Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 35:1-28

NUHE E BẸHẸN LẸ

  • Odẹ̀ nado yin whinwhlẹn sọn kẹntọ si

    • Kẹntọ lẹ na yin yinyan dogbé (5)

    • Jiwheyẹwhe pipà to togunmẹ (18)

    • Yin wangbẹna matin whẹwhinwhẹ́n (19)

Ohàn Davidi tọn. 35  Jehovah E, yí owhẹ̀ ṣie dọ na mi sọta agọjẹdomẹtọ ṣie lẹ;+ Hoavùn hẹ mẹhe to avùnho hẹ mi lẹ.+   Ze gaglo* towe po awọ̀yinu daho towe po hẹn,+ Bo wá yiavùnlọna mi.+   Ze owhán towe po asiọvi awhàn tọn towe po daga do mẹgbeyantọ ṣie lẹ ji.+ Dọna mi* dọ: “Yẹn wẹ whlẹngán towe.”+   Na mẹhe to ogbé ṣie* yàn lẹ ni mọ winyan bo jẹflumẹ petepete.+ Na mẹhe to wede nado hù mi sudo lẹ ni joagọ po winyan po.   Yé ni taidi ofló tata to jẹhọn nù; Na angẹli Jehovah tọn ni yàn yé dogbé.+   Na ali yetọn ni dozinvlu bo dídí To whenue angẹli Jehovah tọn na to yinyan yé.   Na yẹn ma hùwhẹ de whẹpo yé do tá odọ̀ do nuglọ nado wle mi; Yẹn ma hùwhẹ de whẹpo yé do kùndò dai na mi.*   Nugbajẹmẹji ni wá yé ji to ajiji mẹ; Na odọ̀ he yé tá do nuglọ ni wle yelọsu; Na yelọsu ni jẹ e mẹ bo yin vivasudo.+   Ṣigba, yẹn* na nọ jaya to Jehovah mẹ; Yẹn na nọ jaya to azọ́n whlẹngán tọn etọn lẹ mẹ. 10  Ohú ṣie lẹpo na dọmọ: “Jehovah E, mẹnu wẹ taidi hiẹ? Hiẹ nọ whlẹn agbátọnọ lẹ sọn alọ huhlọnnọ lẹ tọn mẹ,+ Yèdọ agbátọnọ lẹ po wamọnọ lẹ po sọn alọ mẹhe to yé hòdu lẹ tọn mẹ.”+ 11  Kunnudetọ lalonọ lẹ ko tọ́n wá,+ Yé to nuhe yẹn ma yọ́n nudepope gandego lẹ kanbiọ mi. 12  Yé yí oylan do suahọ dagbe tọn mi,+ Bo to hinhẹn mi* biọ aluẹmẹ. 13  Ṣigba, whenue yewlẹ to azọ̀njẹ, yẹn nọ do odẹ́vọ̀; Yẹn nọ sayana dee* gbọn nùbibla dali, Podọ to whenue odẹ̀ ṣie nọ lẹkọwa dè e matin gblọndo,* 14  Yẹn nọ to yìyì pé to aluẹmẹ taidi na họntọn de kavi na nọvisunnu ṣie; Yẹn nọ dokọdò to awubla mẹ taidi mẹhe to aluẹmẹ na onọ̀ etọn. 15  Ṣigba, whenue yẹn jai, yewlẹ jaya bo bẹ yede pli dopọ; Yé bẹ yede pli dopọ bo tọ̀wu dai nado linú mi; Yé tlẹ́n mi do flinflin bo ma nabọẹ. 16  Omẹ jijọ-madi-Jiwheyẹwhe tọn lẹ nọ gbọn vlẹko dali ṣàn mi kò,* Yé nọ dù adúkúnkún do go e.+ 17  Jehovah E, nawẹ e na dẹnsọ bọ hiẹ na to nupọn poun?+ Whlẹn mi* sọn mẹgbeyinyan yetọn lẹ mẹ,+ Yèdọ ogbẹ̀ họakuẹ ṣie sọn alọ kinnikinni winyanwinyan lẹ tọn mẹ.+ 18  Whenẹnu, yẹn na nọ dopẹna we to agun daho mẹ;+ Yẹn na nọ pà we to gbẹtọgun lẹ ṣẹnṣẹn. 19  A dike mẹhe lẹzun kẹntọ ṣie matin whẹwhinwhẹ́n lẹ jẹaglin do ji e blo; A dike mẹhe gbẹwanna mi matin whẹwhinwhẹ́n lẹ+ gbọn kanyinylan dali yẹ́n-awọnlín do mi blo.+ 20  Na yé ma nọ dọho jijọho tọn, Ṣigba, yé nọ gbọn oklọ dali kàn ayiha gigẹdẹ sọta jijọhonọ aigba lọ ji tọn lẹ.+ 21  Yé nọ kẹ̀ onù yetọn pete nado sawhẹdokọna mi, Bo nọ dọmọ: “Ẹn hẹn! Ẹn hẹn! Mí ko yí nukun mítọn lẹ do mọ.” 22  Hiẹ ko mọ ehe, Jehovah E. A gbọṣi abọẹ blo.+ Jehovah E, a dẹn do mi blo.+ 23  Fọ́n bo wá yiavùnlọna mi, Jehovah Jiwheyẹwhe ṣie E, yí owhẹ̀ ṣie dọ na mi. 24  Dawhẹna mi sọgbe hẹ dodowiwa towe,+ Jehovah Jiwheyẹwhe ṣie E; A dike yé jẹaglin do ji e blo. 25  Yé ni ma dọna yedelẹ gbede blo dọ: “Ẹn hẹn! Mí ko mọ nuhe dín mí te.”* Yé ni ma dọ gbede blo dọ: “Mí ko ze e mì.”+ 26  Gbọ yemẹpo ni mọ winyan bo jẹflumẹ petepete, Yèdọ yé mẹhe nọ jẹaglin do yajiji ṣie ji lẹ. Gbọ yé mẹhe ze yede daga do ji e lẹ ni yí winyan po flumẹjijẹ po ṣinyọ́n di avọ̀. 27  Ṣigba, gbọ mẹhe nọ hùnhomẹ to dodowiwa ṣie mẹ lẹ ni yí ayajẹ do dawhá; Na yewlẹ ni nọ to didọ whepoponu dọmọ: “Jehovah ni yin gigopana, yèdọ mẹhe nọ hùnhomẹ to jijọho devizọnwatọ etọn tọn mẹ.”+ 28  To whenẹnu, odẹ́ ṣie na nọ dọho* dodowiwa towe tọn+ Bo na nọ pà we to azán lọ pete ji.+

Nudọnamẹ Odò Tọn

Awọ̀yinu pẹvi de he ogádetọ lẹ nọ saba hẹn.
Kavi “alindọn ṣie.”
Kavi “alindọn ṣie tọn.”
Kavi “alindọn ṣie.”
Kavi “alindọn ṣie.”
Kavi “alindọn ṣie.”
Kavi “alindọn ṣie.”
Kavi “lẹkọwa akọ́n ṣie nù.”
Kavi vlavo, “Omẹ jijọ-madi-Jiwheyẹwhe tọn lẹ nọ ṣanmẹko na akla hìhì wutu.”
Kavi “alindọn ṣie.”
Kavi “Ẹn hẹn! Alindọn mítọn.”
Kavi “lẹnayihamẹpọn do.”