Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Whẹdatọ lẹ 11:1-40

NUHE E BẸHẸN LẸ

  • Yè yàn Whẹdatọ Jẹfta dogbé; lẹzun ahọlu (1-11)

  • Jẹfta hẹn Amọni lẹnnupọn (12-28)

  • Opà Jẹfta tọn po viyọnnu etọn po (29-40)

    • Tlẹnmẹninọ viyọnnu lọ tọn (38-40)

11  Jẹfta+ Giliadinu lọ yin awhànfuntọ huhlọnnọ de; ewọ yin visunnu yọnnu galọtọ de tọn, bọ Giliadi wẹ yin otọ́ Jẹfta tọn.  Ṣigba, asi Giliadi tọn lọsu ji visunnu lẹ na ẹn. To whenuena visunnu asi etọn tọn lẹ whẹ́n, yé yàn Jẹfta tọ́n bo dọna ẹn dọmọ: “Hiẹ ma na mọ ogú depope yí to whédo otọ́ mítọn tọn mẹ, na visunnu yọnnu devo tọn wẹ hiẹ yin wutu.”  Enẹwutu, Jẹfta họnyi sọn nọvisunnu etọn lẹ dè bo sawhé do aigba Tobi tọn ji. Sunnu he ma tindo azọ́n de nado wà lẹ sọ kọ̀n yede dopọ hẹ Jẹfta bo nọ hodo e nado yì tọ́nawhàn kẹntọ yetọn lẹ.  To ojlẹ kleun de godo, Amọninu lẹ tọ́navùn Islaeli.+  To whenuena Amọninu lẹ tọ́navùn Islaeli, mẹho Giliadi tọn lẹ yì to afọdopolọji nado plan Jẹfta lẹkọwa sọn aigba Tobi tọn ji.  Yé dọna Jẹfta dọmọ: “Wá nọ nukọnna mí taidi awhàngán daho mítọn, na mí nido hoavùn hẹ Amọninu lẹ.”  Ṣigba, Jẹfta dọna mẹho Giliadi tọn lẹ dọmọ: “Be e ma yin mìwlẹ wẹ gbẹwanna mi sinsinyẹn bo yàn mi tọ́n sọn owhé otọ́ ṣie tọn gbè?+ Naegbọn mì do wá dè e todin he mì tin to ojlẹ awusinyẹn tọn mẹ?”  Mẹho Giliadi tọn lẹ sọ dọna Jẹfta dọmọ: “Enẹ wẹ zọ́n bọ mí do lẹkọwa dè we todin. Eyin hiẹ hodo mí bo hoavùn hẹ Amọninu lẹ, hiẹ na lẹzun nukọntọ mítọn do mẹhe nọ nọ̀ Giliadi lẹpo ji.”+  Enẹwutu, Jẹfta dọna mẹho Giliadi tọn lẹ dọmọ: “Eyin mì plan mi lẹkọ nado hoavùn hẹ Amọninu lẹ bọ Jehovah jo yé do alọ ṣie mẹ, whenẹnu yẹn na lẹzun nukọntọ mìtọn nugbonugbo!” 10  Mẹho Giliadi tọn lẹ sọ dọna Jẹfta dọmọ: “Na Jehovah ni yin kunnudetọ* to ṣẹnṣẹn mítọn eyin míwlẹ ma wà kẹdẹdile hiẹ dọ do.” 11  Enẹwutu, Jẹfta hodo mẹho Giliadi tọn lẹ yì bọ gbẹtọ lọ lẹ yí i do basi nukọntọ podọ awhàngán daho do yede ji. Jẹfta sọ vọ́ ohó etọn lẹpo dọ to Jehovah nukọn to Mizpa.+ 12  To whenẹnu, Jẹfta do wẹnsagun lẹ hlan ahọlu Amọninu lẹ+ tọn dọmọ: “Etẹwẹ yẹn wà na we bọ hiẹ do wá tọ́nawhàn mi to aigba ṣie ji?” 13  Ahọlu Amọninu lẹ tọn sọ dọna wẹnsagun Jẹfta tọn lẹ dọmọ: “Na Islaelivi lẹ yí aigba ṣie to whenuena yé tọ́n sọn Egipti wutu wẹ,+ yèdọ sọn Alnọni+ yì Jabọki podọ kakajẹ Jọdani.+ Todin, gọ̀ ẹ jo na mi whii.” 14  Ṣigba, Jẹfta sọ do wẹnsagun lẹ hlan ahọlu Amọninu lẹ tọn whladopo dogọ 15  nado dọna ẹn dọmọ: “Nuhe Jẹfta dọ die: ‘Islaeli ma yí aigba Moabinu lẹ+ tọn po aigba Amọninu lẹ+ tọn po gba, 16  na to whenue Islaelivi lẹ tọ́n sọn Egipti, yé zingbejizọnlin gbọn danfafa ji kaka yì Ohù Vẹẹ kọ̀n+ bo wá Kadẹṣi.+ 17  Enẹgodo, Islaeli do wẹnsagun lẹ hlan ahọlu Edomi+ tọn dọmọ: “Jaale, dike mí ni gbọn aigba towe ji wayi,” ṣigba ahọlu Edomi tọn gbẹ́. Yé sọ dowẹn hlan ahọlu Moabi+ tọn, ṣigba ewọ lọsu ma yigbe. Enẹwutu, Islaeli gbọṣi Kadẹṣi.+ 18  To whenue yé zingbejizọnlin gbọn danfafa ji, yé gbọn apá na aigba Edomi tọn+ po aigba Moabi tọn po. Yé sọ zingbejizọnlin dedo whèzẹtẹn-waji aigba Moabi tọn+ bo dosla do agbegbe Alnọni tọn ji; yé ma biọ dogbó Moabi tọn+ mẹ, na Alnọni wẹ dogbó Moabi tọn. 19  “‘Enẹgodo, Islaeli do wẹnsagun lẹ hlan Sihọni ahọlu Amolinu lẹ tọn, ahọlu Hẹṣbọni tọn, bo dọna ẹn dọmọ: “Jaale, dike mí ni gbọn aigba towe ji wayi fininọ mítọn titi.”+ 20  Ṣigba, Sihọni ma dejido Islaeli go na e nido gbọn aigba etọn ji wayi, enẹwutu Sihọni bẹ omẹ etọn lẹpo pli dopọ bo dosla do Jahazi bosọ hoavùn hẹ Islaeli.+ 21  To whenẹnu, Jehovah Jiwheyẹwhe Islaeli tọn jo Sihọni po omẹ etọn lẹpo po do alọ Islaeli tọn mẹ bọ Islaeli gbawhàn yetọn bosọ yí aigba Amolinu he nọ nọ̀ finẹ lẹ tọn lẹpo.+ 22  Gbọnmọ dali, yé yí aigba Amolinu lẹ tọn lẹpo sọn Alnọni yì Jabọki podọ sọn danfafa ji yì Jọdani.+ 23  “‘Jehovah, Jiwheyẹwhe Islaeli tọn wẹ yàn Amolinu lẹ sẹ̀ sọn omẹ etọn lẹ, yèdọ Islaelivi lẹ nukọn;+ todin be mìwlẹ na yàn yé sẹ̀ wẹ ya? 24  Be e ma yin nudepope he yẹwhe mìtọn Kemọṣi+ na mì wẹ nọ lẹzun nutindo mìtọn ya? Enẹwutu, mẹdepope he Jehovah Jiwheyẹwhe mítọn yàn sọn nukọn mítọn wẹ míwlẹ na yàn sẹ̀.+ 25  Todin, be hiẹ pọnte hú Balaki,+ visunnu Zipọli tọn, ahọlu Moabi tọn to aliho depope mẹ wẹ? Be ewọ ko tọ́nawhàn Islaeli kavi funawhàn hẹ yé pọ́n wẹ? 26  To whenue Islaeli nọ nọ̀ Hẹṣbọni po tòpẹvi he to oglọ na ẹn lẹ po,+ Aloeli po tòpẹvi he to oglọ na ẹn* lẹ po gọna tòdaho he tin to Alnọni tó lẹpo na owhe 300, naegbọn mìwlẹ ma tẹnpọn gbede nado gọ̀ tòdaho lọ lẹ yí to ojlẹ enẹ mẹ?+ 27  Yẹn ma ko wà oylan depope do we, enẹwutu owhẹ̀ towe ma whẹ́n nado tọ́nawhàn mi. Jehovah Whẹdatọ+ lọ ni dawhẹ to omẹ Islaeli tọn lẹ po omẹ Amọni tọn lẹ po ṣẹnṣẹn to egbé.’” 28  Ṣigba, ahọlu Amọninu lẹ tọn ma dotoaina owẹ̀n he Jẹfta dohlan ẹn. 29  Gbigbọ Jehovah tọn wá Jẹfta ji,+ bọ e gbọn Giliadi po Manasse po yì Mizpẹ Giliadi tọn,+ podọ sọn Mizpẹ Giliadi tọn, e zindonukọn dedo Amọninu lẹ dè. 30  To whenẹnu, Jẹfta dopà+ de na Jehovah dọmọ: “Eyin hiẹ jo Amọninu lẹ do alọ ṣie mẹ, 31  to whenẹnu mẹdepope he na tọ́njẹgbonu sọn ohọ̀n owhé ṣie tọn mẹ nado wá pé mi to whenue yẹn lẹkọ to jijọho mẹ sọn Amọninu lẹ dè na lẹzun Jehovah tọn,+ yẹn nasọ ze omẹ enẹ jo taidi avọ́nunina mimẹ̀ de.”+ 32  Jẹfta sọ yì hoavùn hẹ Amọninu lẹ bọ Jehovah jo yé do alọ etọn mẹ. 33  Ewọ hù yé badabada sọn Aloeli kaka yì Minniti—yèdọ tòdaho 20—podọ kaka yì Abẹli-kelamimi. Gbọnmọ dali, Amọninu lẹ yin hinhẹn zun mẹmẹglọ to Islaelivi lẹ nukọn. 34  To godo mẹ, Jẹfta wá owhé etọn gbè to Mizpa,+ podọ pọ́n! viyọnnu etọn wẹ tọ́n ja nado wá pé e, bo to húnhò bosọ to wedu! Ewọ wẹ ovi dopo akàn he e tindo. E masọ tindo visunnu kavi viyọnnu depope gbọnvona ewọ. 35  To whenuena e mọ viyọnnu lọ, e tlẹ́n awù etọn bo dọmọ: “Ṣo, viyọnnu ṣie! Hiẹ hẹn mi jẹflumẹ* pete, na hiẹ wẹ yẹn ko yàn dogbé. Todin, yẹn ko dopà na Jehovah, yẹn masọ sọgan gọ̀dogodo.”+ 36  Ṣigba, viyọnnu lọ dọna ẹn dọmọ: “Otọ́ ṣie, eyin hiẹ ko dopà na Jehovah, bo wà na mi kẹdẹdile hiẹ ko dopà etọn do,+ to whenuena e yindọ Jehovah ko yiahọsu na we do kẹntọ towe Amọninu lẹ ji.” 37  Enẹgodo, ewọ dọna otọ́ etọn dọmọ: “Gbọ ehe ni yin wiwà na mi: Dike yẹn ni yì nọ dee ṣo na osun awe, bo gbọ yẹn ni yì osó lẹ ji bosọ viavi hẹ awhli hatọ ṣie lẹ do alọji-ninọ ṣie ji.”* 38  To whenẹnu, ewọ dọmọ: “Yì!” E sọ do e hlan na osun awe, viyọnnu lọ po awhli hatọ etọn lẹ po sọ yì osó lẹ ji nado viavi do alọji-ninọ etọn ji. 39  To vivọnu osun awe lọ lẹ tọn, e lẹkọwa otọ́ etọn dè, enẹgodo ewọ de opà he e ko do gando viyọnnu etọn go lọ.+ Viyọnnu lọ ma tindo kọndopọ zanhẹmẹ tọn hẹ sunnu de pọ́n. E sọ lẹzun aṣa* de to Islaeli dọ: 40  Jọja yọnnu Islaeli tọn lẹ nọ yì nado na pipà viyọnnu Jẹfta Giliadinu lọ tọn na azán ẹnẹ to whemẹwhemẹ.

Nudọnamẹ Odò Tọn

To paa mẹ, “sisètọ.”
Kavi “he lẹdo e pé.”
To paa mẹ, “hẹn mi wá odò.”
Kavi “viavi hẹ họntọn ṣie lẹ, na yẹn ma na wlealọ gbede wutu.”
Kavi “aṣẹdai.”