Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 13:1-25

NUHE E BẸHẸN LẸ

  • Angẹli de dla Manoa po asi etọn po pọ́n (1-23)

  • Jiji Samsọni tọn (24, 25)

13  Islaelivi lẹ sọ vọ́ wà nuhe ylan to nukun Jehovah tọn mẹ,+ bọ Jehovah jo yé do alọ Filistinu lẹ tọn mẹ+ na owhe 40.  To ojlẹ enẹ mẹ, dawe de tin sọn whẹndo Daninu+ lẹ tọn mẹ to Zola,+ bo nọ yin Manoa.+ Asi etọn yin wẹnsinọ bo ma ko ji ovi depope.+  To nukọn mẹ, angẹli Jehovah tọn sọawuhia yọnnu lọ bo dọna ẹn dọmọ: “Hiẹ yin wẹnsinọ bo ma ko ji ovi depope. Amọ́, hiẹ na mọhò bo ji visunnu de.+  Todin, họ́ dewe bo ma nọ nù ovẹn kavi ahàn sinsinyẹn depope blo,+ a sọ dù onú mawé depope blo.+  Pọ́n! Hiẹ na mọhò bo ji visunnu de, podọ oda etọn ma dona yin pipà gbede,+ na Nazili Jiwheyẹwhe tọn de wẹ ovi lọ na yin sọn jiji etọn whenu,* ewọ nasọ nọ nukọn nado whlẹn Islaeli sọn alọ Filistinu lẹ tọn mẹ.”+  Enẹgodo, yọnnu lọ yì bo dọna asu etọn dọmọ: “Omẹ Jiwheyẹwhe nugbo lọ tọn de wá dè e, podọ awusọhia etọn taidi awusọhia angẹli Jiwheyẹwhe nugbo lọ tọn de, bo dobu tlala. Yẹn ma kàn fie ewọ wá sọn sè e, mọ ewọ lọsu ma dọ yinkọ etọn na mi.+  Ṣigba, e dọna mi dọ, ‘Hiẹ na mọhò bo ji visunnu de. Hiẹ ma dona nọ nù ovẹn kavi ahàn sinsinyẹn depope, podọ hiẹ ma dona dù onú mawé depope, na Nazili Jiwheyẹwhe tọn de wẹ ovi lọ na yin sọn jiji etọn whenu* kakajẹ okú etọn whenu.’”  Manoa vẹ̀ Jehovah dọmọ: “Yẹn vẹ̀ we, Jehovah E. Jaale, dike omẹ Jiwheyẹwhe nugbo lọ tọn he hiẹ dohlan lọ ni lẹkọwa mí dè whladopo dogọ nado wá plọn mí nuhe mí dona wà na ovi he na yin jiji lọ.”  Enẹwutu, Jiwheyẹwhe nugbo lọ dotoaina Manoa, bọ angẹli Jiwheyẹwhe nugbo lọ tọn lẹkọwa yọnnu lọ dè dile ewọ to aisinsin to danji; asu etọn Manoa ma tin to finẹ to whenẹnu. 10  Yọnnu lọ yawu dowezun bo yì dọna asu etọn dọmọ: “Pọ́n! Dawe he wá dè e to gbetẹgbe die lọ ko sọ vọ́ sọawuhia mi.”+ 11  To whenẹnu, Manoa fọ́n bo hodo asi etọn. E sọ wá dawe lọ dè bo dọna ẹn dọmọ: “Hiẹ wẹ dọho hẹ asi ṣie dai ya?” Ewọ sọ dọmọ: “Yẹn wẹ.” 12  Manoa sọ dọmọ: “Na ohó towe lẹ ni mọ hẹndi! Amọ́, nawẹ ovi lọ dona yin pinplọn whẹ́n gbọn podọ etẹwẹ e na wà?”+ 13  Enẹwutu, angẹli Jehovah tọn dọna Manoa dọmọ: “Asi towe dona họ́ ede sọn nuhe yẹn ko dọna ẹn lẹpo mẹ.+ 14  Ewọ ma dona nọ dù nudepope he wá sọn ovẹn sinsẹ́n mẹ, podọ e ma dona nọ nù ovẹn kavi ahàn sinsinyẹn depope,+ mọ e ma dona dù onú mawé depope.+ Ewọ dona payi nuhe yẹn degbe etọn na ẹn lẹpo go.” 15  Todin, Manoa dọna angẹli Jehovah tọn dọmọ: “Jaale nọte, bo dike mí ni wleawu gbọgbọẹvu de tọn na we.”+ 16  Ṣigba, angẹli Jehovah tọn dọna Manoa dọmọ: “Eyin yẹn nọte, yẹn ma na dù núdùdù towe; amọ́ eyin hiẹ jlo na basi avọ́nunina mimẹ̀ de hlan Jehovah, hiẹ sọgan wàmọ.” Manoa ma yọnẹn dọ angẹli Jehovah tọn de wẹ. 17  To whenẹnu, Manoa dọna angẹli Jehovah tọn dọmọ: “Nawẹ a nọ yin,+ na mí nido sọgan gbògbéna we to whenue ohó towe lẹ na mọ hẹndi?” 18  Ṣigba, angẹli Jehovah tọn dọna ẹn dọmọ: “Etẹwutu wẹ hiẹ do to yinkọ ṣie kanse, to whenuena e yindọ oyín jiawu de wẹ?” 19  To whenẹnu, Manoa yí gbọgbọẹvu lọ po avọ́nunina jinukun-lili tọn lọ po bo yí do sanvọ́ hlan Jehovah to osé lọ ji. Podọ Ewọ sọ to nujiawu de wà bọ Manoa po asi etọn po to pinpọn. 20  Dile miyọ́n lọ to jiji yiaga sọn agbà lọ ji hlan olọn, angẹli Jehovah tọn gbọn miyọ́n agbà lọ tọn mẹ hẹji yì bọ Manoa po asi etọn po to pinpọn. To afọdopolọji, yé ṣinyọ́n nukunmẹ yetọn ai. 21  Angẹli Jehovah tọn masọ vọ́ sọawuhia Manoa po asi etọn po ba. Whenẹnu wẹ Manoa wá yọnẹn dọ angẹli Jehovah tọn de wẹ.+ 22  Enẹgodo, Manoa dọna asi etọn dọmọ: “Mí na kú dandan, na mí ko mọ Jiwheyẹwhe wutu.”+ 23  Ṣigba, asi etọn dọna ẹn dọmọ: “Eyin e ko jlo Jehovah nado hù mí wẹ, ewọ ma na ko kẹalọyi avọ́nunina mimẹ̀+ po avọ́nunina jinukun-lili tọn de po sọn mí si, podọ ewọ ma na ko do onú ehe lẹpo hia mí, mọ e ma na ko dọ onú ehelẹ depope na mí.” 24  To nukọn mẹ, yọnnu lọ ji visunnu de bo ylọ oyín etọn dọ Samsọni;+ podọ dile visunnu lọ to whinwhẹ́n, Jehovah to didona ẹn. 25  To godo mẹ, gbigbọ Jehovah tọn jẹ nuyiwadeji ji+ to Mahane-dani,+ to Zola po Eṣitaoli po ṣẹnṣẹn.+

Nudọnamẹ Odò Tọn

To paa mẹ, “sọn adọ̀ mẹ.”
To paa mẹ, “sọn adọ̀ mẹ.”