Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 20:1-15

NUHE E BẸHẸN LẸ

  • Satani yin biblá họ̀ owhe 1 000 (1-3)

  • Mẹhe na duahọlu hẹ Klisti na owhe 1 000 lẹ (4-6)

  •  Satani yin tuntundote, bo yin vivasudo (7-10)

  • Oṣiọ lẹ na yin whẹdana to ofìn wewe lọ nukọn (11-15)

20  Yẹn sọ mọ angẹli de to tejẹ sọn olọn bo tindo họnhungan odò mapote tọn+ po gẹdẹ daho de po to alọ etọn mẹ.  E sọ wle dlagọni lọ,+ yèdọ odàn hoho lọ,+ he nọ yin Lẹgba+ podọ Satani,+ bo blá ẹ họ̀ owhe 1 000.  E sọ dlan ẹn do odò mapote+ lọ mẹ bo sú i bosọ yí hiadonu do tlẹ́ ẹ, na e ni masọ klọ akọta lẹ ba blo kakajẹ vivọnu owhe 1 000 lọ tọn. To ehe godo, e dona yin tuntundote na ojlẹ gli de.+  Yẹn sọ mọ ofìn lẹ bọ aṣẹpipa yin nina mẹhe sinai to yé ji lẹ nado dawhẹ. Mọwẹ, yẹn mọ alindọn* mẹhe yin hùhù,* na kunnudide gando Jesu go podọ na hodidọ gando Jiwheyẹwhe go wutu lẹ tọn, yèdọ yé mẹhe ma ko sẹ̀n gbekanlin lọ kavi boṣiọ etọn bo ma ko mọ ohia lọ yí do nukọn podọ do alọ yetọn go lẹ.+ Yé sọ gọwá ogbẹ̀ bo duahọlu hẹ Klisti+ na owhe 1 000.  (Oṣiọ he pò lẹ+ ma gọwá ogbẹ̀ kakajẹ vivọnu owhe 1 000 lọ tọn.) Ehe wẹ fọnsọnku tintan.+  Ayajẹnọ podọ wiwe wẹ mẹdepope he tindo mimá to fọnsọnku tintan lọ mẹ;+ omẹ ehelẹ ji wẹ okú awetọ+ ma tindo aṣẹ depope do,+ ṣigba yé na yin yẹwhenọ+ Jiwheyẹwhe tọn lẹ podọ Klisti tọn lẹ, yé nasọ duahọlu hẹ ẹ na owhe 1 000.+  Todin, tlolo he owhe 1 000 lọ na ko wá vivọnu, Satani na yin tuntundote sọn gànpa etọn mẹ,  bọ e na tọ́nyi nado klọ akọta lẹ to agosu ẹnẹ aigba tọn lẹ ji, yèdọ Gọgi podọ Magọgi, nado bẹ yé pli dopọ na awhàn. Sọha omẹ ehelẹ tọn na taidi tọkẹ́n ohù tọn.  Yé sọ gbàpe yì aigba pete ji bo lẹdo omẹ wiwe lẹ po tòdaho yiwanna lọ po pé. Ṣigba, miyọ́n jẹte sọn olọn bo fiọ yé.+ 10  Podọ Lẹgba he to kiklọ yé yin dindlan do agbàdo miyọ́n po whèmi po tọn mẹ, fie gbekanlin lọ+ po yẹwhegán lalo lọ po ko te;+ yé nasọ yin yasana* to okle po ozán po kakadoi podọ doidoi. 11  Yẹn sọ mọ ofìn wewe daho de po Mẹhe sinai to e ji po.+ Aigba po olọn po họnyi sọn nukọn etọn,+ otẹn depope masọ yin mimọ na yé. 12  Yẹn sọ mọ oṣiọ lẹ, daho po pẹvi po, to ote to ofìn lọ nukọn, owe-hihá lẹ sọ yin hùnhùn. Ṣigba, owe-hihá devo yin hùnhùn; owe-hihá ogbẹ̀ tọn lọ wẹ.+ Oṣiọ lẹ sọ yin whẹdana sọn nuhe yin kinkan do owe-hihá lọ lẹ mẹ lẹ mẹ sọgbe hẹ walọ yetọn lẹ.+ 13  Ohù sọ jo oṣiọ he tin to e mẹ lẹ, okú po Yọdò* po sọ jo oṣiọ he tin to yé mẹ lẹ, dopodopo yetọn sọ yin whẹdana sọgbe hẹ walọ yetọn lẹ.+ 14  Podọ okú po Yọdò* po yin dindlan do agbàdo miyọ́n tọn mẹ.+ Ehe nọtena okú awetọ,+ yèdọ agbàdo miyọ́n tọn.+ 15  Humọ, mẹdepope he oyín etọn ma yin kinkan do owe ogbẹ̀ tọn+ lọ mẹ yin dindlan do agbàdo miyọ́n tọn lọ mẹ.+

Nudọnamẹ Odò Tọn

Pọ́n Zẹm. gọna Osọ 6:9, Odò.
To paa mẹ, “hùhù po asiọvi po.”
Kavi “ginglọn; zizedo gànpamẹ.”
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi “Hadẹs,” enẹ wẹ, yọdò paa gbẹtọvi lẹ tọn. Pọ́n Zẹm.