Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 2:1-29

NUHE E BẸHẸN LẸ

  • Wẹndomẹ hlan Efesu (1-7), hlan Smana (8-11), hlan Pagamu (12-17), hlan Tiatila (18-29)

2  “Kanwehlan angẹli+ agun he tin to Efesu+ tọn dọmọ: Nuhe mẹhe hẹn sunwhlẹvu ṣinawe lẹ to adusilọ etọn mẹ bo to zọnlinzin to miyọ́ngbán-tin sika tọn ṣinawe lẹ+ ṣẹnṣẹn lọ dọ die:  ‘N’yọ́n walọ towe lẹ, tuklajẹ towe po akọndonanu towe po, dọ hiẹ ma sọgan kẹalọyi gbẹtọ ylankan lẹ, podọ hiẹ nọ tẹ́n mẹhe ylọ yede dọ apọsteli,+ ṣigba bo ma yinmọ lẹ pọ́n bosọ nọ mọdọ yé yin lalonọ.  Hiẹ sọ to akọndonanu ga, podọ hiẹ ko sinyẹnlin na oyín ṣie+ wutu bọ onú ma ṣikọna we.+  Etomọṣo, n’tindo ehe sọta we, dọ hiẹ ko jo owanyi he a tindo to tintan whenu lọ do.  “‘Enẹwutu, flin fie hiẹ ko jai sọn bo lẹnvọjọ+ bosọ zan walọ he hiẹ ko nọ zan dai lẹ. Eyin a ma wàmọ, n’na wá dè we bo na de miyọ́ngbán-tin+ towe sẹ̀ sọn otẹn etọn mẹ, adavo hiẹ lẹnvọjọ.+  Ṣogan, hiẹ tindo nudagbe de: dọ hiẹ gbẹwanna walọ sinsẹ̀n klandovo Nikola tọn,+ ehe yẹnlọsu gbẹwanna.  Mì gbọ mẹhe tindo otó ni sè nuhe gbigbọ to didọna agun lẹ+ dọmọ: Mẹhe gbawhàn+ wẹ yẹn na na nado dù sọn atin ogbẹ̀ tọn lọ mẹ,+ ehe tin to paladisi Jiwheyẹwhe tọn mẹ.’  “Podọ kanwehlan angẹli agun he tin to Smana tọn dọmọ: Nuhe mẹhe yin ‘Tintan podọ Godo tọn,’+ he kú bo gọwá ogbẹ̀ whladopo dogọ lọ dọ die:+  ‘N’yọ́n nukunbibia po ohẹ́n towe po—ṣigba adọkunnọ+ wẹ hiẹ—podọ n’yọ́n nùzinzan mẹhe ylọ yede dọ Ju bo ma ka yinmọ lẹ tọn, ṣigba sinagọgu Satani tọn de wẹ yé yin.+ 10  A dibuna nuhe hiẹ na jiya etọn to madẹnmẹ lẹ blo.+ Pọ́n! Lẹgba na to delẹ to mì mẹ bẹ do gànpamẹ mapote, na mì nido sọgan yin whiwhlepọn to gigọ́ mẹ, podọ mì na tindo nukunbibia họ̀ azán ao. Do dewe hia di nugbonọ, yèdọ kakajẹ okú, yẹn nasọ na we jẹgbakun ogbẹ̀ tọn.+ 11  Mì gbọ mẹhe tindo otó ni sè+ nuhe gbigbọ to didọna agun lẹ dọmọ: Okú awetọ ma na gando mẹhe gbawhàn+ go to aliho depope mẹ.’+ 12  “Kanwehlan angẹli agun he tin to Pagamu tọn dọmọ: Nuhe mẹhe tindo ohí didá onù awenọ gaa lọ dọ die:+ 13  ‘N’yọ́n fihe hiẹ to ninọ, enẹ wẹ, fihe ofìn Satani tọn tin te; ṣogan a tẹdo oyín ṣie go gligli,+ bọ hiẹ ma mọ́n yise towe to yẹn mẹ+ etlẹ yin to azán Antipa tọn lẹ gbè, yèdọ kunnudetọ nugbonọ ṣie,+ mẹhe yin hùhù+ to nukun mìtọn mẹ, to fihe Satani to ninọ. 14  “‘Etomọṣo, n’tindo onú vude sọta we, dọ hiẹ tindo mẹhe to titẹdo nuplọnmẹ Balaami tọn go lẹ to finẹ,+ yèdọ mẹhe plọn Balaki+ nado ze zannu ahlida tọn donukọnna ovi Islaeli tọn lẹ, nado dù nuhe yin yíyí do sanvọ́ hlan boṣiọ lẹ podọ nado nọ doalọ to fẹnnuwiwa zanhẹmẹ tọn* mẹ.+ 15  Mọdopolọ, hiẹ tindo mẹhe to titẹdo nuplọnmẹ sinsẹ̀n klandovo Nikola tọn go lẹ ga.+ 16  Enẹwutu, lẹnvọjọ. Eyin a ma wàmọ, n’na wá dè we to niyaniya mẹ bo na yí ohí gaa he to onù ṣie mẹ do funawhàn hẹ yé.+ 17  “‘Mì gbọ mẹhe tindo otó ni sè nuhe gbigbọ to didọna agun lẹ+ dọmọ: Mẹhe gbawhàn+ wẹ yẹn na na delẹ to manna whiwhla lẹ mẹ,+ n’nasọ na ẹn zannu wewe pẹvi de, podọ to zannu pẹvi lọ ji wẹ oyín yọyọ de yin kinkan do, ehe mẹde ma yọnẹn adavo mẹhe mọ ẹn yí lọ.’ 18  “Kanwehlan angẹli agun he tin to Tiatila tọn+ dọmọ: Nuhe Visunnu Jiwheyẹwhe tọn, mẹhe nukun etọn lẹ taidi miyọ́n he to jiji de,+ bọ afọ etọn lẹ taidi gànvẹẹ dagbedagbe dọ die:+ 19  ‘N’yọ́n walọ towe lẹ, owanyi, yise, lizọnyizọn po akọndonanu towe po, n’sọ yọnẹn dọ walọ towe agọe tọn lẹ yọ́n hú dai tọn lẹ. 20  “‘Etomọṣo, n’tindo ehe sọta we, dọ hiẹ ko na dotẹnmẹ yọnnu enẹ, yèdọ Jezebẹli,+ he ylọ ede dọ yẹwhegán-yọnnu de, bọ ewọ nọ plọn afanumẹ ṣie lẹ bosọ nọ klọ yé nado nọ doalọ to fẹnnuwiwa zanhẹmẹ tọn*+ mẹ podọ nado nọ dù nuhe yè yí do sanvọ́ hlan boṣiọ lẹ. 21  Yẹn sọ na ẹn dotẹnmẹ nado lẹnvọjọ, ṣigba ewọ ma to jijlo nado lẹnvọjọ sọn fẹnnuwiwa zanhẹmẹ tọn* etọn mẹ. 22  Pọ́n! Yẹn na dlan ẹn do azọ̀nzàn ji to madẹnmẹ, podọ mẹhe to ayọde hẹ ẹ lẹ do nukunbibia daho mẹ, adavo yé lẹnvọjọ sọn walọ he taidi etọn nkọ lẹ mẹ. 23  Podọ ovi etọn lẹ wẹ n’na yí awutu ylankan do hù, sọmọ bọ agun lọ lẹpo na yọnẹn dọ yẹn wẹ mẹhe nọ gbeje linlẹn he whlá lẹ* po ahun lẹ po pọ́n, yẹn nasọ na dopodopo mìtọn sọgbe hẹ walọ mìtọn lẹ.+ 24  “‘Ṣigba, yẹn dọna mì mẹhe pò to Tiatila lẹpo he ma nọ hodo nuplọnmẹ ehe, yèdọ mẹhe ma ko yọ́n nuhe mẹdelẹ nọ ylọdọ “onú sisosiso Satani tọn lẹ”+ dọmọ: N’ma na doagban pinpẹn devo depope do mì ji. 25  Adavo dọ mì ni tẹdo nuhe mì tindo lọ go kaka yẹn nado wá.+ 26  Podọ mẹhe gbawhàn bo tẹdo aliho ṣie lẹ go kakajẹ opodo wẹ yẹn na na aṣẹ do akọta lẹ ji,+ 27  ewọ nasọ yí opò gànyuu tọn+ do plan gbẹtọ lẹ taidi lẹngbọhọtọ de, sọmọ bọ yé na yin gbigbà hányán taidi núzinzan okò tọn lẹ, kẹdẹdile n’ko mọ aṣẹ yí sọn Otọ́ ṣie dè do. 28  Yẹn nasọ na ewọ sunwhlẹvu afọnnu tọn.+ 29  Mì gbọ mẹhe tindo otó ni sè nuhe gbigbọ to didọna agun lẹ.’

Nudọnamẹ Odò Tọn

Glẹki, pọlnẹia. Pọ́n Zẹm.
Glẹki, pọlnẹia. Pọ́n Zẹm.
Glẹki, pọlnẹia. Pọ́n Zẹm.
Kavi “numọtolanmẹ sisosiso lẹ.” To paa mẹ, “ayi lẹ.”