Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 69:1-36

NUHE E BẸHẸN LẸ

  • Odẹ̀ whlẹngán tọn

    • “Yẹn gọ́ na zohunhun na ohọ̀ towe” (9)

    • “Yawu siọ mi” (17)

    • “Ovẹn vẹsin wẹ yé na mi” (21)

Na anademẹtọ hànjitọ lẹ tọn; sọgbe hẹ nuhiho he nọ yin “Vounvoun Lẹ.” Ohàn Davidi tọn. 69  Jiwheyẹwhe E, whlẹn mi, na osin lẹ ko jlo na siọ mi.*+   N’ko tlọ pete biọ ogbọ̀n mẹ, fihe aigba ma ló te.+ N’ko jẹ otọ̀ he siso lẹ mẹ, Bọ asisa he to sisà po zingidi po ko plọ́ mi yì.+   Awhádido ko hẹn nuṣikọna mi;+ Ogbè ṣie ko gbà. Agbọ́ ko pé nukun ṣie lẹ dile n’to tepọn Jiwheyẹwhe ṣie.+   Mẹhe gbẹwanna mi matin whẹwhinwhẹ́n lẹ+ Sù tlala hú oda he to ota na mi lẹ. Yé mẹhe jlo na hù mi lẹ, Yèdọ kẹntọ he gbẹwanna mi sinsinyẹn* lẹ ko wá sù taun. N’ko yin hinhẹn gánnugánnu nado gọ̀ nuhe n’ma fìn lẹ jo.   Jiwheyẹwhe E, hiẹ yọ́n lehe n’yin nulunọ do, Podọ whẹhuhu ṣie ma whlá do we gba.   Oklunọ Nupojipetọ, Jehovah awhànpa lẹ tọn E, Gbọ mẹhe ze todido yetọn do hiẹ mẹ lẹ ni ma duwinyan na yẹn tọn wutu blo. A dike mẹhe to dindin we lẹ mọ winyan na yẹn tọn wutu blo, Hiẹ Jiwheyẹwhe Islaeli tọn E.   Na hiẹ wutu wẹ yẹn do yin vivlẹko;+ Winyan sọ hù mi pete.+   Yẹn ko wá taidi jonọ de na nọvisunnu ṣie lẹ, Yèdọ mẹdevo lao na visunnu onọ̀ ṣie tọn lẹ.+   Yẹn gọ́ na zohunhun na ohọ̀ towe,+ Bọ vlẹko mẹhe to vivlẹ we kò lẹ tọn ko wá ji e.+ 10  Whenue yẹn whiwhẹ dee* gbọn nùbibla dali,* Yẹn yin vivlẹko na enẹ wutu. 11  Whenue yẹn do odẹ́vọ̀, N’lẹzun aṣagbọ́nu* de na yé. 12  Mẹhe nọ sinai to họngbo tòdaho lọ tọn ji lẹ nọ to onú ṣie dọ, Bọ ahànnumunọ lẹ nọ jihàn do mi. 13  Ṣigba, gbọ odẹ̀ ṣie ni wá dè we, To ojlẹ alọkẹyi tọn mẹ, Jehovah E.+ Jiwheyẹwhe E, to susugege owanyi nugbo towe tọn mẹ, Siọ mi gbọn azọ́n whlẹngán tọn towe he tindo jide lẹ dali.+ 14  Whlẹn mi sọn ogbọ̀n lọ mẹ; A dike n’tlọ pete biọ e mẹ blo. Whlẹn mi sọn mẹhe gbẹwanna mi lẹ si Podọ sọn otọ̀ he siso lẹ mẹ.+ 15  A dike asisa he to sisà po zingidi po lọ lẹ plọ́ mi yì blo,+ Kavi a dike odò he siso lọ ze mi mì blo, A sọ dike dotọ̀* lọ bọnùdo mi blo.+ 16  Siọ mi, Jehovah E, na owanyi nugbo towe yọ́n taun.+ Lilẹ́ ayidonugo towe hlan dè e, sọgbe hẹ lẹblanu susugege towe,+ 17  A sọ whlá nukunmẹ towe do devizọnwatọ towe blo.+ Yawu siọ mi, na yẹn tin to ayimajai mẹ.+ 18  Wá sẹpọ mi bo whlẹn mi;* Fli mi gọ̀ sọn alọ kẹntọ ṣie lẹ tọn mẹ. 19  Hiẹ yọ́n vlẹko ṣie, winyan ṣie po flumẹjijẹ ṣie po.+ Hiẹ mọ kẹntọ ṣie lẹpo. 20  Vlẹko ko hẹn ahun ṣie hoapa bọ alán lọ ma sọgan kú.* Yẹn to nukundo awuvẹmẹ, ṣigba n’ma mọ depope,+ N’sọ donukun homẹmiọnnamẹtọ lẹ, amọ́ depope ma tin.+ 21  Kakatimọ, nudido* wẹ yé na mi do núdùdù tẹnmẹ,+ Podọ whenue nugbla hù mi, ovẹn vẹsin wẹ yé na mi nado nù.+ 22  Gbọ tafo yetọn ni lẹzun fẹ́ṣà de na yé, Podọ adọkun yetọn ni yin omọ̀ de na yé.+ 23  Gbọ nukun yetọn lẹ ni dózin sọmọ bọ yé ma sọgan mọnú, Bosọ hẹn alìn yetọn nado nọ to sisọsisọ to whepoponu. 24  Kọ̀n homẹgble* towe do yé ji, Bosọ gbọ adi sinsinyẹn towe ni jizò do yé ji.+ 25  Gbọ osla* yetọn ni gbọgbé; A sọ dike mẹdepope nọ gòhọ yetọn lẹ mẹ blo.+ 26  Na yé nọ yangbé mẹhe hiẹ linú tọn, Bosọ nọ to hodọ mapote gando awufiẹsa mẹhe hiẹ gbleawuna lẹ tọn go. 27  Hẹn whẹhuhu yetọn sinyẹn deji, Bo gbọ yé ni ma tindo mimá de to dodowiwa towe mẹ blo. 28  Súnsún oyín yetọn sẹ̀ sọn owe ogbẹ̀ tọn lọ mẹ,+ Bo gbọ oyín yetọn ni ma yin yiyidogọ dodonọ lẹ tọn blo.+ 29  Ṣigba, yẹn yin yasana bo to awufiẹsa mẹ.+ Gbọ huhlọn mẹwhlẹngán tọn towe ni basi hihọ́na mi, Jiwheyẹwhe E. 30  Yẹn na jihàn pipà tọn lẹ do pà oyín Jiwheyẹwhe tọn, Yẹn nasọ yí pẹdido do pagigona ẹn. 31  Ehe na hẹn homẹhun Jehovah hú oyìnsú de, Yèdọ hú oyìnsú winyanwinyan he tindo azò po ofẹ̀n lẹ po.+ 32  Homẹmimiọnnọ na mọ ehe bo jaya. Mì mẹhe to Jiwheyẹwhe dín lẹ emi, mì gbọ ahun mìtọn ni vọ́ lodo. 33  Na Jehovah to todoaina wamọnọ lẹ,+ Ewọ ma nasọ gbẹkọ omẹ etọn he to kanlinmọgbenu lẹ go.+ 34  Mì gbọ olọn po aigba po ni pà ẹ,+ Gọna ohù lẹ po nuhe nọ lìn to yé mẹ lẹpo po. 35  Na Jiwheyẹwhe na whlẹn Ziọni+ Bo na vọ́ tòdaho Juda tọn lẹ gbá, Yé nasọ yí i* bo nọ nọ̀ finẹ. 36  Kúnkan devizọnwatọ etọn lẹ tọn lẹ wẹ na dugu etọn,+ Podọ mẹhe yiwanna oyín etọn lẹ+ wẹ na nọ nọ̀ e mẹ.

Nudọnamẹ Odò Tọn

Kavi “ko ṣinyọ́n alindọn ṣie.”
Kavi “mẹhe yin kẹntọ ṣie matin whẹwhinwhẹ́n.”
To paa mẹ, “alindọn ṣie.”
Kavi vlavo, “Whenue yẹn viavi bo blanù.”
To paa mẹ, “howhinwhẹn.”
Kavi “odò.”
Kavi “Wá sẹpọ alindọn ṣie bo gọ̀ ẹ yí.”
Kavi “bọ n’ko jẹflumẹ.”
Kavi “amà he tindo adí.”
Kavi “adi.”
Kavi “osla he adó lẹdo.”
Enẹ wẹ, aigba lọ.