Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 2:1-23

NUHE E BẸHẸN LẸ

  • Avase sọn angẹli Jehovah tọn dè (1-5)

  • Jọṣua kú (6-10)

  • Yè de whẹdatọ lẹ nado whlẹn Islaeli (11-23)

2  Enẹgodo, angẹli Jehovah tọn+ hẹji sọn Gilgali+ yì Bokimi bo dọmọ: “Yẹn plan mì jẹgbonu sọn Egipti wá aigba he yẹn ko whlé na tọgbo mìtọn lẹ+ ji. Humọ yẹn dọ dọ, ‘Yẹn ma na gbà alẹnu he yẹn basi hẹ mì gbede.+  Na mìwlẹ tọn, mì ma dona basi alẹnu hẹ mẹhe nọ nọ̀ aigba ehe ji lẹ+ podọ mì dona họ́ agbà yetọn lẹ liai.’+ Ṣigba, mìwlẹ ma setonuna ogbè ṣie.+ Naegbọn mì do wàmọ?  Enẹwutu wẹ yẹnlọsu do dọ dọ, ‘Yẹn ma na yàn yé sẹ̀ sọn nukọn mìtọn,+ podọ yé na do omọ̀ na mì,+ bọ yẹwhe yetọn lẹ na doyẹklọ mì.’”+  To whenue angẹli Jehovah tọn dọ ohó ehelẹ na Islaelivi lẹpo, gbẹtọ lọ lẹ jẹ avivi ji po ogbè lélé po.  Enẹwutu, yé ylọ finẹ dọ Bokimi,* yé sọ sanvọ́ hlan Jehovah to finẹ.  To whenue Jọṣua do gbẹtọ lọ lẹ hlan, dopodopo Islaelivi lẹ tọn wleali yì ogú yetọn kọ̀n nado yí aigba lọ.+  Gbẹtọ lọ lẹ zindonukọn nado to Jehovah sẹ̀n to azán Jọṣua tọn lẹpo gbè podọ to azán mẹho he zindonukọn nado to gbẹnọ to Jọṣua godo bo ko mọ azọ́njiawu he Jehovah wà na Islaeli lẹpo+ tọn whenu.  Enẹgodo, Jọṣua visunnu Nuni tọn, yèdọ devizọnwatọ Jehovah tọn lọ kú to whenue e tindo owhe 110.+  Yé sọ dì i do aigba he yin ogú etọn lọ ji to Timnati-helẹsi,*+ ehe tin to lẹdo osó tọn Eflaimi tọn mẹ, to agewaji Osó Gaaṣi tọn.+ 10  Whẹndo enẹ pete yin dìdì taidi tọgbo yetọn lẹ* bọ whẹndo devo fọ́n to godo yetọn he ma yọ́n Jehovah kavi nuhe e ko wà na Islaeli. 11  Islaelivi lẹ sọ wà nuhe ylan to nukun Jehovah tọn mẹ lẹ bo sẹ̀n Baali lẹ.+ 12  Gbọnmọ dali, yé jo Jehovah Jiwheyẹwhe otọ́ yetọn lẹ tọn he ko plan yé jẹgbonu sọn aigba Egipti tọn ji do.+ Yé sọ hodo yẹwhe devo lẹ, yèdọ yẹwhe mẹhe lẹdo yé pé lẹ tọn lẹ+ bo dẹ́ do odò na yé bosọ hẹn homẹgble Jehovah.+ 13  Yé jo Jehovah do bo sẹ̀n Baali po boṣiọ Aṣitolẹti tọn lẹ po.+ 14  Enẹwutu, Jehovah gblehomẹ sinsinyẹn do Islaeli go bo jo yé do alọ mẹhe na bẹ nutindo yetọn lẹ yì lẹ tọn mẹ bọ yé bẹ nutindo yetọn lẹ yì.+ Ewọ sọ sà yé do alọ kẹntọ he lẹdo yé pé lẹ tọn mẹ+ bọ yé masọ penugo nado nọte to kẹntọ yetọn lẹ nukọn ba.+ 15  Fidepope he yé tọ́nyi, alọ Jehovah tọn nọ tin sọta yé, bo nọ hẹn nugbajẹmẹji wá yé ji,+ kẹdẹdile Jehovah ko dọ do podọ kẹdẹdile Jehovah ko whlé na yé do,+ yé sọ wá mọ yede to ayimajai sinsinyẹn mẹ.+ 16  Enẹwutu, Jehovah nọ de whẹdatọ lẹ he nọ whlẹn yé sọn alọ mẹhe to nutindo yetọn bẹ yì lẹ tọn mẹ.+ 17  Ṣigba, yé gbẹ́ nado dotoaina whẹdatọ lẹ lọsu bo nọ lọga hẹ yẹwhe devo lẹ bosọ nọ dẹ́ do odò na yé. Bleun wẹ yé lẹhlan apadopo sọn aliho he ji tọgbo yetọn he setonuna gbedide Jehovah tọn lẹ ko zinzọnlin gbọn.+ Yé ma yinuwa di tọgbo yetọn lẹ. 18  Whedepopenu he Jehovah de whẹdatọ lẹ na yé,+ Jehovah nọ tin hẹ whẹdatọ lọ bo nọ whlẹn yé sọn alọ kẹntọ yetọn lẹ tọn mẹ to azán whẹdatọ lọ tọn lẹpo gbè; na e nọ blawuna Jehovah*+ eyin e sè hunwinwẹn yetọn na mẹhe to kọgbidina yé lẹ tọn wutu+ podọ na mẹhe to nuyiwa hẹ yé po kanyinylan po lẹ tọn wutu. 19  Ṣigba, eyin whẹdatọ lọ kú, yé nọ vọ́ yinuwa to aliho he gblezọn hú otọ́ yetọn lẹ tọn mẹ gbọn hihodo yẹwhe devo lẹ nado sẹ̀n yé bo dẹ́ do odò na yé dali.+ Yé ma nọ dealọ sọn walọ yetọn lẹ po nuyiwa tasinsinyẹn tọn yetọn po mẹ. 20  To godo mẹ, Jehovah gblehomẹ sinsinyẹn do Islaeli go+ bo dọmọ: “Na akọta ehe ko gbà alẹnu ṣie+ he yẹn degbe etọn na tọgbo yetọn lẹ bo ma setonuna mi wutu,+ 21  yẹnlọsu ma na yàn dopo tata to akọta he Jọṣua kú jodo lẹ+ mẹ sẹ̀ sọn nukọn yetọn. 22  Ehe wẹ na tẹ́n omẹ Islaeli tọn lẹ pọ́n nado yọnẹn eyin yé na tẹdo ali Jehovah tọn go+ bo nọ zinzọnlin to e ji kẹdẹdile otọ́ yetọn lẹ wà do.” 23  Enẹwutu, Jehovah dike bọ akọta ehelẹ gbọṣi finẹ. E ma yàn yé sẹ̀ to afọdopolọji, bo masọ jo yé do alọ Jọṣua tọn mẹ.

Nudọnamẹ Odò Tọn

Zẹẹmẹdo “Avivitọ lẹ.”
“Timnati-sela” to Jọṣ 19:50 po 24:30 po mẹ.
Hogbe milomilo wẹ hogbe ehelẹ yin na okú.
Kavi “na Jehovah nọ diọlinlẹn.”