Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 16:1-31

NUHE E BẸHẸN LẸ

  • Samsọni to Gaza (1-3)

  • Samsọni po Dẹlila po (4-22)

  • Samsọni yiahọsu bo kú (23-31)

16  To gbèdopo, Samsọni yì Gaza bo mọ yọnnu galọtọ de to finẹ bosọ biọ owhé etọn gbè.  Linlin sọ yin nina Gazanu lẹ dọmọ: “Samsọni ko wáfi.” Enẹwutu, yé lẹdo filọ bo tọ̀pọwu dai na ẹn to ozán lọ blebu mẹ to họngbo tòdaho lọ tọn ji. Yé sọ nọ whii to ozán lọ blebu mẹ bo to didọna yede dọmọ: “Eyin ai họ́n, mí na hù i.”  Ṣigba, Samsọni gbọṣi aimimlọn to finẹ kakajẹ zánhomẹ. Enẹgodo, e fọ́n to zánhomẹ bo hẹn họngbo tòdaho lọ tọn po dòtin etọn awe lẹ po go bosọ họ̀n yé po nuhe yè yí do gla ẹ po. E sọ ze yé do abọ́ ji kaka yiaga osó he pannukọn Heblọni tọn.  To enẹgodo, e jẹ wanyina yọnnu de ji he nọ nọ̀ Agbàdo* Solẹki tọn mẹ bo nọ yin Dẹlila.+  Enẹwutu, ogán Filistinu lẹ tọn lẹ dọnsẹpọ yọnnu lọ bo dọna ẹn dọmọ: “Doyẹklọ ẹ*+ bo yọ́n nuhe nọ na ẹn huhlọn sọmọ podọ lehe mí sọgan pé e ji nado blá ẹ bo duto e ji do. Eyin a wà ehe, dopodopo mítọn na na we fataka-kuẹ 1 100.”  To nukọn mẹ, Dẹlila dọna Samsọni dọmọ: “Jaale, dọ nuhe nọ na we huhlọn sọmọ na mi podọ nuhe mẹde sọgan yí do blá we nado duto ji we.”  Samsọni dọna ẹn dọmọ: “Eyin yé yí ogákàn* ṣinawe he pò to omú bo ma ko hú do blá mi, yẹn na ba huhlọn ṣie pò bo na taidi sunnu devo depope.”  Enẹwutu, ogán Filistinu lẹ tọn lẹ hẹn ogákàn ṣinawe he pò to omú bo ma ko hú wá na yọnnu lọ, ewọ sọ yí yé do blá ẹ.  Todin, yé tọ̀pọwu do abò mẹ, bọ yọnnu lọ dawhá hlan ẹn dọmọ: “Samsọni, Filistinu lẹ tọ́ngbé towe!” Ewọ sọ wẹ́n ogákàn lọ lẹ do awe, kẹdẹdile sekan de nọ wẹ́n po awubibọ po do to whenue miyọ́n jẹ e go.+ Mẹde masọ yọ́n asisa huhlọn etọn tọn. 10  Enẹgodo, Dẹlila dọna Samsọni dọmọ: “Hiẹ ko klọ mi* bosọ dolalo na mi. Todin jaale, dọ nuhe mẹde sọgan yí do blá we na mi.” 11  Ewọ sọ dọna ẹn dọmọ: “Eyin yé yí okàn yọyọ he ma ko yin zinzan pọ́n lẹ do blá mi, yẹn na ba huhlọn ṣie pò bo na taidi sunnu devo depope.” 12  Enẹwutu, Dẹlila yí okàn yọyọ lẹ do blá ẹ, enẹgodo e dawhá hlan ẹn dọmọ: “Samsọni, Filistinu lẹ tọ́ngbé towe!” (To ojlẹ enẹ lẹpo mẹ, mẹhe tọ̀pọwu lọ lẹ tin to abò lọ mẹ.) Ewọ sọ wẹ́n okàn lọ lẹ sọn alọ go di sekan.+ 13  Enẹgodo, Dẹlila dọna Samsọni dọmọ: “Kakajẹ din, hiẹ ko klọ mi bosọ dolalo na mi.+ Dọ nuhe mẹde sọgan yí do blá we na mi bo.” Ewọ sọ dọna ẹn dọmọ: “Eyin hiẹ yí avọ̀lọn-kàn do lọ̀n oda mimlin ṣinawe he to ota na mi lẹ, yẹn na ba huhlọn ṣie pò.” 14  Enẹwutu, yọnnu lọ yí opò tlọ́ntlọ́n do lọ̀n yé gbanun-gbanun bosọ dawhá hlan ẹn dọmọ: “Samsọni, Filistinu lẹ tọ́ngbé towe!” Ewọ sọ fọ́n sọn amlọn mẹ bo dọ̀n opò tlọ́ntlọ́n lọ sún bosọ tún avọ̀lọn-kàn lọ. 15  Todin, yọnnu lọ dọna ẹn dọmọ: “Naegbọn hiẹ do dọ dọ, ‘Yẹn yiwanna we,’+ to whenuena e yindọ hiẹ ma hùn ahun towe na mi? Whla atọ̀n wẹ a ko klọ mi bo ma dọ nuhe nọ na we huhlọn sọmọ na mi.”+ 16  Na yọnnu lọ to tuklado e egbesọegbesọ bo do magbọjẹ na ẹn wutu, apọṣi i* bọ e masọ sọgan doakọnna ba.+ 17  Enẹwutu, e wá hùn ahun etọn na yọnnu lọ to godo mẹ dọmọ: “Oda ṣie ma ko yin pipà pọ́n gbede, na Nazili Jiwheyẹwhe tọn de wẹ yẹn yin sọn jiji whenu.*+ Eyin oda ṣie yin pipà, huhlọn ṣie na vọ̀ bọ yẹn na ba huhlọn pò bo na taidi sunnu he pò lẹpo.” 18  To whenue Dẹlila mọdọ e ko hùn ahun etọn na ẹn, e dowẹn hlan ogán Filistinu lẹ tọn lẹ to afọdopolọji+ dọmọ: “Mì hẹji wá todin, na ewọ ko hùn ahun etọn na mi.” Enẹwutu, ogán Filistinu lẹ tọn lọ lẹ hẹji wá e dè bo hẹn akuẹ lọ wá. 19  Yọnnu lọ hẹn Samsọni damlọn do akọ̀n etọn ji; to whenẹnu, e ylọ dawe de nado wá pà oda mimlin ṣinawe he to ota na ẹn lẹ. Enẹgodo, yọnnu lọ jẹ didohia ji dọ emi pé e ji, na Samsọni jẹ huhlọn etọn bapò ji wutu. 20  Todin, yọnnu lọ dawhá dọmọ: “Samsọni, Filistinu lẹ tọ́ngbé towe!” Ewọ sọ fọ́n sọn amlọn mẹ bo dọmọ: “Yẹn na tọ́nyi taidi dai tọn lẹ nkọ+ bo tún dee dote.” Ṣigba, e ma yọnẹn dọ Jehovah ko jo emi do. 21  Enẹwutu, Filistinu lẹ wle e bo sún nukun etọn lẹ sẹ̀. Enẹgodo, yé hẹn ẹn jẹte yì Gaza bo yí gẹdẹ gànvẹẹ tọn awe do blá ẹ, ewọ sọ lẹzun likun-litọ de to gànpamẹ. 22  Ṣigba, oda etọn he yin pipà+ lọ ko jẹ wúwú ji. 23  Ogán Filistinu lẹ tọn lẹ bẹ yede pli nado basi avọ́sinsan daho de na yẹwhe yetọn Dagọni+ podọ nado basi hùnwhẹ, na yé to didọmọ: “Yẹwhe mítọn ko jo Samsọni kẹntọ mítọn do alọ mítọn mẹ!” 24  To whenue gbẹtọ lẹ mọ ẹn, yé jẹ yẹwhe yetọn pà ji dọmọ: “Yẹwhe mítọn ko jo kẹntọ mítọn do alọ mítọn mẹ, yèdọ mẹlọ he to otò mítọn husudo+ bo ko sọ hù susu mítọn.”+ 25  Na yé to aglinjẹ wutu, yé dọmọ: “Mì ylọ Samsọni wá na ewọ nido do nukiko na mí.” Enẹwutu, yé ylọ Samsọni wá sọn gànpamẹ na ewọ nido daihun to nukọn yetọn; yé hẹn ẹn ṣite to dòtin lẹ ṣẹnṣẹn. 26  To whenẹnu, Samsọni dọna yọpọ sunnu he hẹn alọ go na ẹn lọ dọmọ: “Dike yẹn ni doalọ dòtin he ji ohọ̀ lọ sinai do lẹ go, na yẹn nido ganjẹ yé go.” 27  (To ojlẹ enẹ mẹ, ohọ̀ lọ gọ́ na sunnu po yọnnu po. Ogán Filistinu lẹ tọn lẹpo sọ tin to finẹ, podọ sunnu po yọnnu po diblayi 3 000 wẹ to họta ohọ̀ lọ tọn bo to nupọn dile Samsọni to nukiko do na yé.) 28  Todin, Samsọni+ dawhá ylọ Jehovah dọmọ: “Oklunọ Nupojipetọ Jehovah E, jaale flin mi, yẹn vẹ̀ we, na huhlọn mi+ whladopo ehe poun, Jiwheyẹwhe E, dike yẹn ni yiahọsu to Filistinu lẹ go na dopo to nukun ṣie awe lẹ mẹ.”+ 29  Whenẹnu wẹ Samsọni doalọ dòtin awe ṣẹnṣẹn tọn he ji ohọ̀ lọ sinai do lẹ go, bo ganjẹ yé go, yèdọ ode po adusilọ etọn po podọ awetọ po amiyọnlọ etọn po. 30  Samsọni sọ dawhá dọmọ: “Dike yẹn* ni kú po Filistinu lẹ po!” To whenẹnu, e yí huhlọn etọn lẹpo do sisẹ́ dòtin lọ lẹ bọ ohọ̀ lọ họ́ do ogán lọ lẹ po mẹhe tin to ohọ̀ lọ mẹ lẹpo po ji.+ Gbọnmọ dali, sọha mẹhe ewọ hù to okú etọn whenu lẹ tọn sù hugan mẹhe e hù to gbẹwhenu etọn lẹ tọn.+ 31  To godo mẹ, nọvisunnu etọn lẹ po whẹndo otọ́ etọn tọn pete po jẹte wá nado ze oṣiọ etọn lẹkọyi. Yé hẹn ẹn wá bo dì i do yọdò Manoa+ otọ́ etọn tọn mẹ to Zola+ po Eṣitaoli po ṣẹnṣẹn. Owhe 20 wẹ ewọ yí do dawhẹ to Islaeli.+

Nudọnamẹ Odò Tọn

Kavi “Agbàdo Tọ̀sisa tọn.” Pọ́n Zẹm.
Kavi “Diọlinlẹnna ẹn.”
Kavi “agbasakàn kanlin tọn.”
Kavi “ko yí mi do davlẹ.”
Kavi “alindọn etọn.”
To paa mẹ, “sọn adọ̀ onọ̀ ṣie tọn mẹ.”
Kavi “alindọn ṣie.”