Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 22:1-31

NUHE E BẸHẸN LẸ

  • Sọn flumẹjijẹ mẹ wá pipà mẹ

    • “Jiwheyẹwhe ṣie, naegbọn hiẹ do gbẹ́ mi dai?” (1)

    • “Yé sọ de ovò do avọ̀ ṣie lẹ ji” (18)

    • Jiwheyẹwhe pipà to agun mẹ (22, 25)

    • Aigba pete dona sẹ̀n Jehovah (27)

Na anademẹtọ hànjitọ lẹ tọn; sọgbe hẹ nuhiho he nọ yin “Agbanlin Afọnnu Tọn.”* Ohàn Davidi tọn. 22  Jiwheyẹwhe ṣie, Jiwheyẹwhe ṣie, naegbọn hiẹ do gbẹ́ mi dai?+ Naegbọn hiẹ do dẹn do mi bo ma whlẹn mi, Bosọ dẹn do awhágbe awufiẹsa tọn ṣie?+   Jiwheyẹwhe ṣie, yẹn to yiylọ we mapote to okle, ṣigba hiẹ ma siọ mi;+ Yẹn masọ donù abọẹ to zánmẹ.   Ṣigba, wiwe wẹ hiẹ,+ Bo yin lilẹdope gbọn pipà Islaeli tọn lẹ dali.   Hiẹ go wẹ otọ́ mítọn lẹ dejido;+ Yé dejido gowe, bọ hiẹ nọ whlẹn yé.+   Hiẹ wẹ yé nọ dawhá ylọ bo nọ yin whinwhlẹngán; Yé dejido gowe bo ma yin hinhẹn jẹflumẹ.*+   Ṣigba, owé de poun wẹ yẹn, yẹn ma yin gbẹtọ de gba, Yẹn nọ yin vivlẹ bo nọ yin ṣinṣanko gbọn gbẹtọ lẹ dali.+   Mẹhe to mimọ mi lẹpo wẹ nọ ṣàn mi kò;+ Yé nọ yẹ́n-awọnlín do mi bo nọ mimí ota yetọn po mẹvlẹko po+ dọmọ:   “Ewọ ko ze ede do alọmẹ na Jehovah. Gbọ E ni whlẹn ẹn gán! Gbọ E ni whlẹn ẹn gán, na mẹvivẹ taun de wẹ e yin na Ẹn!”+   Hiẹ wẹ Mẹlọ he hẹn mi jẹgbonu sọn adọ̀mẹ,+ Yèdọ Mẹlọ he hẹn mi tindo numọtolanmẹ hihọ́ tọn to akọ́n onọ̀ ṣie tọn nù. 10  Sọn jiji whenu gbọ́n wẹ yẹn ko yin zizedo alọmẹ na we; Sọn adọ̀ onọ̀ ṣie tọn mẹ gbọ́n wẹ hiẹ ko yin Jiwheyẹwhe ṣie. 11  A nọla na mi blo, na nuhahun lẹ ko wá+ Podọ yẹn ma tindo alọgọtọ devo de.+ 12  Oyìnsú winyanwinyan susu ko lẹdo mi pé;+ Oyìnsú winyanwinyan huhlọnnọ Baṣani tọn lẹ ko lẹdo mi pé.+ 13  Yé kẹ̀ onù yetọn pete nado hù mi sudo,+ Taidi kinnikinni de he to lìlì bo to nuhe e wle tlẹ́n do flinflin.+ 14  Yẹn ko yin kinkọnyinai taidi osin; Ohú ṣie lẹpo ko sẹ̀. Ahun ṣie ko yọ́ taidi osẹ̀n;+ E ko yọ́ to ohò ṣie mẹ dọ́n.+ 15  Huhlọn ṣie ko hú taidi zẹ́nkla de;+ Odẹ́ ṣie nọ tẹdo ayọ̀npọ́n ṣie lẹ go;+ Hiẹ to hinhẹn mi wá odò biọ kọ́gudu okú tọn mẹ.+ 16  Na avún lẹ ko lẹdo mi pé;+ Yé glọn mi do taidi pipli ylanwatọ lẹ tọn,+ Yé zlọn jẹ alọ po afọ ṣie lẹ po ji taidi kinnikinni de.+ 17  Yẹn sọgan hia ohú ṣie lẹ.+ Yé to pinpọn mi bo bọnukundona mi. 18  Yé má awù ṣie lẹ to yede ṣẹnṣẹn, Yé sọ de ovò do avọ̀ ṣie lẹ ji.+ 19  Ṣigba, Jehovah E, a dẹn do mi blo.+ Hiẹ wẹ huhlọn ṣie; yawu wá gọalọna mi.+ 20  Whlẹn mi* sọn ohí nù, Yèdọ ogbẹ̀ họakuẹ ṣie sọn ofẹ̀n avún lẹ tọn nù;+ 21  Whlẹn mi sọn onù kinnikinni tọn mẹ+ podọ sọn azò oyìn gbémẹ tọn lẹ tọn nù; Siọ mi bo whlẹn mi. 22  Yẹn na lá oyín towe na nọvisunnu ṣie lẹ;+ Yẹn na pà we to agun ṣẹnṣẹn.+ 23  Mì mẹhe dibusi Jehovah lẹ emi, mì pà ẹ! Mì kúnkan* Jakọbu tọn lẹpo emi, mì pagigona ẹn!+ Mì dibusi i, mì kúnkan* Islaeli tọn lẹpo emi. 24  Na ewọ ma ko vlẹ kavi yí nukunpẹvi do pọ́n yajiji mẹhe yè to kọgbidina lọ tọn;+ E ma ko whlá nukunmẹ etọn do e.+ To whenue ewọ dawhá hlan ẹn na alọgọ, e sè.+ 25  Yẹn na nọ pà we to agun daho ṣẹnṣẹn;+ Yẹn na nọ de opà ṣie lẹ to mẹhe dibusi i lẹ nukọn. 26  Homẹmimiọnnọ na dù bo gọ́ho;+ Mẹhe to Jehovah dín lẹ na nọ pà ẹ.+ Na hiẹ ni duvivi ogbẹ̀ tọn* kakadoi. 27  Opodo aigba tọn lẹpo wẹ na flin bo lẹhlan Jehovah dè. Whẹndo lẹpo to akọta lẹ mẹ wẹ na litai to nukọn towe.+ 28  Na Jehovah wẹ ahọlu;+ Ewọ wẹ duahọlu do akọta lẹ ji. 29  Mẹhe onú yọ́n na* to aigba ji lẹpo wẹ na dù bo litai; Mẹhe to tejẹ yì kọ́gudu mẹ lẹpo na jẹklo to nukọn etọn; Depope to yé mẹ ma gán hẹn ede* dogbẹ̀. 30  Kúnkan yetọn lẹ* na nọ sẹ̀n ẹn; Whẹndo he ja to nukọn mẹ lẹ na yin hodọna gando Jehovah go. 31  Yé na nọ wá bo dọho gando dodowiwa etọn go. Yé na nọ dọ nuhe e ko wà lẹ na mẹhe na wá yin jiji to nukọn mẹ lẹ.

Nudọnamẹ Odò Tọn

Vlavo nuhiho de kavi húnhiho wunmẹ de.
Kavi “ma duwinyan.”
Kavi “alindọn ṣie.”
To paa mẹ, “okún.”
To paa mẹ, “okún.”
To paa mẹ, “Na ahun towe ni nọgbẹ̀.”
To paa mẹ, “Mẹhe dojó lẹ.”
Kavi “alindọn etọn.”
To paa mẹ, “Okún de.”