Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 6:1-15

NUHE E BẸHẸN LẸ

  • Sunnu ṣinawe yin dide nado yilizọn (1-7)

  • Stefani yin owhẹ̀ nùzinzan tọn sadokọna (8-15)

6  Todin, to azán enẹlẹ gbè, to whenue sọha devi lẹ tọn to jijideji, Ju he nọ do Glẹkigbe lẹ jẹ lewu ji sọta Ju he nọ do Heblugbe lẹ, na yè to vọdona asuṣiọsi yetọn lẹ to núdùdù mimá egbesọegbesọ tọn mẹ wutu.+  Enẹwutu, omẹ Wiawe lẹ ylọ agundaho devi lẹ tọn pli bo dọmọ: “E ma sọgbe* dọ mí ni jo ohó Jiwheyẹwhe tọn do nado to núdùdù má do tafo lẹ ji.+  Enẹwutu, mẹmẹsunnu lẹ emi, mì de sunnu ṣinawe he tindo oyín dagbe*+ to mìde ṣẹnṣẹn, yèdọ mẹhe gọ́ na gbigbọ po nuyọnẹn po,+ na mí nido sọgan de yé do whẹho titengbe ehe ji;+  ṣigba, míwlẹ na ze míde jo na odẹ̀ podọ na lizọnyizọn ohó lọ tọn.”  Nuhe yé dọ sọ hẹn homẹhun agundaho lọ pete, yé sọ de Stefani, dawe de he gọ́ na yise po gbigbọ wiwe po, podọ Filipi,+ Plokolu, Nikanoli, Timoni, Palmena gọna Nikola, he yin mẹdiọzun Ju Antioku tọn de.  Yé sọ hẹn yé wá apọsteli lẹ dè, podọ to dẹ̀hiho godo, apọsteli lẹ ze alọ do yé ji.+  Taidi kọdetọn de, ohó Jiwheyẹwhe tọn to gbigbayipe zọnmii,+ podọ sọha devi lẹ tọn to jijideji susu tlala+ to Jelusalẹm; yẹwhenọ susu sọ lẹzun yisenọ.+  Todin, Stefani, mẹhe gọ́ na nukundagbe Jiwheyẹwhe tọn po huhlọn po, to nujiawu* po ohia daho lẹ po basi to gbẹtọ lẹ ṣẹnṣẹn.  Ṣigba, sunnu delẹ sọn mẹhe wá sọn fihe yè nọ ylọdọ Sinagọgu Mẹtundote lẹ tọn mẹ fọ́n wá, to pọmẹ hẹ Silenenu po Alẹkzandlinu delẹ po, gọna mẹdelẹ he wá sọn Silisia po Asia po, nado dọnnu hẹ Stefani. 10  Ṣigba, yé ma sọgan jlẹ́te hẹ nuyọnẹn po gbigbọ he ewọ yí do to hodọ po.+ 11  To whenẹnu, yé diọlinlẹnna mẹdelẹ to nuglọ nado dọmọ: “Mí sè bọ ewọ to ohó nùzinzan tọn lẹ dọ sọta Mose po Jiwheyẹwhe po.” 12  Yé sọ hẹn gbẹtọ lẹ po mẹho lẹ po gọna wekantọ lẹ nado fọnadán, podọ yé wá e ji to ajiji mẹ bo wle e gánnugánnu bosọ plan ẹn yì Whẹdatẹn Daho Ju lẹ tọn.* 13  Yé sọ hẹn kunnudetọ lalonọ lẹ wá, he dọmọ: “Dawe ehe ma doalọtena hodidọ sọta ofi wiwe ehe podọ sọta Osẹ́n lọ. 14  Di apajlẹ, mí sè bọ e dọ dọ Jesu Nazalẹti tọn ehe na họ́ ofi ehe liai bo diọ aṣa he Mose ko jo dai na mí lẹ.” 15  Podọ dile mẹhe sinai to Whẹdatẹn Daho Ju lẹ tọn lọ mẹ lẹpo zín nukun do e ji, yé mọdọ nukunmẹ etọn taidi nukunmẹ angẹli de tọn.

Nudọnamẹ Odò Tọn

To paa mẹ, “yin homẹhunnu.”
Kavi “sunnu ṣinawe he linlin dagbe nọ yin nina gando yé go.”
Kavi “nudabla.”
To paa mẹ, “Sanhedlin.” Pọ́n Zẹm.