Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Owalọ lẹ 20:1-38

20  To whenue zingidi lọ ko depò, Paulu dowẹn hlan devi lẹ, podọ to whenue e ko na tuli yé bo dọ e yì whedenu na yé godo, e zingbejizọnlin dedo Makedonia.  To whenue e ko jugbọn lẹdo enẹlẹ mẹ bo ko dọho tulinamẹ tọn susu na mẹhe tin to finẹ lẹ, e wá Glẹki.  E nọ finẹ na osun atọ̀n, ṣigba na núbibla he Ju lẹ wleawuna sọta ẹ+ to whenue e ko dibla do tọjihun yì Silia wutu, e basi dide nado lẹkọ gbọn Makedonia.  Sopateli visunnu Pilusi Beleanu lọ tọn, Alistaku+ po Sekundu po he yin Tẹsalonikanu lẹ, Gaiu Delbe tọn, Timoti,+ podọ Tikiku+ po Tlofimu+ po he wá sọn ayimatẹn Asia tọn mẹ lẹ, hodo e.  Omẹ ehelẹ jẹnukọnna mí bo to tenọpọn mí to Tloa;  ṣigba, míwlẹ súnhún sọn Filipi to aihọngbè azán Hùnwhẹ Akla Madotọ́n tọn,+ mí sọ wá yé dè to Tloa to azán atọ́n gblamẹ, mí sọ nọ finẹ na azán ṣinawe.  To azán tintan* osẹ tọn gbè, to whenue mí pli dopọ nado dùnú, Paulu jẹ hodọna yé ji, na aihọngbè etọn wẹ e na yì wutu; e sọ dlẹnkanna hodidọ etọn kakajẹ zánhomẹ.  Miyọ́ngbán sọ sù vude to abò aga tọn lọ mẹ fihe mí pli dopọ do.  Jọja sunnu de he nọ yin Eutiku sinai to fleṣe nù bo damlọn yìkànmẹ dile Paulu to hodọ, amlọn lọ sọ to e ji sọmọ bọ e jai sọn petlezìn aga atọ̀nnọ ji bọ yè ze kúkú etọn. 10  Ṣigba, Paulu jẹte yì odò bo dẹ́ ede do e ji bosọ gbò e fán+ bo dọmọ: “Mì gbọ nuhà, ewọ ko gọwá ogbẹ̀.”*+ 11  Enẹgodo, Paulu hẹji yiaga bo ba núdùdù* bosọ dù. E sọ zindonukọn to hodidọ etọn mẹ na ojlẹ de, yèdọ kakajẹ afọnnu fliflimẹ, podọ to enẹgodo, e dedo. 12  Enẹwutu, yé plan yọpọ sunnu lọ yì gbẹ̀te bo yin homẹmiọnna hugan nuhe yè sọgan jlẹ. 13  Todin, mí jẹnukọn yì biọ tọjihun lọ mẹ bo súnhún dedo Asso, fie mí to linlẹn nado plan Paulu biọ ohún lọ mẹ te, na to whenue ewọ ko na mí anademẹ ehelẹ godo, ewọ lọsu to linlẹn nado zọ̀n afọ yì dọ́n. 14  Enẹwutu, to whenue e wá plá mí to Asso, mí plan ẹn biọ ohún lọ mẹ bo yì Mitilene. 15  Podọ, to whenue mí súnhún sọn finẹ to aihọngbè, mí dasá yì awà awetọ Kio tọn ji, ṣigba to azán awetọ gbè mí zẹ̀ Samo, podọ to aihọngbè mí wá Miletu. 16  Na Paulu ko basi dide nado do tọjihun zẹ̀ Efesu+ go, ma nado yí whenu depope zan to ayimatẹn Asia tọn mẹ, na e to whlẹndo ji nado jẹ Jelusalẹm+ to azán Hùnwhẹ Pẹntikọsti tọn gbè eyin e sọgan yọnbasi. 17  Ṣigba, e domẹhlan Efesu sọn Miletu bo ylọ mẹho agun lọ tọn lẹ. 18  To whenue yé wá e dè, e dọna yé dọmọ: “Mìwlẹ yọnẹn ganji lehe yẹn yinuwa to ṣẹnṣẹn mìtọn do sọn azán tintan he gbè yẹn wá ayimatẹn Asia tọn mẹ,+ 19  bo yí whiwhẹ* daho+ po dasin lẹ po gọna whlepọn he núbibla Ju lẹ tọn hẹnwa ji e lẹ do to azọ́nwa na Oklunọ di afanumẹ, 20  dile yẹn ma gboawupo sọn nuhe na hẹn ale wá* lẹ didọna mì mẹ kavi sọn pinplọn mì to gbangba+ podọ sọn whédegbè jẹ whédegbè+ mẹ do. 21  Ṣigba, yẹn dekunnu mlẹnmlẹn na Ju lẹ po Glẹkinu lẹ po dọ yé ni lẹnvọjọ+ bo lẹhlan Jiwheyẹwhe dè bosọ tindo yise to Oklunọ mítọn Jesu mẹ.+ 22  Podọ todin, mì pọ́n! na gbigbọ hẹn ẹn yin dandan na mi wutu, yẹn zingbejizọnlin jei Jelusalẹm, dile etlẹ yindọ yẹn ma yọ́n nuhe na jọ do go e to finẹ, 23  adavo dọ sọn tòdaho de mẹ jẹ tòdaho de mẹ, gbigbọ wiwe nọ to avase na mi gbọzangbọzan dọ gànpamẹ po nukunbibia lẹ po wẹ to tepọn mi.+ 24  Etomọṣo, yẹn ma hia ogbẹ̀* ṣie titi di nuhọakuẹ de* gba, eyin yẹn ko gbẹ́ sọgan dotana alewezun ṣie+ po lizọnyizọn he yẹn mọyi sọn Oklunọ Jesu dè po, nado dekunnu wẹndagbe nukundagbe majẹhẹ Jiwheyẹwhe tọn mlẹnmlẹn. 25  “Podọ todin, mì pọ́n! yẹn yọnẹn dọ depope to mì mẹhe yẹn dọyẹwheho Ahọluduta lọ tọn na lẹ mẹ ma nasọ mọ mi ba. 26  Enẹwutu wẹ yẹn ylọ mì nado dekunnuna ehe to egbé dọ yẹn wé sọn ohùn gbẹtọ lẹpo tọn mẹ,+ 27  na yẹn ma gboawupo sọn lẹndai Jiwheyẹwhe tọn lẹpo didọna mì mẹ.+ 28  Mì payi mìde+ po apó lọ pete po go, ehe mẹ gbigbọ wiwe ko de mì nado yin nugopọntọ lẹ te,+ nado nọ yìn agun Jiwheyẹwhe tọn,+ ehe e yí ohùn Visunnu etọn titi tọn do họ̀.+ 29  Yẹn yọnẹn dọ to yìyì ṣie godo, ohla kanylantọ* lẹ na biọ ṣẹnṣẹn mìtọn+ bo ma na yinuwa hẹ apó lọ po awuvẹmẹ po, 30  podọ mìlọsu lẹ ṣẹnṣẹn wẹ sunnu lẹ na fọ́n sọn bo na slokọna nuplọnmẹ lẹ nado dọ̀n devi lẹ dogodo yede tọn.+ 31  “Enẹwutu, mì nọ nukle bo hẹn do ayiha mẹ dọ na owhe atọ̀n,+ n’ma nọma yí dasin do dotuhomẹna dopodopo mìtọn to ozán po okle po. 32  Podọ todin, yẹn ze mì do alọmẹ na Jiwheyẹwhe podọ na ohó nukundagbe majẹhẹ etọn tọn, yèdọ ohó he sọgan hẹn mì lodo bo na mì ogú lọ to omẹ klandowiwe lẹpo ṣẹnṣẹn.+ 33  Yẹn ma jlo fataka, sika kavi avọ̀ mẹde tọn pọ́n.+ 34  Mìlọsu lẹ yọnẹn dọ alọ ehelẹ wẹ penukundo nuhudo ṣie titi lẹ+ po mẹhe to dè e lẹ po tọn go. 35  Yẹn ko dohia mì to nulẹpo mẹ dọ gbọn azọ́n sinsinyẹn wiwà to aliho mọnkọtọn mẹ dali+ wẹ mì dona gọalọna mẹhe yin madogánnọ lẹ podọ mì dona hẹn ohó Oklunọ Jesu tọn lẹ do ayiha mẹ, to whenue ewọ lọsu dọ dọ: ‘Ayajẹ sù to nunamẹ mẹ+ hú to mimọyi mẹ.’” 36  Podọ to whenue e ko dọ onú ehelẹ, e jẹklo po yemẹpo po bo hodẹ̀. 37  Na nugbo tọn, yemẹpo sọ viavi tlala bo gbò Paulu fán* bosọ donùnùgo na ẹn, 38  na ohó he e ko dọ, dọ yé ma nasọ mọ emi ba, blawu na yé tlala wutu.+ Enẹgodo, yé plan ẹn dedo tọjihun lọ kọ̀n.

Nudọnamẹ Odò Tọn

Enẹ wẹ, azán he nọ yin yiylọ todin dọ Sẹgbe. Na Ju lẹ, e yin azán tintan osẹ tọn.
Kavi “na alindọn etọn to ewọ mẹ.”
To paa mẹ, “wẹ́n akla.”
Kavi “mẹdezewhè.”
Kavi “nuhe yin na dagbe mìtọn.”
Kavi “alindọn.”
Kavi “di nujọnu to aliho depope mẹ.”
Kavi “kọgbidinamẹtọ.”
To paa mẹ, “bo jẹ okọ̀ Paulu tọn ji.”