Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu lẹ 135:1-21

NUHE E BẸHẸN LẸ

  • Mì pà Jah na kiklo-yinyin etọn

    • Ohia po azọ́njiawu lẹ po sọta Egipti (8, 9)

    • “Oyín towe na gbọṣi aimẹ” (13)

    • Boṣiọ lẹ ma tindo gbọfufu (15-18)

135  Mì pà Jah!* Mì pà oyín Jehovah tọn; Mì na ẹn pipà, mì devizọnwatọ Jehovah tọn lẹ emi,+   Mì mẹhe nọ ṣite to ohọ̀ Jehovah tọn mẹ lẹ, Yèdọ to awánu ohọ̀ Jiwheyẹwhe mítọn tọn lẹ mẹ.+   Mì pà Jah, na Jehovah yọ́n.+ Mì nọ jihàn pipà tọn lẹ do pà oyín etọn, na e yọ́n domọ.   Na Jah ko de Jakọbu na ede, Yèdọ Islaeli taidi nutindo vonọtaun* etọn.+   Na yẹn yọnẹn ganji dọ Jehovah klo; Oklunọ mítọn klohu yẹwhe he pò lẹpo.+   Jehovah nọ wà nudepope he yọ́n to nukun etọn mẹ+ To olọn mẹ podọ to aigba ji, to ohù lẹ mẹ podọ to hùzànmẹ.   E nọ hẹn aslọ* lẹ hẹji sọn opodo aigba tọn lẹ; Ewọ wẹ nọ hẹn abì zẹ̀ to jikun whenu;* Ewọ wẹ nọ hẹn jẹhọn tọ́njẹgbonu sọn agbànhọ etọn lẹ mẹ.+   Ewọ wẹ hù plọnji Egipti tọn lẹ, Yèdọ gbẹtọ po kanlin po.+   E do ohia lẹ po azọ́njiawu lẹ po hlan ṣẹnṣẹn towe, Egipti E,+ Yèdọ sọta Falo po devizọnwatọ etọn lẹpo po.+ 10  E và akọta susu+ Bo hù ahọlu huhlọnnọ lẹ+ 11  —Yèdọ Sihọni ahọlu Amolinu lẹ tọn,+ Po Ogi ahọlu Baṣani tọn po,+ Gọna ahọluduta Kenani tọn lẹpo. 12  E yí aigba yetọn na omẹ etọn lẹ taidi ogú de, Yèdọ ogú de na Islaeli omẹ etọn lẹ.+ 13  Jehovah E, oyín towe na gbọṣi aimẹ kakadoi. Jehovah E, yindidi* towe na gbọṣi aimẹ sọn whẹndo de mẹ jẹ devo mẹ.+ 14  Na Jehovah na yiavùnlọna* omẹ etọn lẹ,+ Bo nasọ do awuvẹmẹ hia devizọnwatọ etọn lẹ.+ 15  Fataka po sika po wẹ yè yí do basi boṣiọ akọta lẹ tọn, Yèdọ alọnuzọ́n gbẹtọvi tọn.+ 16  Yé tindo onù, ṣigba yé ma gán dọho;+ Yé tindo nukun, ṣogan yé ma gán mọnú; 17  Yé tindo otó, ṣigba yé ma gán sènu. Gbọfufu de ma to onù yetọn mẹ.+ 18  Mẹhe nọ basi yé lẹ na wá lẹzun yelọsu nkọ,+ Kẹdẹdi mẹhe nọ dejido yé go lẹpo.+ 19  Whédo Islaeli tọn E, mì pà Jehovah. Whédo Aalọn tọn E, mì pà Jehovah. 20  Whédo Levi tọn E, mì pà Jehovah.+ Mì mẹhe nọ dibusi Jehovah lẹ emi, mì pà Jehovah. 21  Na Jehovah ni yin pipà sọn Ziọni,+ Yèdọ Ewọ he nọ nọ̀ Jelusalẹm.+ Mì pà Jah!+

Nudọnamẹ Odò Tọn

Kavi “Halelujah!” “Jah” yin sándogli yinkọ lọ Jehovah tọn.
Kavi “họakuẹ.”
Kavi “azọ̀.”
Kavi vlavo, “nọ de osinwhín na jikun.”
Kavi “oyín.” To paa mẹ, “oflin.”
Kavi “yí owhẹ̀ dọ na.”