Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 9:1-43

9  Ṣigba, Saulu he gbẹ́ pò to gbigbọ budonamẹ tọn po mẹhuhu tọn po gbọ sọta devi Oklunọ tọn lẹ+ yì yẹwhenọ daho lọ dè  bo biọ to e si nado na ẹn wekanhlanmẹ lẹ na sinagọgu he to Damasku lẹ, na e nido sọgan hẹn mẹdepope he e mọ bọ e yin Aliho Lọ* tọn+ wá Jelusalẹm biblá, yèdọ sunnu po yọnnu po.  Todin, dile e to gbejizọnlinzin bo sẹpọ Damasku, hinhọ́n de họ́n lẹdo e pé sọn olọn to ajiji mẹ,+  ewọ sọ jai do kọmẹ bo sè ogbè de dọna ẹn dọmọ: “Saulu, Saulu, naegbọn hiẹ do to homẹkẹndo mi?”  Ewọ kanse dọmọ: “Hiẹ mẹnu wẹ, Oklunọ?” E dọmọ: “Yẹn Jesu wẹ,+ mẹhe hiẹ to homẹkẹndo.+  Ṣigba, fọ́n bo biọ tòdaho lọ mẹ, nuhe hiẹ dona wà nasọ yin didọna we.”  Todin, sunnu he to gbejizọnlinzin hẹ ẹ lẹ ṣite abọẹ, yé to nudidọ ogbè de tọn sè nugbo, ṣigba yé ma mọ mẹdepope.+  Enẹgodo, Saulu fọ́n sọn kọmẹ, podọ dile nukun etọn lẹ tlẹ to hùnhùn e ma to nudepope mọ. Enẹwutu, yé hẹn alọ na ẹn bo plan ẹn yì Damasku.  Podọ na azán atọ̀n, e ma mọ nudepope,+ mọdopolọ e masọ dù kavi nù. 10  Devi de tin to Damasku he nọ yin Ananias,+ Oklunọ sọ dọna ẹn to numimọ de mẹ dọmọ: “Ananias!” Ewọ dọmọ: “Yẹn die, Oklunọ.” 11  Oklunọ dọna ẹn dọmọ: “Fọ́n, yì tòhomẹ-liho he nọ yin yiylọdọ Jijlọ lọ ji, podọ to owhé Juda tọn gbè, dín dawe de he nọ yin Saulu, he wá sọn Talsu.+ Pọ́n! ewọ to dẹ̀ho, 12  podọ to numimọ de mẹ, e ko mọ dawe de he nọ yin Ananias wá e dè bo ze alọ etọn lẹ do e ji, na ewọ nido sọgan mọnú.”+ 13  Ṣigba, Ananias gblọn dọmọ: “Oklunọ, yẹn ko sè sọn mẹsusu dè dogbọn dawe ehe dali, yèdọ nuylankan lọ lẹpo he e ko wà na omẹ wiwe towe lẹ to Jelusalẹm. 14  Podọ tofi, e mọ aṣẹ yí sọn yẹwhenọgán lẹ dè nado wle* mẹhe to oyín towe ylọ lẹpo do gànpamẹ.”+ 15  Ṣigba, Oklunọ dọna ẹn dọmọ: “Yì! na núzinzan dide de wẹ dawe ehe yin na mi+ nado hẹn oyín ṣie yì akọta lẹ,+ ahọlu lẹ+ po ovi Islaeli tọn lẹ po dè. 16  Na yẹn na do nususu he ewọ dona jiya etọn na oyín ṣie tọn wutu lẹ hia ẹ hezeheze.”+ 17  Enẹwutu, Ananias yì bo biọ owhé lọ gbè, ewọ sọ ze alọ etọn lẹ do e ji bo dọmọ: “Mẹmẹsunnu Saulu, Oklunọ lọ Jesu he sọawuhia we to aliho he ji hiẹ gbọn wá, ko do mi hlan, na hiẹ nido sọgan mọnú bo gọ́ na gbigbọ wiwe.”+ 18  Podọ to afọdopolọji, nuhe taidi ohán lẹ flẹ sọn nukun etọn lẹ ji, ewọ sọ mọnú. Enẹgodo, e fọ́n bo yin bibaptizi, 19  e sọ dùnú bo gọ̀ huhlọn mọyi. Na azán delẹ, e nọhẹ devi lẹ to Damasku,+ 20  podọ to afọdopolọji, e jẹ yẹwhehodọ ji gando Jesu go to sinagọgu lẹ mẹ, dọ Visunnu Jiwheyẹwhe tọn wẹ ewọ. 21  Ṣigba, avò vò mẹhe to ohó etọn sè lẹpo bọ yé to didọmọ: “Be e ma yin dawe he gbà mẹhe nọ ylọ oyín ehe to Jelusalẹm lẹ do lọ die ya?+ Be ewọ ma ko sọ wáfi nado wle yé bo hẹn yé yì* yẹwhenọgán lẹ dè ya?”+ 22  Ṣigba, Saulu to huhlọn mọyi dogọ janwẹ bo nọ hẹn awuji Ju he nọ nọ̀ Damasku lẹ dile e nọ to didohia to aliho he họnwun mẹ dọ ehe wẹ Klisti lọ.+ 23  Todin, to whenue azán susu ko juwayi, Ju lẹ dewé dopọ nado hù i.+ 24  Ṣigba, núbibla yetọn sọta Saulu lẹzun yinyọnẹn na ẹn. Yé sọ to họngbo lẹ ṣọ́ sinsinyẹn to okle po ozán po nado sọgan hù i. 25  Enẹwutu, devi etọn lẹ ze e bo hẹn ẹn jẹte to ohà de mẹ gbọn nùvo adó tòdaho lọ tọn de mẹ to zánmẹ.+ 26  To whenue e jẹ Jelusalẹm,+ e dovivẹnu nado kọnawudopọ hẹ devi lẹ, ṣigba yemẹpo to budina ẹn, na yé ma yise dọ e ko lẹzun devi de. 27  Enẹwutu, Balnaba+ gọalọna ẹn bo plan ẹn yì apọsteli lẹ dè, ewọ sọ basi zẹẹmẹ na yé to gigọ́ mẹ lehe e mọ Oklunọ do to aliji+ bọ e dọhona ẹn, podọ lehe e ko yí adọgbigbo do dọho to oyín Jesu tọn mẹ to Damasku do.+ 28  Enẹwutu, e gbọṣi yé dè bo to yìyì po awuvivo po* to Jelusalẹm bosọ yí adọgbigbo do to hodọ to oyín Oklunọ tọn mẹ. 29  E to hodọ bo to nudọn hẹ Ju he nọ do Glẹkigbe lẹ, ṣigba omẹ ehelẹ tẹnpọn nado hù i.+ 30  To whenue mẹmẹsunnu lẹ sè gando ehe go, yé hẹn ẹn wá Sesalea bo do e hlan Talsu.+ 31  To whenẹnu, na nugbo tọn, agun he tin lẹdo Jude po Galili po gọna Samalia lẹpo pé+ biọ ojlẹ jijọho tọn de mẹ bo to yinyin hinhẹn lodo; podọ agun lọ pete to jijideji dile e zindonukọn nado to budisi Jehovah* bosọ to gbẹnọ sọgbe hẹ homẹmimiọn he gbigbọ wiwe nọ namẹ.+ 32  Todin, dile Pita to gbejizọnlinzin gbọn lẹdo lọ lẹpo mẹ, e sọ wá omẹ wiwe he nọ nọ̀ Lidda lẹ dè ga.+ 33  E mọ dawe de to finẹ he nọ yin Enea, he ko tin to aimimlọn to adọzan etọn ji na owhe ṣinatọ̀n, na e to awukuzọ̀n jẹ wutu. 34  Pita sọ dọna ẹn dọmọ: “Enea, Jesu Klisti hẹnazọ̀ngbọna we.+ Fọ́n bo vọ́ adọzan towe jlado.”+ Ewọ sọ fọ́n to afọdopolọji. 35  Whenue mẹhe nọ nọ̀ Lidda po Dankló Ṣalọni tọn po ji lẹpo mọ ẹn, yé lẹhlan Oklunọ dè. 36  Todin, devi de tin to Jọppa he nọ yin Tabita ehe lẹdogbedevomẹ etọn zẹẹmẹdo “Dọlka.”* E sù to azọ́n dagbe lẹ po nunina lẹblanu tọn he e nọ basi lẹ po mẹ. 37  Ṣigba, to azán enẹlẹ gbè, e jẹazọ̀n bo kú. Enẹwutu, yé lawu na ẹn bo tẹ́ ẹ do abò aga tọn de mẹ. 38  Na Lidda ma dẹn do Jọppa wutu, whenue devi lẹ sè dọ Pita tin to tòdaho enẹ mẹ, yé do omẹ awe hlan ẹn nado vẹ̀ ẹ dọmọ: “Jaale, wá mí dè madọngbàn.” 39  Enẹwutu, Pita fọ́n bo yì po yé po. Podọ to whenue e jẹ finẹ, yé plan ẹn yì abò aga tọn lọ mẹ; asuṣiọsi lẹpo sọ wá bo to avivi bosọ to awù po tewu* susu po dohia, ehe Dọlka ko basi to whenue e gbẹ́ pò to yé dè. 40  Pita sọ de mẹlẹpo tọ́njẹgbonu+ bo jẹklo bosọ hodẹ̀. Enẹgodo, e lẹhlan oṣiọ lọ bo dọmọ: “Tabita, fọ́n!” Ewọ hùn nukun podọ dile e mọ Pita, e fọ́n sinai.+ 41  To whenue e hẹn alọ na ẹn, e fọ́n ẹn ṣite, podọ e ylọ omẹ wiwe lẹ po asuṣiọsi lọ lẹ po bo do e hia yé gbẹ̀te.+ 42  Ehe lẹzun yinyọnẹn lẹdo Jọppa lẹpo pé, mẹsusu sọ yise to Oklunọ mẹ.+ 43  Ewọ sọ gbọṣi Jọppa na azán vude to Simọni, he yin ayúzọ́nwatọ de dè.+

Nudọnamẹ Odò Tọn

Ehe to alọdlẹndo aliho gbẹninọ tọn po nuplọnmẹ Klistiani tọn po.
To paa mẹ, “blá; do gẹdẹ.”
To paa mẹ, “bo blá yé hẹn yì.”
To paa mẹ, “to yìyì bosọ to gigọ̀.”
Pọ́n Nud. A5.
Yinkọ Glẹkigbe tọn lọ Dọlka po yinkọ Alamaikigbe tọn lọ Tabita po zẹẹmẹdo “Otẹgbọẹ.”
Kavi “awugbó.”