Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 51:1-19

NUHE E BẸHẸN LẸ

  • Odẹ̀ mẹhe lẹnvọjọ de tọn

    • Yè mọhò ṣie to ylando mẹ (5)

    • “Lẹ̀ mi wé sọn ylando ṣie mẹ” (7)

    • “Dá ahun wiwe-ṣeke de do ohò ṣie mẹ” (10)

    • Ahun he to awubla nọ hùnhomẹ na Jiwheyẹwhe (17)

Na anademẹtọ hànjitọ lẹ tọn. Ohàn Davidi tọn, to whenue yẹwhegán Natani wá e dè to whenue Davidi ko zanhẹ Bati-ṣeba godo.+ 51  Jiwheyẹwhe E, do nukundagbe hia mi sọgbe hẹ owanyi nugbo towe.+ Súnsún sẹ́nhẹngba ṣie lẹ sẹ̀ sọgbe hẹ lẹblanu daho towe.+   Klọ́ mi wé pete sọn nuṣiwa ṣie mẹ,+ Bosọ lẹ̀ mi wé sọn ylando ṣie mẹ.+   Na yẹn yọ́n sẹ́nhẹngba ṣie lẹ ganji, Ylando ṣie sọ nọ gbọṣi nukọn ṣie* to whepoponu.+   Hiẹ—yèdọ hiẹ na taun tọn*—wẹ yẹn waylando sọta;+ Yẹn ko wà nuhe ylan to nukun towe mẹ.+ Enẹwutu, hiẹ yin dodonọ to whenue hiẹ dọho, Whẹdida towe sọ sọgbe.+   Pọ́n! Ylanwiwa mẹ wẹ yẹn yin jiji te, Podọ ylando mẹ wẹ onọ̀ ṣie mọhò ṣie te.*+   Pọ́n! Hiẹ nọ tindo homẹhunhun to nugbo he to homẹ dọ́n lọ mẹ;+ Plọn mi nuyọnẹn nugbo to ohò ṣie mẹ dọ́n.   Yí hisọpu do lẹ̀ mi wé sọn ylando ṣie mẹ, na yẹn nido wé-ṣeke;+ Klọ́ mi wé, na yẹn nido wé hú osin-agó.+   Gbọ yẹn ni sè ogbè ayajẹ po aglinjijẹ po tọn, Na ohú he hiẹ ko gídí lẹ nido jaya.+   Lẹ́* nukunmẹ towe sọn ylando ṣie lẹ ji,+ Bo súnsún nuṣiwa ṣie lẹpo sẹ̀.+ 10  Jiwheyẹwhe E, dá ahun wiwe-ṣeke de do ohò ṣie mẹ,+ Bosọ yí gbigbọ yọyọ,+ yèdọ tenọgli tọn de do yẹn mẹ. 11  A tùn mi dlan sọn nukọn towe blo; Podọ a de gbigbọ wiwe towe sọn dè e blo. 12  Hẹn ayajẹ whlẹngán towe tọn gọwá dè e;+ Fọ́n ojlo lọ dote to yẹn mẹ nado nọ setonuna we.* 13  Yẹn na nọ plọn aliho towe lẹ sẹ́nhẹngbatọ lẹ,+ Na ylandonọ lẹ nido lẹkọ do dè we. 14  Whlẹn mi sọn hùnhọ́dudu mẹ,+ Jiwheyẹwhe E, hiẹ Jiwheyẹwhe whlẹngán ṣie tọn,+ Na odẹ́ ṣie nido nọ yí ayajẹ do lá dodowiwa towe.+ 15  Jehovah E, hùn nùflo ṣie lẹ, Na onù ṣie nido nọ lá pipà towe.+ 16  Na hiẹ ma tindo ojlo to avọ́sinsan mẹ—e ma yinmọ, yẹn na sanvọ́ na we;+ Hiẹ ma nọ tindo homẹhunhun to avọ́nunina mimẹ̀ blebu mẹ.+ 17  Avọ́sinsan he nọ hẹn homẹhun Jiwheyẹwhe wẹ awubla sọn ahun mẹ wá; Jiwheyẹwhe E, hiẹ ma na gbẹ́ ahun he jẹflumẹ bo to awubla dai.*+ 18  To ojlo dagbe towe mẹ, wà dagbe na Ziọni; Vọ́ adó Jelusalẹm tọn lẹ do. 19  To whenẹnu, hiẹ na tindo homẹhunhun to avọ́sinsan dodo tọn lẹ mẹ, Yèdọ avọ́sinsan mimẹ̀ po avọ́nunina blebu lẹ po; Whenẹnu wẹ oyìnsú lẹ na nọ yin yíyí do sanvọ́ to agbà towe ji.+

Nudọnamẹ Odò Tọn

Kavi “ayiha ṣie mẹ.”
To paa mẹ, “hiẹ kẹdẹ.”
Kavi “Bo yin ylandonọ sọn whenue gbọ́n onọ̀ ṣie ko mọhò ṣie.”
Kavi “Whlá.”
To paa mẹ, “Hiẹ ni yí gbigbọ ojlo tintindo tọn do nọgodona mi.”
Kavi “ma na vlẹ ahun he jẹflumẹ bo to awubla kò.”