Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 3:1-26

3  Todin, Pita po Johanu po jei tẹmpli mẹ to gànhiho odẹ̀ tọn lọ mẹ, yèdọ to gànhiho ṣinẹnẹtọ* mẹ,  dawe de sọ tin he yin sẹkunọ sọn jiji whenu. Podọ egbesọegbesọ wẹ e nọ yin zize wá fie sẹpọ ohọ̀n tẹmpli lọ tọn he nọ yin yiylọdọ Whanpẹnọ, na e nido sọgan nọ biọ nunina lẹblanu tọn lẹ sọn mẹhe to tẹmpli lọ mẹ biọ lẹ si.  To whenue e mọ Pita po Johanu po bọ yé to na biọ tẹmpli lọ mẹ, e jẹ nunina lẹblanu tọn lẹ biọ ji.  Ṣigba, Pita po Johanu po pọ́n ẹn tlintlin, Pita sọ dọmọ: “Pọ́n mí.”  Enẹwutu, e zín nukun etọn do yé ji bo to nukundo nado mọ nude yí sọn yé si.  Ṣigba, Pita dọmọ: “Yẹn ma tindo fataka po sika po, ṣigba nuhe yẹn tindo wẹ yẹn na na we. To oyín Jesu Klisti Nazalẹti tọn mẹ, zinzọnlin!”+  To whenẹnu, e hẹn adusilọ etọn go bo fọ́n ẹn ṣite.+ To afọdopolọji, afọ etọn lẹ po afọgómẹ etọn lẹ po yin hinhẹn lodo;+  ewọ sọ lọ́n ṣite do afọ etọn lẹ ji+ bo jẹ zọnlinzin ji bosọ biọ tẹmpli mẹ hẹ yé, podọ e to zọnlinzin bo to linlọ́n bosọ to Jiwheyẹwhe pà.  Mẹlẹpo sọ mọ ẹn bọ e to zọnlinzin bo to Jiwheyẹwhe pà. 10  Humọ, yé jẹ yinyọ́n ẹn ji dọ ewọ wẹ dawe lọ he nọ saba sinai to Họngbo Whanpẹnọ tẹmpli tọn lọ kọ̀n+ bo nọ to nunina lẹblanu tọn lẹ biọ, avò sọ vò yé tlala bọ awuji yé, na nuhe ko jọ do e go wutu. 11  Todin, dile dawe lọ gbẹ́ to titẹdo Pita po Johanu po go, gbẹtọ lẹpo họ̀nwezun wá yé dè to fihe nọ yin Agbà Gaa* Sọlomọni tọn lọ mẹ,+ nuhe jọ lọ sọ paṣa yé tlala. 12  To whenue Pita mọ ehe, e dọna gbẹtọ lọ lẹ dọmọ: “Mì omẹ Islaeli tọn lẹ emi, naegbọn ehe do paṣa mì sọmọ, podọ naegbọn mì do zín nukun do mí ji taidi dọ gbọn huhlọn mítọn titi kavi mẹdezejo na Jiwheyẹwhe gblamẹ wẹ mí do hẹn ẹn nado zinzọnlin nkọ? 13  Jiwheyẹwhe Ablaham tọn, Isaki tọn po Jakọbu tọn po,+ yèdọ Jiwheyẹwhe tọgbo mítọn lẹ tọn wẹ ko pagigona Devizọnwatọ etọn+ Jesu,+ mẹhe mìwlẹ zejo+ bo mọ́n to Pilati nukọn, dile etlẹ yindọ ewọ ko basi dide nado tún in dote. 14  Mọwẹ, mìwlẹ mọ́n omẹ wiwe podọ dodonọ enẹ, mì sọ biọ dọ dawe he yin hlọnhutọ de ni yin tuntundote na mì,+ 15  bọ mìwlẹ hù Afọzedaitọ-gán ogbẹ̀ tọn lọ.+ Ṣigba, Jiwheyẹwhe fọ́n ẹn sọn oṣiọ lẹ mẹ, yèdọ nugbo de he mí yin kunnudetọ na.+ 16  Humọ, to oyín etọn mẹ, podọ gbọn yise mítọn to oyín etọn mẹ dali, dawe he mì mọ bo yọnẹn ehe ko yin hinhẹn zun huhlọnnọ. Yise to ewọ mẹ wẹ ko hẹn dawe ehe jẹgangan mlẹnmlẹn to nukun mìmẹpo tọn mẹ. 17  Podọ todin, mẹmẹsunnu lẹ emi, yẹn yọnẹn dọ wunvi mẹ wẹ mì yinuwa te,+ kẹdẹdile ogán mìtọn lẹ lọsu wà do.+ 18  Ṣigba, Jiwheyẹwhe ko gbọnmọ dali hẹn nuhe e lá jẹnukọn gbọn onù yẹwhegán lẹpo tọn mẹ lẹ di, dọ Klisti etọn na jiya.+ 19  “Enẹwutu, mì lẹnvọjọ+ bo diọ,+ na yè nido súnsún ylando mìtọn lẹ sẹ̀,+ na ojlẹ kọfanamẹ tọn nido wá sọn Jehovah lọsu titi dè,* 20  na ewọ nido sọgan do Klisti mẹdide lọ, yèdọ Jesu hlan mì. 21  Omẹ ehe wẹ olọn dona yí hẹn kakajẹ ojlẹ hinhẹngọwa nulẹpo he Jiwheyẹwhe dọ gbọn onù yẹwhegán wiwe etọn hohowhenu tọn lẹ tọn mẹ. 22  Na taun tọn, Mose dọmọ: ‘Jehovah* Jiwheyẹwhe towe na ze yẹwhegán he taidi yẹn nkọ de daga na we sọn mẹmẹsunnu towe lẹ mẹ.+ Mì dona nọ dotoaina nuhe e dọna mì lẹpo.+ 23  Na nugbo tọn, mẹdepope* he ma dotoaina Yẹwhegán enẹ na yin vivasudo mlẹnmlẹn sọn gbẹtọ lẹ ṣẹnṣẹn.’+ 24  Podọ yẹwhegán lẹpo sọn Samuẹli ji gọna mẹhe bọdego lẹ, yèdọ mẹhe ko dọho lẹpo, ko lá azán ehelẹ to aliho he họnwun mẹ ga.+ 25  Mìwlẹ wẹ visunnu yẹwhegán lẹ tọn podọ alẹnu he Jiwheyẹwhe basi hẹ tọgbo mìtọn lẹ tọn,+ to whenue e dọna Ablaham dọmọ: ‘Podọ whẹndo aigba ji tọn lẹpo na yin didona gbọn kúnkan* towe gblamẹ.’+ 26  To whenue Jiwheyẹwhe ko ze Devizọnwatọ etọn daga godo, ewọ do e hlan mìwlẹ whẹ́+ nado dona mì gbọn dopodopo mìtọn didiọ sọn walọ ylankan mìtọn lẹ mẹ dali.”

Nudọnamẹ Odò Tọn

Enẹ wẹ, nudi ogàn 3 whèmẹ tọn.
Enẹ wẹ, agbà gaa de he tindo dòtin lẹ to adà awe lẹ ji he họ̀gbánu lẹ tin to e ji.
To paa mẹ, “sọn nukun Jehovah tọn mẹ.” Pọ́n Nud. A5.
Pọ́n Nud. A5.
Kavi “alindọn depope.”
To paa mẹ, “okún.”