Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 26:1-32

NUHE E BẸHẸN LẸ

  • Paulu yiavùnlọna ede to Aglipa nukọn (1-11)

  • Paulu dọ lehe e lẹzun yisenọ do (12-23)

  • Gblọndo Festu po Aglipa po tọn (24-32)

26  Aglipa+ dọna Paulu dọmọ: “Hiẹ yin dotẹnmẹna nado yiavùnlọna dewe.” To whenẹnu, Paulu dlẹnalọ etọn bo jẹ avùnlọyina ede ji dọmọ:  “Ahọlu Aglipa, gando nuhe Ju lẹ yí do to whẹsadokọna mi lọ lẹpo go,+ homẹ ṣie hùn dọ yẹn tindo dotẹnmẹ hundote lọ nado yiavùnlọ to nukọn towe to egbé,  titengbe to whenuena e yindọ hiẹ yọ́n aṣa lẹpo gọna nudindọn he tin to Ju lẹ ṣẹnṣẹn lẹ hezeheze. Enẹwutu, yẹn vẹ̀ we nado yí homẹfa do dotoaina mi.  “Na nugbo tọn, gbẹzan he yẹn zan sọn jọja whenu to omẹ* ṣie lẹ mẹ podọ to Jelusalẹm wẹ Ju lẹpo yọnẹn ganji,+  yèdọ mẹhe ko jẹakọ hẹ mi dai lẹpo, eyin yé tindo ojlo nado dekunnu, dọ yẹn yin Falesi de+ bosọ nọgbẹ̀ sọgbe hẹ nuplọnmẹ hẹngogo tọn sinsẹ̀n klandovo mítọn tọn.+  Ṣigba todin, yẹn tin to owhẹ̀ nukọn, na todido opagbe he Jiwheyẹwhe ko do na tọgbo mítọn lẹ tọn wutu;+  hẹndi opagbe ehe dopolọ tọn wẹ hẹnnu 12 mítọn lẹ to nukundo nado mọ dile yé to sinsẹ̀nzọn wiwe wà hlan Jiwheyẹwhe vẹkuvẹku to ozán po okle po. Na todido ehe wutu wẹ Ju lẹ do sawhẹdokọna mi,+ hiẹ Ahọlu E.  “Naegbọn e do vẹawuna mì nado yise dọ Jiwheyẹwhe to oṣiọ lẹ fọ́n?  Na yẹn tọn, n’kudeji dai dọ n’dona wà nuhe go n’pé lẹpo nado jẹagọdo oyín Jesu Nazalẹti tọn. 10  Nuhe n’wà to Jelusalẹm pẹẹ niyẹn, n’sọ wle omẹ wiwe susu do gànpa lẹ mẹ,+ na yẹn ko mọ aṣẹ yí sọn yẹwhenọgán lẹ dè;+ podọ eyin yé jlo na yin hùhù, yẹn nọ blavo nado nọgodona hùhù yetọn. 11  N’tẹnpọn nado hẹn yé gánnugánnu nado mọ́n yise yetọn gbọn yasisana yé whlasusu to sinagọgu lẹpo mẹ dali; podọ na yẹn jẹma do yé ji tlala wutu, yẹn yì jẹ obá lọ mẹ nado nọ dohomẹkẹn yé, etlẹ yin to tòdaho devo lẹ mẹ. 12  “Dile yẹn to ehe wà bo to aliji jei Damasku to whenue n’ko mọ aṣẹ po gbedide de po yí sọn yẹwhenọgán lẹ dè godo, 13  Ahọlu E, yẹn mọ to owhè ṣádada mẹ to aliho lọ ji bọ miyọ́n de he hinhọ́n etọn zẹ̀ hinhọ́n owhè tọn go họ́n sọn olọn lẹdo mi pé podọ lẹdo mẹhe to gbejizọnlinzin hẹ mi lẹ.+ 14  Podọ to whenue mímẹpo ko họ́ jẹ kọmẹ, yẹn sè ogbè de dọna mi to Heblugbe mẹ dọ: ‘Saulu, Saulu, naegbọn hiẹ do to homẹkẹndo mi? E vẹawuna hiẹ nado to owhẹ́-sẹ́ opò tlọ́ntlọ́n.’* 15  Ṣigba, yẹn dọmọ: ‘Hiẹ mẹnu wẹ, Oklunọ?’ Oklunọ sọ dọmọ: ‘Yẹn Jesu wẹ, mẹhe hiẹ to homẹkẹndo. 16  Ṣigba, fọnṣite to afọ towe lẹ ji. Ehe wutu wẹ yẹn do sọawuhia we, nado de we taidi devizọnwatọ de podọ kunnudetọ de na nuhe hiẹ ko mọ po nuhe yẹn na dohia we gando go e lẹ po.+ 17  Yẹn nasọ whlẹn we sọn omẹ ehelẹ po akọta lọ lẹ po si, mẹhe dè yẹn to dido we hlan+ 18  nado hùn nukun yetọn lẹ,+ nado gọkọna yé sọn zinvlu mẹ+ do hinhọ́n mẹ+ podọ sọn aṣẹpipa Satani tọn glọ+ hlan Jiwheyẹwhe dè, na yé nido mọ jona ylando lẹ tọn+ po ogú de po yí to pọmẹ hẹ mẹhe ko klan yede do wiwe gbọn yise yetọn to yẹn mẹ dali lẹ.’ 19  “Enẹwutu, Ahọlu Aglipa, yẹn ma vẹtolina numimọ olọn tọn lọ, 20  ṣigba na mẹhe tin to Damasku lẹ+ whẹ́, enẹgodo na mẹhe tin to Jelusalẹm lẹ,+ podọ gbọn otò Jude tọn lẹpo mẹ, gọna omẹ akọta lẹ tọn wẹ yẹn hẹn owẹ̀n lọ yì na, dọ yé dona lẹnvọjọ bo lẹhlan Jiwheyẹwhe dè gbọn azọ́n he jẹna lẹnvọjọ lẹ wiwà dali.+ 21  Ehe wutu wẹ Ju lẹ wle mi to tẹmpli mẹ bo tẹnpọn nado hù mi.+ 22  Ṣigba, na yẹn ko mọ alọgọ he nọ wá sọn Jiwheyẹwhe dè yí wutu, yẹn zindonukọn nado to kunnude na pẹvi po daho po kakajẹ egbé, yẹn masọ to nudevo depope dọ adavo nuhe Yẹwhegán lẹ po Mose po ko dọ dọ e na jọ lẹ+ 23  dọ Klisti dona jiya+ podọ taidi omẹ tintan he na yin finfọn sọn oṣiọ lẹ mẹ,+ ewọ na lá hinhọ́n na omẹ ehelẹ, podọ na akọta lẹ.”+ 24  Todin, dile Paulu yí ohó ehelẹ do to avùnlọyina ede, Festu dọ po ogbè lélé po dọmọ: “Paulu, hiẹ to tadu hùn! Nususu pinplọn jlo na hẹn we hùn tadu!” 25  Ṣigba, Paulu dọmọ: “Yẹn ma to tadu hùn, Hiẹ Gigonọ Daho Festu, ṣigba ohó nugbo po wunza tọn lẹ po dọ wẹ yẹn te. 26  Na nugbo tọn, ahọlu lọ, mẹhe yẹn to hodọna po awuvivo po yọ́n onú ehelẹ hezeheze; n’kudeji dọ dopo tata to onú ehelẹ mẹ ma whlá do e gba, na depope to onú ehelẹ mẹ ma yin bibasi to nuglọ.+ 27  Ahọlu Aglipa, be hiẹ yí Yẹwhegán lẹ sè ya? Yẹn yọnẹn dọ hiẹ yise.” 28  Ṣigba, Aglipa dọna Paulu dọmọ: “To ojlẹ vude mẹ, hiẹ na diọlinlẹnna mi nado lẹzun Klistiani de.” 29  Enẹwutu, Paulu dọmọ: “Yẹn vẹ̀ Jiwheyẹwhe dọ, e yá wẹo kavi e dẹn wẹo, e ma yin hiẹ kẹdẹ ṣigba mẹhe to ohó ṣie sè to egbé lẹpo ga ni lẹzun mẹhe nkọ yẹn yin, matin gẹdẹ gàntọ tọn ehelẹ.” 30  Ahọlu lọ, ayimatẹn-gán lọ po Belnike po gọna sunnu he sinai hẹ yé lẹ sọ fọ́n. 31  Ṣigba, dile yé to yìyì, yé jẹ hodọ hẹ ode awetọ ji dọmọ: “Dawe ehe ma wà nudepope he hẹn ẹn jẹna okú kavi gànpamẹ.”+ 32  Aglipa sọ dọna Festu dọmọ: “Dawe ehe sọgan ko yin tuntundote eyin e ma ko vọ́ owhẹ̀ ylọ to Sesali dè.”+

Nudọnamẹ Odò Tọn

Kavi “akọta.”
Enẹ wẹ, opò tlọ́ntlọ́n he nọ yin yiyizan nado deanana kavi gọkọna kanlin de.