Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 6:1-17

NUHE E BẸHẸN LẸ

  • Lẹngbọvu lọ hùn hiadonu 6 tintan lẹ (1-17)

    • Mẹhe to awhàngba lọ sin osọ́ wewe de ji (1, 2)

    • Osọ́-kùntọ osọ́ sinmẹ miyọ́nnọ lọ tọn na de jijọho sẹ̀ (3, 4)

    • Osọ́-kùntọ osọ́ yuu lọ tọn na hẹn huvẹ wá (5, 6)

    • Osọ́-kùntọ osọ́ wlanwlan lọ tọn yin yiylọdọ okú (7, 8)

    • Mẹhe yin hùhù do agbà lọ glọ lẹ (9-11)

    • Aigba sisọsisọ daho de (12-17)

6  Yẹn sọ mọ whenue Lẹngbọvu+ lọ hùn dopo to hiadonu ṣinawe+ lọ lẹ mẹ, yẹn sọ sè bọ dopo to mẹdida ẹnẹ+ lẹ mẹ yí ogbè he taidi hẹviosò tọn do dọmọ: “Wá!”  Yẹn sọ mọ, podọ pọ́n! osọ́ wewe+ de, bọ mẹhe sinai to e ji tindo ogá de; jẹgbakun de sọ yin nina ẹn,+ e sọ tọ́nyi bo to awhàngba podọ nado dotana awhàngbigba etọn.+  Whenue e hùn hiadonu awetọ, yẹn sè bọ mẹdida awetọ+ dọmọ: “Wá!”  Osọ́ devo he tindo sinmẹ miyọ́nnọ de tọ́njẹgbonu, yè sọ nagbè mẹhe sinai to e ji nado de jijọho sẹ̀ sọn aigba ji, na yé nido nọ hù ode awetọ, ohí daho de sọ yin nina ẹn.+  Whenue e hùn hiadonu atọ̀ntọ,+ yẹn sè bọ mẹdida atọ̀ntọ+ dọmọ: “Wá!” Yẹn sọ mọ, podọ pọ́n! osọ́ yuu de, bọ mẹhe sinai to e ji tindo nujlẹgàn ovi awenọ de to alọ etọn mẹ.  Yẹn sọ sè nuhe taidi ogbè de sọn ṣẹnṣẹn mẹdida ẹnẹ lọ lẹ tọn dọmọ: “Nujlẹnu* likun tọn dopo na denali*+ dopo, podọ nujlẹnu balekun tọn atọ̀n na denali dopo; hiẹ sọ ṣì amì olivie tọn po ovẹn po zan blo.”+  Whenue e hùn hiadonu ẹnẹtọ, yẹn sè ogbè mẹdida ẹnẹtọ+ tọn dọmọ: “Wá!”  Yẹn sọ mọ, podọ pọ́n! osọ́ wlanwlan de, podọ oyín mẹhe sinai to e ji tọn wẹ Okú. Yọdò* sọ to hihodo e pẹkipẹki. Aṣẹ sọ yin nina yé do mado-ẹnẹtọ aigba tọn ji nado nọ yí ohí gaa, núdùdù whèdomẹ,+ awutu ylankan po gbekanlin aigba tọn lẹ po do hù.+  Whenue e hùn hiadonu atọ́ntọ, yẹn mọ alindọn*+ mẹhe yin hùhù na ohó Jiwheyẹwhe tọn podọ na kunnu he yé ko de+ wutu lẹ tọn to agbà+ lọ glọ. 10  Yé sọ dawhá po ogbè lélé po dọmọ: “Oklunọ Nupojipetọ, wiwe po nugbo po E,+ nawẹ e na dẹnsọ whẹpo hiẹ na dawhẹ bo na yiahọsu ohùn mítọn tọn to mẹhe nọ nọ̀ aigba ji lẹ go?”+ 11  Podọ tewu wewe de yin nina dopodopo yetọn,+ yè sọ dọna yé nado gbọjẹ na whenu vude dogọ, kakajẹ whenue sọha afanumẹ hatọ yetọn lẹ podọ mẹmẹsunnu yetọn he na yin hùhù to madẹnmẹ dile yé ko yin hùhù do lẹ tọn na pé.+ 12  Yẹn sọ mọ whenue e hùn hiadonu ṣidopotọ, aigba sisọsisọ daho de sọ jọ; owhè sọ diyuu taidi odẹ́vọ̀ he yè yí kanlin-fún* do basi, podọ osun blebu diọ bo taidi ohùn,+ 13  sunwhlẹvu olọn tọn lẹ sọ flẹ jẹ aigba, kẹdẹdile ovò sinsẹ́n he ma bia lẹ nọ ja kọnyinai to whenue jẹhọn sinsinyẹn whàn ovòtin de do. 14  Olọn sọ há sẹ̀ dile owe-hihá de nọ yin hihá do,+ podọ osó lẹpo gọna lopo lẹpo yin tẹnsẹna sọn otẹn yetọn lẹ mẹ.+ 15  Enẹgodo, ahọlu aigba ji tọn lẹ, ahọluzọnwatọ nukundeji lẹ, awhàngán daho lẹ, adọkunnọ lẹ, omẹ huhlọnnọ lẹ, afanumẹ lẹpo gọna mẹhe to yedekannu lẹpo whlá yede do oslò lẹ mẹ podọ do osé lẹ gblamẹ to osó lẹ ṣẹnṣẹn.+ 16  Yé sọ to didọna osó lẹ podọ na osé lẹ mapote dọmọ: “Mì họ́ jẹ mí ji+ bo whlá mí sọn nukọn Mẹhe sinai to ofìn lọ ji+ tọn podọ sọn homẹgble Lẹngbọvu lọ tọn mẹ,+ 17  na azán daho homẹgble yetọn tọn ko wá,+ podọ mẹnu wẹ penugo nado nọte?”+

Nudọnamẹ Odò Tọn

Enẹ wẹ, nujlẹnu he sọzẹn hẹ nudi kg 1. Pọ́n Nud. B14.
Abọgan-kuẹ fataka tọn Lomu tọn de he sọzẹn hẹ azọ́nkuẹ gbèdopo tọn. Pọ́n Nud. B14.
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.
E họnwun dọ ehe to alọdlẹndo ohùn yetọn he yin sinsọndai do agbà lọ ji. Pọ́n Zẹm.
Vlavo gbọgbọẹ-fún.