Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Salmu 106:1-48

NUHE E BẸHẸN LẸ

  • Islaeli ma yọ́n pinpẹn nutọn

    • Yé yawu wọn nuyiwa Jiwheyẹwhe tọn lẹ (13)

    • Yé ze gigo Jiwheyẹwhe tọn jo na oyìnsú (19, 20)

    • Yé ma yise to opagbe Jiwheyẹwhe tọn mẹ (24)

    • Yé sẹ̀n Baali (28)

    • Yé yí ovi lẹ do sanvọ́ na aovi lẹ (37)

106  Mì pà Jah!* Mì nọ dopẹna Jehovah, na ewọ yọ́n;+ Owanyi nugbo etọn na gbọṣi aimẹ kakadoi.+   Mẹnu wẹ sọgan lá azọ́n huhlọnnọ Jehovah tọn lẹ to gigọ́ mẹ Kavi hẹn azọ́n etọn he jẹna pipà lẹpo zun yinyọnẹn?+   Ayajẹnọ wẹ mẹdepope he nọ yinuwa po whẹdida dodo po, Bosọ nọ wà nuhe sọgbe to whelẹponu.+   Jehovah E, nọ flin mi to whenue hiẹ to nukundagbe* dohia omẹ towe lẹ.+ Nọ yí azọ́n whlẹngán tọn towe lẹ do penukundo go e,   Na yẹn nido nọ duvivi dagbewà he a nọ dohia mẹdide towe lẹ tọn,+ Na yẹn nido nọ jaya hẹ akọta towe, Bo nọ yí awagundido do pà we hẹ ogú towe.   Mí ko waylando kẹdẹdile tọgbo mítọn lẹ wà do;+ Mí ko ṣinuwa; mí ko yinuwa po kanyinylan po.+   Tọgbo mítọn lẹ to Egipti ma yọ́n pinpẹn* azọ́njiawu towe lẹ tọn. Yé ma flin owanyi nugbo susugege towe, Ṣigba, yé ṣiatẹ to ohù lọ, yèdọ Ohù Vẹẹ kọ̀n.+   Ṣigba, ewọ whlẹn yé na oyín etọn wutu,+ Nado hẹn huhlọn etọn zun yinyọnẹn.+   Ewọ degbedo Ohù Vẹẹ bọ e hú; E sọ plan yé gbọn hùzànmẹ taidi dọ danfafa de ji gbọn wẹ yé te nkọ;+ 10  E whlẹn yé sọn alọ mẹgbeyantọ yetọn tọn mẹ+ Bo yí yé sọn alọ kẹntọ lọ tọn mẹ.+ 11  Osin lẹ ṣinyọ́n kẹntọ yetọn lẹ; Depope to yé mẹ ma họ̀ngán.*+ 12  Whenẹnu wẹ yé tindo yise to opagbe etọn mẹ;+ Yé jẹ hànji ji nado pà ẹ.+ 13  Ṣigba, yé yawu wọn nuhe ewọ ko wà lẹ;+ Yé masọ nọtepọn ayinamẹ etọn. 14  Yé joawuna ojlo ṣejannabi tọn yetọn lẹ to danfafa ji;+ Yé sọ whlé Jiwheyẹwhe pọ́n to danfafa lọ ji.+ 15  Ewọ na yé nuhe yé biọ, Amọ́ to enẹgodo, e yí azọ̀nylankan do hò yé bọ yé* jẹ kúkú ji.+ 16  To osla lọ mẹ, yé jẹ awuwhàn Mose ji Gọna Aalọn,+ omẹ wiwe Jehovah tọn.+ 17  To whenẹnu, aigba kẹnù bo mì Datani Bosọ bọnùdo mẹhe pli dopọ hẹ Abilami lẹ.+ 18  Miyọ́n de jẹte do pipli yetọn ṣẹnṣẹn; Miyọ́n he to jiji de sọ và mẹylankan lọ lẹ sudo.+ 19  Yé basi oyìnvu de to Holẹbi Bo dẹ́ do odò na boṣiọ kinkọ̀n de;+ 20  Yé ze gigo ṣie jo na Boṣiọ oyìnsú he nọ dù ogbé de tọn.+ 21  Yé wọn Jiwheyẹwhe+ Whlẹngántọ yetọn, He wà nujiawu lẹ to Egipti,+ 22  Yèdọ azọ́njiawu lẹ to aigba Ham tọn ji,+ Podọ azọ́n he dobu lẹ to Ohù Vẹẹ kọ̀n.+ 23  Ewọ ko dibla degbe dọ yé ni yin kúnsúdona, Ṣigba, Mose mẹdide etọn vẹvẹna ẹn* Nado jo homẹgble nuvasudotọ etọn do.+ 24  Enẹgodo, yé yí nukunpẹvi do pọ́n aigba dagbe lọ;+ Yé ma tindo yise depope to opagbe etọn mẹ.+ 25  Yé nọ to nuhlundọ mapote to gòhọ yetọn lẹ mẹ;+ Yé masọ dotoaina ogbè Jehovah tọn.+ 26  Enẹwutu, e ze alọ etọn daga bo whlé gando yé go Dọ ewọ na hẹn yé nado jai to danfafa lọ ji;+ 27  E na hẹn kúnkan yetọn lẹ nado jai to akọta lẹ ṣẹnṣẹn, Podọ e na vúnvún yé pé gbọn aigba lọ lẹ ji.+ 28  Enẹgodo, yé kọnawudopọ to Baali Peọli tọn sinsẹ̀n mẹ,+ Bo dù núdùdù he yè yí do sanvọ́ na oṣiọ lẹ.* 29  Yé doadihomẹna Ẹn gbọn nuyiwa yetọn lẹ dali,+ Azọ̀nylankan de sọ gbajẹgbonu to ṣẹnṣẹn yetọn.+ 30  Ṣigba, to whenue Finehasi fọ́n bo dademẹ, Azọ̀nylankan lọ doalọte.+ 31  Ehe sọ yin hihia hlan ẹn di dodowiwa To whẹndo lẹpo mẹ kakadoi.+ 32  Yé doadihomẹna Ẹn to osin Mẹliba* tọn lẹ kọ̀n, Bọ nugbajẹmẹji wá Mose ji na yewlẹ tọn wutu.+ 33  Yé hẹn ẹn gblehomẹ, Bọ ewọ ma lẹnnupọn whẹpo do dọho.+ 34  Yé ma sukúndona gbẹtọ lọ lẹ,+ Dile Jehovah ko degbe etọn na yé do.+ 35  Ṣigba, yé kọ̀n yede dopọ hẹ akọta lọ lẹ+ Bo kẹalọyi* aliho nuyiwa tọn yetọn lẹ.+ 36  Yé jẹ boṣiọ yetọn lẹ sẹ̀n ji,+ Bọ ehelẹ wá lẹzun omọ̀ de na yé.+ 37  Yé nọ yí visunnu yetọn lẹ Po viyọnnu yetọn lẹ po do sanvọ́ na aovi lẹ.+ 38  Yé nọ to ohùn homẹvọnọ tọn sọndai mapote,+ Yèdọ ohùn visunnu po viyọnnu yetọn titi lẹ po tọn He yé yí do sanvọ́ hlan boṣiọ Kenani tọn lẹ;+ Aigba lọ sọ yin hinhẹnflu po hùnsọndai po. 39  Azọ́n yetọn lẹ hẹn yé zun mawé; Yé lọga to gbigbọ-liho gbọn nuyiwa yetọn lẹ dali.+ 40  Enẹwutu, Jehovah gblehomẹ sinsinyẹn do omẹ etọn lẹ go, Bo wá gbẹwanna ogú etọn. 41  Whlasusu wẹ ewọ jo yé do alọ akọta lẹ tọn mẹ,+ Na mẹhe gbẹwanna yé lẹ nido dugán do yé ji.+ 42  Kẹntọ yetọn lẹ gbidikọna yé, Bọ yé wá lẹzun mẹmẹglọ. 43  Whlasusu wẹ ewọ whlẹn yé,+ Ṣigba, yé nọ ṣiatẹ bo nọ vẹtoli,+ Bọ yé nọ yin hinhẹnwa odò, na nuṣiwa yetọn wutu.+ 44  Ṣigba, ewọ nọ mọ ayimajai yetọn+ Bo nọ sè awhágbe yetọn na alọgọ.+ 45  Na yewlẹ tọn wutu, ewọ nọ flin alẹnu etọn, Bọ onú yetọn nọ blawuna ẹn,* na owanyi nugbo daho* etọn nọ whàn ẹn wutu.+ 46  Ewọ nọ hẹn ẹn yọnbasi bọ onú yetọn nọ wàlẹblanuna Mẹhe wle yé do kanlinmọgbenu lẹpo.+ 47  Jehovah Jiwheyẹwhe mítọn E, whlẹn mí,+ Bo bẹ mí pli sọn akọta lẹ ṣẹnṣẹn+ Na míwlẹ nido pà oyín wiwe towe Bo jẹaglin do pà we.*+ 48  Na Jehovah Jiwheyẹwhe Islaeli tọn ni yin pipà Kaka sọyi mavọmavọ.*+ Podọ mì gbọ mẹlẹpo ni dọ, “Niṣẹ!”* Mì pà Jah!

Nudọnamẹ Odò Tọn

Kavi “Halelujah!” “Jah” yin sándogli yinkọ lọ Jehovah tọn.
Kavi “ojlo dagbe.”
Kavi “ma mọnukunnujẹ.”
Kavi “ma pò.”
Kavi “alindọn yetọn.”
To paa mẹ, “nọte to nukọn etọn to nùvo lọ nù.”
Enẹ wẹ, avọ́sinsan he nọ yin bibasi hlan mẹkúkú lẹ kavi yẹwhe he ma tindo gbọfufu lẹ.
Zẹẹmẹdo “Whẹgbè Dido.”
Kavi “plọn.”
Kavi “Bọ e nọ vẹna ẹn.”
Kavi “susugege.”
Kavi “jẹaglin to pipà towe mẹ.”
Kavi “Sọn madopodo jẹ madopodo.”
Kavi “Amẹn” to Heblugbe mẹ.