Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 23:1-35

23  To whenue Paulu pọ́n hagbẹ Whẹdatẹn Daho Ju lẹ tọn* lọ tọn lẹ tlintlin, e dọmọ: “Mì mẹmẹsunnu lẹ emi, yẹn ko yinuwa po ayihadawhẹnamẹnu he wé-ṣeke de po to Jiwheyẹwhe nukọn+ kakajẹ egbé.”  To whenẹnu, yẹwhenọ daho Ananias degbena mẹhe ṣite to apá na ẹn lẹ nado gbà awọ̀nnù na ẹn.  Paulu sọ dọmọ: “Jiwheyẹwhe na linú we, hiẹ adó he yè sá onú wewe do. Be hiẹ sinai nado dawhẹna mi sọgbe hẹ Osẹ́n lọ bosọ to Osẹ́n lọ gbà to ojlẹ dopolọ mẹ gbọn gbedide nina dali dọ yè ni linú mi wẹ ya?”  Mẹhe ṣite to finẹ lẹ dọmọ: “Yẹwhenọ daho Jiwheyẹwhe tọn zun wẹ a te ya?”  Paulu sọ dọmọ: “Mẹmẹsunnu lẹ emi, yẹn ma yọnẹn dọ yẹwhenọ daho wẹ ewọ. Na e ko yin kinkandai dọ, ‘Hiẹ ma dona dọ ohó ylankan do ogán omẹ towe lẹ tọn de go.’”+  Todin, na Paulu yọnẹn dọ delẹ to yé mẹ yin Sadusi lẹ bọ mẹhe pò lẹ yin Falesi lẹ wutu, e yí ogbè lélé do dọ to Whẹdatẹn Daho Ju lẹ tọn lọ mẹ dọmọ: “Mì mẹmẹsunnu lẹ emi, Falesi de wẹ yẹn,+ yèdọ visunnu Falesi lẹ tọn de. Na todido fọnsọnku oṣiọ lẹ tọn wutu wẹ yẹn to yinyin whẹdana.”  Na enẹ he e dọ wutu, gbemanọpọ de fọ́n to Falesi lẹ po Sadusi lẹ po ṣẹnṣẹn, pipli lọ sọ klan.  Na Sadusi lẹ nọ dọ dọ fọnsọnku kavi angẹli kavi gbigbọ de ma tin, ṣigba Falesi lẹ nọ kẹalọyi ehe lẹpo.*+  Enẹwutu, zingidi daho de fọ́n, bọ delẹ to wekantọ pipli Falesi lẹ tọn lẹ mẹ fọ́n bo jẹ nudọn ji sinsinyẹn, dọmọ: “Mí ma mọ oylan depope to dawe ehe mẹ, ṣigba eyin gbigbọ kavi angẹli de wẹ dọhona ẹn+—.” 10  Todin, to whenue gbemanọpọ lọ sinyẹn deji, awhàngán daho lọ dibu dọ yé na tlẹ́n Paulu do flinflin, e sọ degbena awhànfuntọ lọ lẹ nado jẹte yì bo hò e yí sọn ṣẹnṣẹn yetọn bosọ hẹn ẹn wá opá awhànfuntọ lẹ tọn mẹ. 11  Ṣigba, to ozán he bọdego mẹ, Oklunọ ṣite to apá na ẹn bo dọmọ: “Gboadọ!+ Na kẹdẹdile hiẹ ko to kunnude mlẹnmlẹn gando go e to Jelusalẹm do, mọ wẹ hiẹ dona sọ dekunnu to Lomu do ga.”+ 12  To whenue ai ko họ́n, Ju lẹ wleawuna sébibla de bo yí yedelẹ do dẹ̀hodo glọ, dọ yé ma na dù kavi nù kakajẹ whenue yé na hù Paulu. 13  Hugan sunnu 40 wẹ yí whiwhle do blasé ehe. 14  Sunnu ehelẹ yì yẹwhenọgán lẹ po mẹho lẹ po dè bo dọmọ: “Mí ko yí míde do dẹ̀hodo* glọ sinsinyẹn dọ núdùdù depope ma na jẹ onù na mí kakajẹ whenue mí na hù Paulu. 15  Enẹwutu todin, mìwlẹ po Whẹdatẹn Daho Ju lẹ tọn lọ po ni dọna awhàngán daho lọ dọ ewọ dona hẹn ẹn jẹte wá mì dè taidi dọ mì jlo na gbeje whẹho etọn pọ́n ganji wẹ nkọ. Ṣigba, whẹpo e nado sẹpọ, míwlẹ na tin to awuwle mẹ nado hù i.” 16  Ṣigba, ylọnẹn-ylọvi sunnu Paulu tọn sè dogbọn owùtọnamẹ he yé to tito etọn basi lọ dali, ewọ sọ biọ opá awhànfuntọ lẹ tọn mẹ bo dọ ẹ na Paulu. 17  To whenẹnu, Paulu ylọ dopo to awhàngán* lọ lẹ mẹ wá ede dè bo dọmọ: “Plan jọja sunnu ehe yì awhàngán daho lọ dè, na e tindo nude nado dọna ẹn.” 18  Enẹwutu, ewọ plan ẹn yì awhàngán daho lọ dè bo dọmọ: “Paulu, gàntọ lọ ylọ mi bo biọ dọ ma plan jọja sunnu ehe wá dè we, na e tindo nude nado dọna we.” 19  Awhàngán daho lọ hẹn alọ go na ẹn bo plan ẹn jẹ olá bosọ kanse e dọmọ: “Etẹwẹ hiẹ tindo nado dọna mi?” 20  Ewọ dọmọ: “Ju lẹ ko kọngbedopọ nado biọ to hiẹ si nado hẹn Paulu jẹte wá Whẹdatẹn Daho Ju lẹ tọn to osọ he ja, taidi dọ yé to linlẹn nado sè nudọnamẹ gigọ́ lẹ gando whẹho etọn go wẹ nkọ.+ 21  Ṣigba, a dike yé diọlinlẹnna we blo, na nuhe hugan sunnu 40 to yé mẹ wẹ tọ̀wu dai na ẹn, yé ko sọ yí yedelẹ do dẹ̀hodo* glọ ma nado dù kavi nù kakajẹ whenue yé na hù i;+ podọ yé ko wleawufo todin, bo to tenọpọn gbedide towe.” 22  Enẹwutu, awhàngán daho lọ dike jọja sunnu lọ ni yì to whenue e ko degbena ẹn godo dọmọ: “A dọna mẹde dọ a ko hẹn ehe zun yinyọnẹn na mi blo.” 23  Ewọ sọ ylọ awe to awhàngán* lẹ mẹ bo dọmọ: “Mì wleawuna awhànfuntọ 200, podọ ga osọ́nọ 70 po owhánnọ 200 po nado yì Sesalea to gànhiho atọ̀ntọ* mẹ to zánmẹ. 24  Humọ, mì wleawuna osọ́ lẹ he ji Paulu na hẹ nado ze e yì ayimatẹn-gán Feliksi dè awuyẹyẹ-afọyẹyẹ.” 25  E sọ kàn wekanhlanmẹ de he dọmọ: 26  “Klaudiu Lisia, hlan Gigonọ Daho, Ayimatẹn-gán Feliksi: Yẹn dọnudo we! 27  Ju lẹ wẹ wle dawe ehe bo ko dibla hù i, ṣigba yẹn yawu hẹn awhànfuntọ lẹ wá bo whlẹn ẹn,+ na yẹn sè dọ Lomunu de wẹ ewọ.+ 28  Podọ na yẹn jlo na yọ́n nuhewutu yé do to whẹsadokọna ẹn wutu, yẹn hẹn ẹn jẹte yì Whẹdatẹn Daho Ju lẹ tọn yetọn mẹ.+ 29  Yẹn mọdọ yé sawhẹdokọna ẹn gando Osẹ́n yetọn lọ go,+ ṣigba yè ma jẹwhẹ etọn gando onú dopo tata he hẹn ẹn jẹna okú kavi gànpamẹ go gba. 30  Ṣigba, na núbibla he to yinyin awuwlena sọta ẹ lọ ko yin hinhẹn zun yinyọnẹn na mi wutu,+ yẹn to dido e hlan dè we to afọdopolọji bosọ degbena whẹsadokọnamẹtọ lọ lẹ nado hẹn owhẹ̀ lọ wá nukọn towe.” 31  Enẹwutu, awhànfuntọ lọ lẹ plan Paulu+ sọgbe hẹ gbedide he yin nina yé lẹ bo hẹn ẹn wá Antipatli to zánmẹ. 32  To aihọngbè, yé nagbè osọ́nọ lọ lẹ nado zindonukọn po e po, ṣigba yewlẹ lẹkọ do opá awhànfuntọ lẹ tọn mẹ. 33  Osọ́nọ lọ lẹ biọ Sesalea bo ze wekanhlanmẹ lọ na ayimatẹn-gán lọ bosọ ze Paulu do alọmẹ na ẹn ga. 34  Enẹwutu, e hia ẹ bo kàn ayimatẹn he mẹ e wá sọn lọ sè, bo mọdọ Silisia wẹ e wá sọn.+ 35  E sọ dọmọ: “Yẹn na dotoaina we to gigọ́ mẹ to whenue whẹsadokọnamẹtọ towe lẹ na wá.”+ E sọ degbe dọ yè ni to ṣiṣọ́ ẹ to họ̀nmẹ Hẹlọdi tọn.

Nudọnamẹ Odò Tọn

To paa mẹ, “Sanhedlin.” Pọ́n Zẹm.
Kavi “nọ lá ehe lẹpo to gbangba.”
Kavi “whiwhle.”
Kavi “mẹkanwekowhàngán” he nọ deanana awhànfuntọ 100.
Kavi “whiwhle.”
Kavi “mẹkanwekowhàngán” he nọ deanana awhànfuntọ 100.
Enẹ wẹ, nudi ogàn 9 zánmẹ tọn.