Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 5:1-14

NUHE E BẸHẸN LẸ

  • Owe-hihá de po hiadonu ṣinawe po (1-5)

  • Lẹngbọvu lọ yí owe-hihá lọ (6-8)

  • Lẹngbọvu lọ wẹ na hùn hiadonu lọ lẹ (9-14)

5  Yẹn sọ mọ owe-hihá he yè kannu do adà awe lẹ ji* bo yí hiadonu ṣinawe do tlẹ́ gbanun-gbanun de to adusilọ Mẹhe sinai to ofìn lọ ji+ tọn mẹ.  Yẹn sọ mọ angẹli huhlọnnọ de he to lilá po ogbè lélé po dọmọ: “Mẹnu wẹ jẹ nado hùn owe-hihá lọ bo wẹ́n hiadonu etọn lẹ sẹ̀?”  Ṣigba, mẹdepope ma tin to olọn mẹ kavi to aigba ji kavi to aigba glọ he penugo nado hùn owe-hihá lọ kavi nado hia ẹ.  N’viavi badabada, na mẹdepope ma yin mimọ he jẹ nado hùn owe-hihá lọ kavi nado hia ẹ wutu.  Ṣigba, dopo to mẹho lọ lẹ mẹ dọna mi dọmọ: “A viavi ba blo. Pọ́n! Kinnikinni he wá sọn whẹndo Juda+ tọn mẹ, yèdọ adọ̀+ Davidi tọn+ lọ, ko gbawhàn+ nado sọgan hùn owe-hihá lọ po hiadonu ṣinawe etọn lẹ po.”  Yẹn sọ mọ lẹngbọvu+ de ṣite to ofìn lọ ṣẹnṣẹn, to mẹdida ẹnẹ lọ lẹ ṣẹnṣẹn bọ mẹho+ lọ lẹ lẹdo e pé. E sọ taidi dọ lẹngbọvu lọ ko yin hùhù wẹ nkọ,+ bọ e tindo azò ṣinawe po nukun ṣinawe po, podọ nukun lọ lẹ nọtena gbigbọ ṣinawe Jiwheyẹwhe tọn lẹ+ he ko yin didohlan aigba lọ pete ji.  Ewọ sọ sẹwá bo yí i to afọdopolọji sọn adusilọ Mẹhe sinai to ofìn lọ ji tọn mẹ.+  Whenue e yí owe-hihá lọ, mẹdida ẹnẹ lọ lẹ po mẹho 24+ lọ lẹ po ṣinyọ́n nukunmẹ ai to Lẹngbọvu lọ nukọn, dopodopo mẹho lọ lẹ tọn sọ tindo ajalẹn de po agbán sika tọn lẹ po he gọ́ na nuyọnwan. (Nuyọnwan lọ nọtena odẹ̀ omẹ wiwe lẹ tọn lẹ.)+  Yé sọ to ohàn yọyọ de+ ji dọmọ: “Hiẹ wẹ jẹ nado yí owe-hihá lọ bo hùn hiadonu etọn lẹ, na hiẹ ko yin hùhù podọ ohùn towe wẹ a yí do họ̀ gbẹtọ lẹ na Jiwheyẹwhe+ sọn hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ,+ 10  hiẹ sọ hẹn yé zun ahọluduta de+ po yẹwhenọ lẹ po hlan Jiwheyẹwhe mítọn,+ bọ yé na duahọlu+ do aigba ji.” 11  Yẹn sọ mọ bo sè ogbè angẹli susu tọn lẹdo ofìn lọ pé, podọ lẹdo mẹdida lọ lẹ po mẹho lọ lẹ po pé, sọha yetọn yin fọtọ́n ao donu fọtọ́n ao lẹ podọ fọtọ́n donu fọtọ́n lẹ,+ 12  yé sọ to didọ po ogbè lélé po dọmọ: “Lẹngbọvu lọ he ko yin hùhù+ wẹ jẹ nado mọ huhlọn, adọkun, nuyọnẹn, hlọnhlọn, gbégbò, gigo po pipà po yí.”+ 13  Yẹn sọ sè bọ nudida lẹpo he tin to olọn mẹ, to aigba ji, to aigba glọ,+ podọ to ohù ji, yèdọ nuhe tin to yé mẹ lẹpo to didọmọ: “Pipà, gbégbò,+ gigo po hlọnhlọn po ni tin hlan Ewọ he sinai do ofìn lọ ji+ podọ hlan Lẹngbọvu+ lọ kakadoi podọ doidoi.”+ 14  Mẹdida ẹnẹ lọ lẹ sọ to didọmọ: “Niṣẹ!”* bọ mẹho lọ lẹ ṣinyọ́n nukunmẹ ai bo sẹ̀n.

Nudọnamẹ Odò Tọn

To paa mẹ, “to homẹ po godo po.”
Kavi “Amẹn” to Glẹkigbe mẹ.