Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 58:1-11

NUHE E BẸHẸN LẸ

  • Jiwheyẹwhe he nọ dawhẹna aigba

    • Dẹ̀hiho na mẹylankan nido yin yasana (6-8)

Na anademẹtọ hànjitọ lẹ tọn; sọgbe hẹ nuhiho he nọ yin “A Hù Mi Sudo Blo.” Ohàn Davidi tọn. Miktami.* 58  Be mìwlẹ sọgan dọho gando dodowiwa go to whenue mì to abọẹ ya?+ Mì gbẹtọvi lẹ emi, be mìwlẹ sọgan dawhẹ dodo ya?+   Kakatimọ, mì nọ to ayiha mawadodo tọn kàn to ahun mìtọn mẹ,+ Bọ alọ mìtọn lẹ nọ hẹn danuwiwa gbayipe to aigba lọ ji.+   Mẹylankan ko buali* sọn jiji whenu;* Yé ko lẹzun tasinyẹntọ, yèdọ lalonọ sọn whenue gbọ́n yé yin jiji.   Adí yetọn taidi adí odàn lẹ tọn;+ Yé yin tókunọ taidi lopa he sú otó ede tọn.   E ma na dotoaina ogbè bojlẹtọ he nọ deanana ẹn lẹ tọn, Mahopọnna lehe yé yin azọ́nyọnẹntọ sọ.   Jiwheyẹwhe E, sún adú sọn nùmẹ na yé! Jehovah E, wẹ́n aglànká kinnikinni* ehelẹ tọn!   Na yé ni busẹ taidi osin he sà yì. Na Ewọ ni dlẹn ogá etọn bo yí ogába etọn lẹ do zìn yé dai.   Gbọ yé ni taidi ohọ́ he to kúkú jei* dile e to yìyì; Taidi ovi kúkú he yọnnu de ji, he ma na mọ owhè gbede.   Whẹpo nudàzẹ́n mìtọn lẹ nado mọ zozo miyọ́n he yè yí owùntin do flọ tọn, Ewọ na ko de alà omú po dehe to jiji lọ po sẹ̀ bleun, taidi to yujẹhọn de whenu.+ 10  Dodonọ na jaya, na e ko mọ ahọsuyiyi do mẹylankan lẹ ji wutu;+ Ohùn mẹylankan lẹ tọn na hẹn afọ etọn yọ̀n.+ 11  Whenẹnu, gbẹtọ lẹ na dọmọ: “Matin ayihaawe, ale de tin na dodonọ.+ Jiwheyẹwhe de tin nugbonugbo he nọ dawhẹna aigba.”+

Nudọnamẹ Odò Tọn

Pọ́n Zẹm.
Kavi “gblezọn.”
To paa mẹ, “sọn adọ̀mẹ.”
Kavi “kinnikinni winyanwinyan.”
To paa mẹ, “to yiyọ́.”