ hẹn ohí lẹ+ pli gbọnvona omẹ Bẹnjamini tọn lẹ, bọ dopodopo yetọn yin awhànfuntọ numimọnọ. 18  Yé fọ́n bo hẹji yì Bẹtẹli nado dindona sọn Jiwheyẹwhe dè.+ Whenẹnu, omẹ Islaeli tọn lẹ dọmọ: “Mẹnu to mí mẹ wẹ na yin nukọntọ nado funawhàn hẹ Bẹnjamininu lẹ?” Jehovah sọ gblọn dọmọ: “Juda wẹ na yin nukọntọ.” 19  Enẹgodo, Islaelivi lẹ fọ́n to afọnnu bo dosla nado tọ́nawhàn Gibea. 20  Todin, sunnu Islaeli tọn lẹ tọ́nyi nado funawhàn hẹ Bẹnjamini; yé to yede kannukannu nado pehẹ yé to Gibea. 21  Bẹnjamininu lẹ sọ tọ́njẹgbonu sọn Gibea bo hù sunnu Islaeli tọn 22 000 to gbenẹgbe. 22  Ṣigba, awhànpa Islaeli tọn do adọgbigbo hia bosọ vọ́ to yede kannukannu to fidopo lọ taidi to azán tintan gbè. 23  Whenẹnu, Islaelivi lẹ hẹji yì bo viavi to Jehovah nukọn kakajẹ whèjai bosọ kanhose Jehovah dọmọ: “Be mì nisọ vọ́ yì funawhàn hẹ nọvisunnu mítọn, yèdọ omẹ Bẹnjamini tọn lẹ wẹ?”+ Jehovah sọ dọmọ: “Mì hẹji yì bo funawhàn hẹ yé.” 24  Enẹwutu, Islaelivi lẹ yì fie sẹpọ Bẹnjamininu lẹ to azán awetọ gbè. 25  Ṣigba, omẹ Bẹnjamini tọn lẹ tọ́njẹgbonu sọn Gibea nado pé yé to azán awetọ gbè bosọ vọ́ hù sunnu 18 000 devo lẹ sọn Islaelivi lẹ mẹ,+ podọ sunnu ehe lẹpo wẹ nọ hẹn ohí. 26  Whenẹnu, sunnu Islaeli tọn lẹpo hẹji yì Bẹtẹli. Yé sinai do finẹ to Jehovah nukọn+ bo viavi bosọ blanù+ to azán enẹ gbè kakajẹ whèjai bo basi avọ́nunina mimẹ̀+ lẹ po avọ́nunina jijọho tọn+ lẹ po to Jehovah nukọn. 27  Enẹgodo, sunnu Islaeli tọn lẹ kanhose Jehovah,+ na finẹ wẹ apotin alẹnu Jiwheyẹwhe nugbo lọ tọn te to ojlẹ enẹ mẹ. 28  Todin, Finehasi+ visunnu Eleazali, visunnu Aalọn tọn wẹ nọ wadevizọn* to apotin lọ nukọn to ojlẹ enẹ mẹ. Yé sọ kanse dọmọ: “Be mí ni tọ́nyi nado vọ́ awhànfun hẹ nọvisunnu mítọn, yèdọ sunnu Bẹnjamini tọn lẹ wẹ, kavi mí ni gbọ?”+ Jehovah sọ gblọn dọmọ: “Mì hẹji yì, na yẹn na jo yé do alọ mìtọn mẹ to osọ.” 29  Enẹgodo, omẹ Islaeli tọn lẹ de sunnu lẹ nado tọ̀pọwu+ lẹdo Gibea. 30  Islaelivi lẹ hẹji yì nado tọ́nawhàn Bẹnjamininu lẹ to azán atọ̀ntọ gbè bo sọawhànnu nado tọ́nawhàn Gibea kẹdẹdile yé ko wà do to ojlẹ he wayi lẹ mẹ.+ 31  Whenue Bẹnjamininu lẹ tọ́n nado pé awhànpa lọ, yé yin dindọn yì fie dẹn do tòdaho lọ.+ Whenẹnu, kẹdẹdile yé ko wà do to ojlẹ he wayi lẹ mẹ, yé jẹ avùnho hẹ sunnu lọ lẹ ji bo hù delẹ to yé mẹ to alihogbó lẹ ji, yèdọ to ali he hẹji yì Bẹtẹli po dehe yì Gibea po ji, bọ nudi sunnu Islaeli tọn 30 wẹ yin hùhù to danji.+ 32  Enẹwutu, Bẹnjamininu lẹ dọmọ: “Awhàn yetọn gbà wẹ mí te taidi tintan whenu tọn.”+ Ṣigba, Islaelivi lẹ dọmọ: “Mì gbọ mí ni họ̀n, na mí nido dọ̀n yé yì alihogbó lẹ ji, yì fie dẹn do tòdaho lọ.” 33  Sunnu Islaeli tọn lẹpo sọ fọ́n sọn otẹn yetọn lẹ mẹ bo sọawhànnu nado funawhàn to Baali-tamali, to whenue Islaelivi he tọ̀pọwu lọ lẹ to wiwọ̀ tọ́njẹgbonu sọn otẹn yetọn lẹ mẹ to lẹdo Gibea tọn mẹ. 34  Gbọnmọ dali, sunnu ṣinṣinyan 10 000 sọn omẹ Islaeli tọn lẹpo mẹ wẹ wá lẹdo he pannukọn Gibea mẹ, awhàn lọ sọ sinyẹn taun. Ṣigba, Bẹnjamininu lẹ ma yọnẹn dọ nugbajẹmẹji wẹ to tepọn yé to madẹnmẹ. 35  Jehovah hẹn Bẹnjamini ṣíawhàn+ to Islaeli nukọn, bọ Islaelivi lẹ hù sunnu 25 100 sọn omẹ Bẹnjamini tọn lẹ mẹ to gbenẹgbe, podọ omẹ ehe lẹpo wẹ nọ hẹn ohí.+ 36  Ṣigba, to whenue sunnu Islaeli tọn lẹ to agọjoyigodo sọn Bẹnjamininu lẹ nukọn+ na yé dejido mẹhe yé ko de nado tọ̀pọwuna Gibea+ lẹ go wutu, Bẹnjamininu lẹ lẹndọ emi na gbawhàn yetọn. 37  Mẹhe tọ̀pọwu lọ lẹ yawu yinuwa bo tọ́n jẹ omẹ Gibea tọn lẹ ji. Enẹgodo, mẹhe tọ̀pọwu lọ lẹ gbàpe gbọn tòdaho lọ mẹ bo yí ohí do hù mẹhe to e mẹ lẹpo. 38  Sunnu Islaeli tọn lẹ ko kọngbedopọ dai hẹ mẹhe tọ̀pọwuna tòdaho lọ lẹ dọ yé ni hẹn azọ̀ tì sọn e mẹ taidi ohia de. 39  To whenue Islaelivi lẹ yinuwa taidi dọ yé to agọjoyigodo wẹ nkọ, sunnu Bẹnjamini tọn lẹ jẹ avùnho hẹ sunnu Islaeli tọn lẹ ji bo hù nudi sunnu 30 to yé mẹ,+ bosọ dọmọ: “E họnwun dọ awhàn yetọn gbà wẹ mí te taidi tintan whenu tọn.”+ 40  Ṣigba, azọ̀ titli de jẹ tìtì ji sọn tòdaho lọ mẹ taidi ohia de. To whenue sunnu Bẹnjamini tọn lẹ lẹkọ pọ́n godo, yé mọdọ tòdaho lọ pete to azọ̀ tì hlan olọn. 41  Whenẹnu, sunnu Islaeli tọn lẹ lilẹ́ pannukọn yé, bọ sunnu Bẹnjamini tọn lẹ biọ bẹwlu mẹ na yé mọdọ nugbajẹmẹji ko wá yé ji. 42  Enẹwutu, yé họ̀n sọn sunnu Islaeli tọn lẹ nukọn dedo danfafa ji, ṣigba awhànfuntọ lọ lẹ jẹgodona yé; sunnu he to tintọ́n sọn tòdaho lọ lẹ mẹ lẹ sọ wá gọna mẹhe pò lẹ bo jẹ yé hù ji. 43  Yé lẹdo Bẹnjamininu lẹ bo dómọna yé klinkán-klinkán. Yé tùnafọ yé ji to lẹdo lọ he pannukọn Gibea tlọlọ mẹ to whèzẹtẹn-waji. 44  To godo mẹ, sunnu Bẹnjamini tọn 18 000 wẹ kú, podọ omẹ ehe lẹpo wẹ yin awhànfuntọ huhlọnnọ lẹ.+ 45  Sunnu Bẹnjamini tọn lẹ lẹkọ bo họnyi danfafa ji yì osé Limọni+ kọ̀n, bọ Islaelivi lẹ hù* sunnu 5 000 sọn yé mẹ to alihogbó lẹ ji bosọ jẹgodona yé kaka yì Gidọmi; yé gbọnmọ dali hù sunnu 2 000 dogọ sọn yé mẹ. 46  Sọha omẹ Bẹnjamini tọn he kú to gbenẹgbe lẹpo tọn yin 25 000, yèdọ sunnu he nọ hẹn ohí+ bọ yemẹpo yin awhànfuntọ huhlọnnọ lẹ. 47  Ṣigba, sunnu 600 họnyi danfafa ji, yì osé Limọni kọ̀n bosọ gbọṣi osé Limọni ji na osun ẹnẹ. 48  Sunnu Islaeli tọn lẹ sọ lẹkọ bo tọ́nawhàn Bẹnjamininu lẹ bosọ yí ohí do hù mẹhe to tòdaho lọ mẹ lẹ, yèdọ gbẹtọ po kanlin-yìnyìn lẹ po, enẹ wẹ nuhe pò lẹpo. Humọ, tòdaho he yé mọ to ali yetọn ji lẹpo wẹ yé domiyọ́n.

Nudọnamẹ Odò Tọn

To paa mẹ, “taidi mẹdopo.”
Kavi vlavo, “Aigbanọ.”
To paa mẹ, “taidi mẹdopo.”
To paa mẹ, “taidi mẹdopo.”
To paa mẹ, “nọ ṣite.”
To paa mẹ, “yé wé wélu.”