Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 18:1-31

NUHE E BẸHẸN LẸ

  • Daninu lẹ dín aigba (1-31)

    • Boṣiọ Mika tọn lẹ po yẹwhenọ lọ po yin wiwle (14-20)

    • Yè yí Laiṣi bo diọ oyín etọn zun Dani (27-29)

    • Boṣiọ-sinsẹ̀n to Dani (30, 31)

18  To azán enẹlẹ gbè, ahọlu de ma tin to Islaeli.+ Podọ to whenẹnu, hẹnnu Daninu lẹ tọn+ to ogú de dín nado nọ nọ̀ finẹ, na kakajẹ ojlẹ enẹ mẹ, yé ma ko mọ aigba he pé yé de yí di ogú to hẹnnu Islaeli tọn lẹ ṣẹnṣẹn.+  Daninu lẹ do sunnu nugopetọ atọ́n hlan sọn whẹndo yetọn mẹ, yèdọ sọn Zola po Eṣitaoli po,+ nado yì bẹ̀ aigba lọ pọ́n bo dindona ninọmẹ etọn. Yé dọna sunnu lọ lẹ dọmọ: “Mì yì, bo dindona ninọmẹ aigba lọ tọn.” To whenue yé jẹ owhé Mika tọn gbè to lẹdo osó tọn Eflaimi tọn mẹ,+ yé dọ́ finẹ.  To whenue yé sẹpọ owhé Mika tọn, yé sè ogbè* dẹpẹ Levinu lọ tọn, enẹwutu yé yì e dè bo kanse e dọmọ: “Mẹnu wẹ hẹn we wáfi? Etẹ wà wẹ a te tofi? Etẹwutu wẹ hiẹ do gbọṣi fi?”  Ewọ sọ gblọnna yé dọmọ: “Le po le po wẹ Mika wà na mi bo haya mi nado nọ sẹ̀n taidi yẹwhenọ de na ẹn.”+  To whenẹnu, yé dọna ẹn dọmọ: “Jaale, kanse Jiwheyẹwhe eyin gbejizọnlin mítọn na tindo kọdetọn dagbe.”  Yẹwhenọ lọ dọna yé dọmọ: “Mì yì to jijọho mẹ. Jehovah tin hẹ mì to gbejizọnlin mìtọn mẹ.”  Enẹwutu, sunnu atọ́n lọ lẹ zindonukọn bo jẹ Laiṣi.+ Yé mọ lehe mẹhe tin to finẹ lẹ tin to hihọ́ mẹ bo ma ganjẹ mẹdepope go do, dile Sidoninu lẹ ma ganjẹ mẹde go do. Yé vò bọ ayiha yetọn jai,+ podọ nukunvandomẹtọ kanylantọ depope ma to tuklado yé to aigba lọ ji. Yé dẹn do Sidoninu lẹ taun bo ma tindo kanṣiṣa de hẹ mẹdepope.  To whenue sunnu lọ lẹ wá mẹmẹsunnu yetọn lẹ dè to Zola po Eṣitaoli po,+ mẹmẹsunnu yetọn lẹ kanbiọ yé dọmọ: “Nawẹ nulẹ yì do?”  Yé gblọn dọmọ: “Mì gbọ mí ni hẹji yì tọ́nawhàn yé, na mí ko mọdọ aigba lọ yọ́n taun. Naegbọn mì do to awuwhle? Mì dọngbàn nado yì bo yí aigba lọ blo. 10  Eyin mì jẹ dọ́n, mì na mọdọ ayiha mẹlọ lẹ tọn jai,+ podọ aigba lọ gblo taun. Jiwheyẹwhe ko jo e do alọ mìtọn mẹ, podọ nudepope ma whè to finẹ to nuhe tin to aigba ji lẹpo mẹ.”+ 11  To whenẹnu, sunnu 600 he blagbajana awhàn sọn whẹndo Daninu lẹ tọn mẹ dedo sọn Zola po Eṣitaoli po.+ 12  Yé hẹji yì bo dosla do Kiliati-jealimi+ to Juda. Enẹ wẹ zọ́n bọ ofi enẹlọ he tin to whèyihọ-waji Kiliati-jealimi tọn do nọ yin yiylọdọ Mahane-dani*+ kakajẹ egbé. 13  Yé sọ tọ́n sọn finẹ yì lẹdo osó tọn Eflaimi tọn mẹ bo wá owhé Mika tọn gbè.+ 14  To whenẹnu, sunnu atọ́n he yì bẹ̀ aigba Laiṣi tọn+ pọ́n lẹ dọna mẹmẹsunnu yetọn lẹ dọmọ: “Be mì yọnẹn dọ efọdi,* boṣiọ tẹlafimi tọn* lẹ, boṣiọ pipà po boṣiọ kinkọ̀n de po tin to ohọ̀ ehelẹ mẹ ya?+ Mì lẹnnupọn bo yọ́n nuhe mì dona wà.” 15  To whenẹnu, yé zẹ̀ finẹ bo yì ohọ̀ dẹpẹ Levinu lọ+ tọn kọ̀n to owhé Mika tọn gbè bo kàn lehe e te do biọ ẹ. 16  To ojlẹ ehe lẹpo mẹ, sunnu 600 sọn omẹ Dani tọn lẹ mẹ+ he blagbajana awhàn tin to ote to họngbo lọ ji. 17  Sunnu atọ́n he ko yì bẹ̀ aigba lọ pọ́n lẹ+ biọ họmẹ nado bẹ boṣiọ pipà lọ, efọdi+ lọ, boṣiọ tẹlafimi tọn*+ lọ lẹ po boṣiọ kinkọ̀n+ lọ po. (Yẹwhenọ lọ+ lọsu ṣite to họngbo lọ ji po sunnu 600 he blagbajana awhàn lọ lẹ po.) 18  Sunnu lọ lẹ biọ owhé Mika tọn gbè bo bẹ boṣiọ pipà lọ, efọdi lọ, boṣiọ tẹlafimi tọn* lọ lẹ po boṣiọ kinkọ̀n lọ po. Yẹwhenọ lọ dọna yé dọmọ: “Etẹ wà wẹ mì te?” 19  Ṣigba, yé dọna ẹn dọmọ: “Nabọẹ. Yí alọ towe do sú onù bo hodo mí nado lẹzun otọ́* po yẹwhenọ de po na mí. Detẹ wẹ yọ́n hugan—dọ hiẹ ni yin yẹwhenọ na owhé mẹdopo tọn+ kavi dọ hiẹ ni lẹzun yẹwhenọ na hẹnnu po whẹndo de po to Islaeli?”+ 20  To whenẹnu, homẹ yẹwhenọ lọ tọn hùn, ewọ sọ bẹ efọdi lọ, boṣiọ tẹlafimi tọn* lọ lẹ po boṣiọ pipà+ lọ po bo hodo gbẹtọ lọ lẹ dedo. 21  Enẹgodo, yé lẹkọ dedo, bo de yọpọvu lẹ, kanlin-yìnyìn lẹ po nuhọakuẹ lẹ po do nukọn. 22  Yé ko yì dẹn do owhé Mika tọn to whenue sunnu he nọ nọ̀ owhé he sẹpọ owhé Mika tọn gbè lẹ bẹ yedelẹ pli bo plá Daninu lẹ. 23  To whenue yé dawhá hlan Daninu lẹ, Daninu lẹ lilẹ́ pannukọn yé bo dọna Mika dọmọ: “Etẹwẹ jọ? Naegbọn mìwlẹ do bẹ mìde pli?” 24  Ewọ sọ dọmọ: “Mìwlẹ ko bẹ yẹwhe ṣie he yẹn basi lẹ bosọ plan yẹwhenọ lọ lọsu jei. Etẹwẹ pò na mi? Todin, naegbọn mìwlẹ do kanse mi dọ, ‘Etẹwẹ to wiwà we?’” 25  Daninu lẹ gblọnna ẹn dọmọ: “A dawhá do mí ji blo; eyin e ma yinmọ, mẹhe to adi ji* lẹ sọgan hù we, bọ hiẹ na hẹn ogbẹ̀* towe po whédo towe tọn po bu.” 26  Enẹgodo, Daninu lẹ wleali dedo; na Mika mọdọ huhlọn yetọn hú emitọn wutu, e lẹkọ bo yì owhé etọn gbè. 27  To whenue yé ko bẹ nuhe Mika basi lẹ po yẹwhenọ etọn po godo, yé yì mẹhe vò bọ ayiha yetọn jai+ lọ lẹ dè to Laiṣi.+ Yé yí ohí do hù yé bo yí miyọ́n do mẹ̀ tòdaho lọ. 28  Mẹdepope ma tin nado whlẹn tòdaho lọ, na e dẹn do Sidoni bọ yé masọ tindo kanṣiṣa de hẹ mẹdepope podọ dankló* Bẹti-lehobi tọn+ ji wẹ tòdaho lọ tin te. Enẹgodo, yé vọ́ tòdaho lọ gbá bo nọ nọ̀ e mẹ. 29  Humọ, yé ylọ tòdaho lọ dọ Dani+ sọgbe hẹ oyín otọ́ yetọn Dani tọn, mẹhe yin jiji na Islaeli.+ Ṣigba, Laiṣi wẹ tòdaho lọ nọ yin dai.+ 30  To godo mẹ, Daninu lẹ ze boṣiọ pipà lọ+ tùnte na yedelẹ, Jonatani+ visunnu Gẹlṣọmi,+ visunnu Mose tọn po visunnu etọn lẹ po sọ lẹzun yẹwhenọ lẹ na hẹnnu Daninu lẹ tọn kakajẹ whenue mẹhe nọ nọ̀ aigba lọ ji lẹ yin bibẹ yì kanlinmọgbenu. 31  Yé sọ ze boṣiọ pipà he Mika ko basi lọ tùnte, bọ e gbọṣi finẹ to ojlẹ he ohọ̀ Jiwheyẹwhe nugbo lọ tọn tin to Ṣilo lẹpo gblamẹ.+

Nudọnamẹ Odò Tọn

Kavi “kọnugbè.”
Zẹẹmẹdo “Osla Dani Tọn.”
Pọ́n Zẹm.
Kavi “yẹwhe whédo tọn.”
Kavi “yẹwhe whédo tọn.”
Kavi “yẹwhe whédo tọn.”
Kavi “ayinamẹtọ.”
Kavi “yẹwhe whédo tọn.”
Kavi “sunnu he alindọn yetọn to awufiẹsa mẹ.”
Kavi “alindọn.”
Kavi “agbàdo.”