Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 17:1-13

NUHE E BẸHẸN LẸ

  • Boṣiọ Mika tọn lẹ po yẹwhenọ etọn po (1-13)

17  Dawe de tin sọn lẹdo osó tọn Eflaimi tọn+ mẹ he nọ yin Mika.  E dọna onọ̀ etọn dọmọ: “Fataka-kuẹ towe 1 100 he yin bibẹ lọ, ehe yẹn sè bọ hiẹ hodẹ̀do mẹhe bẹ—pọ́n! fataka lọ tin to asi e. Yẹn wẹ bẹ.” To whenẹnu, onọ̀ etọn dọmọ: “Jehovah ni dona visunnu ṣie.”  Enẹwutu, ewọ gọ̀ fataka-kuẹ 1 100 lọ jo na onọ̀ etọn, ṣigba onọ̀ etọn dọmọ: “Yẹn dona klan fataka lọ do wiwe na Jehovah do visunnu ṣie tamẹ nado yí i do basi boṣiọ pipà de po boṣiọ kinkọ̀n de po.+ Todin, yẹn gọ̀ ẹ jo na we.”  To whenue e ko gọ̀ fataka lọ jo na onọ̀ etọn godo, onọ̀ etọn de fataka-kuẹ 200 sọn e mẹ bo bẹ jo na ayátọ fataka tọn de. Ewọ sọ basi boṣiọ pipà de po boṣiọ kinkọ̀n de po; yé sọ yin zizedo owhé Mika tọn gbè.  Nalete, Mika tindo ohọ̀ de na yẹwhe lẹ, e sọ basi efọdi*+ de po boṣiọ tẹlafimi tọn*+ lẹ po bo na aṣẹ dopo to visunnu etọn lẹ mẹ* nado nọ sẹ̀n taidi yẹwhenọ de na ẹn.+  To azán enẹlẹ gbè, ahọlu de ma tin to Islaeli.+ Nuhe sọgbe to nukun mẹdopodopo tọn mẹ* wẹ e nọ wà.+  Todin, dẹpẹ de tin sọn Bẹtlẹhẹm+ to Juda sọn whẹndo Juda tọn mẹ. Ewọ yin Levinu+ de bo ko to finẹ na ojlẹ de.  Dẹpẹ lọ tọ́n sọn tòdaho Bẹtlẹhẹm tọn mẹ to Juda nado yì dín fihe e na nọ. Dile e to yìyì, e wá jẹ owhé Mika tọn gbè to lẹdo osó tọn Eflaimi tọn mẹ.+  Whenẹnu wẹ Mika dọna ẹn dọmọ: “Fie wẹ hiẹ wá sọn?” Ewọ gblọn dọmọ: “Levinu de wẹ yẹn sọn Bẹtlẹhẹm to Juda bọ yẹn to yìyì nado yì dín fihe yẹn na nọ.” 10  Enẹwutu, Mika dọna ẹn dọmọ: “Nọ dè e fi bo lẹzun otọ́* po yẹwhenọ de po na mi. Yẹn na nọ na we fataka-kuẹ ao to whemẹwhemẹ gọna awù lẹ po núdùdù po.” Enẹwutu, Levinu lọ biọ whégbè. 11  Gbọnmọ dali, Levinu lọ yigbe nado nọ nọ̀ dawe lọ dè bosọ wá taidi dopo to visunnu etọn lẹ mẹ. 12  Humọ, Mika na aṣẹ Levinu lọ* nado nọ sẹ̀n taidi yẹwhenọ de na ẹn,+ bọ ewọ sọ nọ nọ̀ owhé Mika tọn gbè. 13  To whenẹnu, Mika dọmọ: “Todin, yẹn yọnẹn dọ Jehovah na wà dagbe na mi, na Levinu lọ ko lẹzun yẹwhenọ de na mi.”

Nudọnamẹ Odò Tọn

Pọ́n Zẹm.
Kavi “yẹwhe whédo tọn.”
To paa mẹ, “bo hẹn alọ dopo to visunnu etọn lẹ mẹ tọn gọ́.”
Kavi “Nuhe mẹdopodopo lẹndọ e sọgbe.”
Kavi “ayinamẹtọ.”
To paa mẹ, “hẹn alọ Levinu lọ tọn gọ́.”