Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 4:1-37

4  Dile yé omẹ awe lẹ to hodọna gbẹtọ lẹ, yẹwhenọ lẹ po ogán tẹmpli-ṣọ́tọ lẹ tọn po gọna Sadusi lẹ+ wá yé ji to ajiji mẹ.  Homẹgble omẹ ehelẹ, na apọsteli lẹ to gbẹtọ lẹ plọn bo to fọnsọnku Jesu tọn sọn oṣiọ lẹ mẹ lá* to aliho he họnwun mẹ wutu.+  Yé sọ wle yé bo sú yé do gànmẹ+ jẹ azán awetọ gbè, na owhè ko jai wutu.  Ṣigba, susu mẹhe ko dotoaina hodidọ lọ lẹ tọn yise, podọ sọha sunnu lọ lẹ tọn lẹzun nudi 5 000.+  To aihọngbè, ogán yetọn lẹ, mẹho lẹ po wekantọ lẹ po pli dopọ to Jelusalẹm,  to pọmẹ hẹ Annas+ yẹwhenọgán lọ, Kaifa,+ Johanu, Alẹkzandle po mẹhe yin hẹnnumẹ yẹwhenọgán lọ tọn lẹpo po.  Yé sọ hẹn Pita po Johanu po ṣite to ṣẹnṣẹn yetọn bo jẹ kinkanse yé ji dọmọ: “Gbọn huhlọn tẹ dali kavi to oyín mẹnu tọn mẹ wẹ mì wà ehe te?”  To whenẹnu, Pita gọ́ na gbigbọ wiwe+ bo dọna yé dọmọ: “Mì ogán gbẹtọ lẹ tọn po mẹho lẹ po emi,  eyin yè to dodinna mí to egbé, na dagbe he yin wiwà na dawe sẹkunọ de wutu,+ bọ mì jlo na yọ́n mẹhe hẹn dawe ehe jẹgangan, 10  mì gbọ e ni yin yinyọnẹn hlan mìmẹpo podọ hlan omẹ Islaeli tọn lẹpo, dọ to oyín Jesu Klisti Nazalẹti tọn mẹ,+ mẹhe mìwlẹ hù do pòtin ji,+ ṣigba he Jiwheyẹwhe fọ́n sọn oṣiọ lẹ mẹ,+ gbọn omẹ ehe lọ dali wẹ dawe he ṣite tofi lọ do tin to gángán to nukọn mìtọn. 11  Ehe lọ wẹ ‘zannu he mì họ̀dotọ lẹ gbẹ́ dai he ko lẹzun zannu gángánsu họ̀gosu tọn.’+ 12  Humọ, whlẹngán ma tin to mẹdevo de mẹ, na oyín devo de+ ma to olọn glọ he ko yin nina gbẹtọ gbọn ehe dali mí sọgan yin whinwhlẹngán.”+ 13  Todin, to whenue yé mọ adọgbigbo Pita po Johanu po tọn bo mọdọ yé ma sewé* bosọ yin omẹ tata lẹ,+ e paṣa yé. E sọ jẹ hinhọnwun na yé ji dọ yé ko nọ zọnhẹ Jesu dai.+ 14  Dile yé to dawe he ko yin azọ̀nhẹngbọna he ṣite to yé dè lọ pọ́n,+ yé ma yọ́n nuhe yé na gblọn.+ 15  Enẹwutu, yé degbe dọ yé ni tọ́njẹgbonu sọn Whẹdatẹn Daho Ju lẹ tọn* lọ mẹ, yé sọ jẹ wede hẹ ode awetọ ji, 16  dọmọ: “Etẹwẹ mí na wà na dawe ehelẹ?+ Na nugbo tọn, ohia ayidego tọn de ko yin bibasi gbọn yé dali, he họnwun na omẹ Jelusalẹm tọn lẹpo,+ podọ mí ma sọgan mọ́n ehe. 17  Na ehe nikaa yin lilá pé dogọ to gbẹtọ lẹ ṣẹnṣẹn, mì gbọ mí ni vannukundo yé bo gbẹna yé ma nado dọho to oyín ehe mẹ na mẹdepope ba.”+ 18  Enẹwutu, yé ylọ yé bo dosẹ́n na yé ma nado dọho kavi plọnmẹ to oyín Jesu tọn mẹ ba. 19  Amọ́, Pita po Johanu po gblọnna yé dọmọ: “Eyin e sọgbe to nukun Jiwheyẹwhe tọn mẹ nado dotoaina mì kakati nido yin Jiwheyẹwhe, mì yì lẹnpọn. 20  Ṣigba, na míwlẹ tọn, mí ma sọgan nọma dọ nuhe mí ko mọ bosọ sè lẹ.”+ 21  Enẹwutu, to whenue yé ko sọ vannukundo yé dogọ godo, yé tún yé dote, to whenuena e yindọ yé ma mọ dodonu depope nado sayana yé podọ na gbẹtọ lọ lẹ wutu,+ na yemẹpo wẹ to gigopana Jiwheyẹwhe na nuhe ko jọ lọ. 22  Na dawe he yin azọ̀nhẹngbọna to azọ́njiawu-liho lọ ko hú owhe 40 mẹvi. 23  To whenue yé ko yin tuntundote godo, yé yì omẹ yetọn titi lẹ dè bo na linlin yé gando nuhe yẹwhenọgán lẹ po mẹho lẹ po ko dọna yé lẹ go. 24  To whenue yé sè ehe, yé ze ogbè yetọn daga to kọndopọ mẹ hlan Jiwheyẹwhe bo dọmọ: “Oklunọ Nupojipetọ, hiẹ wẹ Mẹlọ he dá olọn, aigba, ohù po nuhe tin to yé mẹ lẹpo po,+ 25  podọ mẹhe gbọn gbigbọ wiwe gblamẹ dọ gbọn onù tọgbo mítọn Davidi,+ devizọnwatọ towe tọn mẹ dọmọ: ‘Naegbọn akọta lẹ do biọ bẹwlu mẹ bọ gbẹtọ lẹ to ayihamẹlẹnpọn do onú ovọ́ lẹ ji? 26  Ahọlu aigba ji tọn lẹ fọnṣite bọ ogán lẹ bẹ yedelẹ pli sọta Jehovah* podọ sọta mẹyiamisisadode* etọn lọ.’+ 27  Na nugbo tọn, Hẹlọdi* po Pọntiu Pilati po+ gọna omẹ akọta lẹ tọn po omẹ Islaeli tọn lẹ po bẹ yedelẹ pli to tòdaho ehe mẹ sọta devizọnwatọ wiwe towe, Jesu, mẹhe hiẹ yiamisisadode,+ 28  nado wà nuhe alọ towe po lẹndai towe po ko dọ jẹnukọn dọ e na jọ lẹ.+ 29  Podọ todin, Jehovah,* doayi nukunvandomẹ yetọn lẹ go bo na afanumẹ towe lẹ nado to ohó towe dọ po adọgbigbo lẹpo po, 30  dile hiẹ dlẹnalọ towe jẹgbonu nado to azọ̀nhẹngbọnamẹ podọ dile ohia lẹ po nujiawu* lẹ po na to yinyin bibasi+ gbọn oyín devizọnwatọ wiwe towe, Jesu tọn gblamẹ.”+ 31  Podọ to whenue yé ko basi ovẹvivẹ,* fihe yé pli dopọ do lọ whàn, dopodopo yetọn sọ gọ́ na gbigbọ wiwe+ bo yí adọgbigbo do to ohó Jiwheyẹwhe tọn dọ.+ 32  Humọ, susugege mẹhe yise lẹ tọn tindo ahun po alindọn* dopo po, podọ mẹdopo tata to yé mẹ ma nọ dọ dọ depope to nuhe e tindo lẹ mẹ yin etọn titi, ṣigba yé tindo nulẹpo to pọmẹ.+ 33  Podọ, apọsteli lẹ yí huhlọn daho do to kunnude zọnmii gando fọnsọnku Oklunọ Jesu tọn go,+ yemẹpo sọ tindo nukundagbe majẹhẹ to gigọ́ mẹ. 34  Na nugbo tọn, mẹdepope ma tin to nuhudo mẹ to yé mẹ,+ na mẹlẹpo he tindo ogle lẹ kavi owhé lẹ nọ sà yé bo nọ hẹn akuẹ nuhe yin sisà lọ lẹ tọn wá 35  bosọ nọ ze yé bọdai do afọ apọsteli lẹ tọn kọ̀n.+ Enẹgodo, yé nọ yin mimá na mẹdopodopo sọgbe hẹ nuhudo etọn.+ 36  Enẹwutu, Josẹfu mẹhe apọsteli lẹ sọ nọ ylọdọ Balnaba+ (he lẹdogbedevomẹ etọn zẹẹmẹdo, “Visunnu Homẹmimiọn tọn”), yèdọ Levinu de, he yin jiji to Kiplu, 37  tindo aigba de, ewọ sọ sà ẹ bo hẹn akuẹ lọ wá bosọ ze e bọdai do afọ apọsteli lẹ tọn kọ̀n.+

Nudọnamẹ Odò Tọn

Kavi “to fọnsọnku sọn oṣiọ lẹ mẹ lá gbọn apajlẹ Jesu tọn yiyizan dali.”
Kavi “agblinọ,” enẹ wẹ, mẹhe ma yin pinplọn to wehọmẹ labi lẹ tọn; e ma yin agblinọ petepete.
To paa mẹ, “Sanhedlin.” Pọ́n Zẹm.
Pọ́n Nud. A5.
Kavi “Klisti.”
Enẹ wẹ, “Hẹlọdi Antipa, visunnu Hẹlọdi Daho lọ tọn.”
Pọ́n Nud. A5.
Kavi “nudabla.”
Kavi “ko hodẹ̀ vivẹvivẹ.”
Pọ́n Zẹm.