Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 59:1-17

NUHE E BẸHẸN LẸ

  • Jiwheyẹwhe, awọ̀yinu po fibẹtado po

    • ‘A wàlẹblanuna pàdutọ lẹ blo’ (5)

    • “Yẹn na nọ jihàn gando huhlọn towe go” (16)

Na anademẹtọ hànjitọ lẹ tọn; sọgbe hẹ nuhiho he nọ yin “A Hù Mi Sudo Blo.” Ohàn Davidi tọn. Miktami.* Whenue Sauli do sunnu lẹ hlan owhé Davidi tọn gbè nado ṣọ́ ẹ bo hù i.+ 59  Whlẹn mi sọn kẹntọ ṣie lẹ si, Jiwheyẹwhe ṣie E;+ Basi hihọ́na mi sọn mẹhe to ogbé ṣie yàn lẹ si.+   Whlẹn mi sọn mẹhe nọ yinuwa po kanyinylan po lẹ si, Bo tún mi dote sọn danuwatọ* lẹ si.   Pọ́n! Yé tọ̀wu dai na mi;*+ Sunnu huhlọnnọ lẹ nọ tọ́navùn mi Ṣigba, e ma yin na yẹn ko ṣiatẹ kavi waylando wutu wẹ gba,+ Jehovah E.   Mahopọnna dọ yẹn ma tlẹ waylan depope, yé họ̀nwezun bo wleawudai nado tọ́navùn mi. Fọ́n to whenue yẹn ylọ we bo wá pọ́n.   Na hiẹ, Jehovah Jiwheyẹwhe awhànpa lẹ tọn E, hiẹ wẹ Jiwheyẹwhe Islaeli tọn.+ Fọ́n bo lẹ́ ayidonugo towe hlan akọta lẹpo. A wàlẹblanuna mẹdepope he gbọn kanyinylan dali dùpa blo.+ (Sela)   Yé nọ lẹkọ to whèjai lẹpo;+ Yé nọ to hùnhlún* di avún+ bo nọ zọ̀n dẹẹdẹ lẹdo tòdaho lọ pé.+   Pọ́n nuhe yé nọ kọ́* jẹgbonu sọn onù yetọn mẹ; Nùflo yetọn lẹ taidi ohí,+ Na yé nọ dọmọ: “Mẹnu wẹ to sisè?”+   Ṣigba, Jehovah E, hiẹ na kò yé;+ Hiẹ na ṣàn akọta lẹpo kò.+   Huhlọn ṣie E, hiẹ wẹ yẹn na nọ nọtepọn;+ Na Jiwheyẹwhe wẹ fibẹtado he tindo hihọ́* de na mi.+ 10  Jiwheyẹwhe he nọ do owanyi nugbo hia mi na wá gọalọna mi;+ Jiwheyẹwhe na hẹn mi nado jẹaglin do kẹntọ ṣie lẹ ji.+ 11  A hù yé blo, na omẹ ṣie lẹ nikaa wọn. Gbọn huhlọn towe dali, hẹn yé nado to fuflupé; Zìn yé dai, Jehovah awọ̀yinu mítọn E.+ 12  Na yé nọ yí onù yetọn do waylando wutu, Gbọ goyiyi yetọn titi ni domọwle yé,+ Na dẹ̀hodo po ohó oklọ tọn he yé nọ dọ po wutu. 13  Và yé sudo to homẹgble towe mẹ;+ Và yé sudo, na yé ni busẹ pete; Hẹn yé nado yọnẹn dọ Jiwheyẹwhe wẹ to gandu do Jakọbu ji podọ kakajẹ opodo aigba tọn lẹ.+ (Sela) 14  Gbọ yé ni nọ lẹkọ to whèjai lẹ; Gbọ yé ni to hùnhlún* di avún bo nọ zọ̀n dẹẹdẹ lẹdo tòdaho lọ pé.+ 15  Gbọ yé ni nọ to fuflú pé nado to nuhe yé na dù dín;+ A dike yé gọ́ho kavi mọ adọtẹn blo. 16  Ṣigba na yẹn tọn, yẹn na nọ jihàn gando huhlọn towe go;+ Yẹn na nọ yí ayajẹ do dọho gando owanyi nugbo towe go to afọnnu. Na hiẹ wẹ fibẹtado he tindo hihọ́ de na mi+ Podọ bẹtẹn de he mẹ yẹn sọgan họnyi to ojlẹ ayimajai tọn mẹ.+ 17  Huhlọn ṣie E, hiẹ wẹ yẹn na nọ jihàn pipà tọn lẹ hlan,+ Na Jiwheyẹwhe wẹ fibẹtado he tindo hihọ́ de na mi, yèdọ Jiwheyẹwhe he nọ do owanyi nugbo hia mi.+

Nudọnamẹ Odò Tọn

Pọ́n Zẹm.
Kavi “mẹhe nugbla ohùn tọn to hùhù.”
Kavi “alindọn ṣie.”
Kavi “gbigbó.”
Kavi “túntún.”
Kavi “ofi yiaga he tindo hihọ́.”
Kavi “gbigbó.”