Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

Osọhia 18:1-24

NUHE E BẸHẸN LẸ

  • Aijijẹ “Babilọni Daho lọ” tọn (1-8)

    • “Mì tọ́n sọn e mẹ, omẹ ṣie lẹ emi” (4)

  • Awubla na aijijẹ Babilọni tọn (9-19)

  • Ayajijẹ to olọn mẹ na aijijẹ Babilọni tọn (20)

  • Babilọni na yin zizedlan hùmẹ taidi zannu de (21-24)

18  To ehe godo, n’mọ angẹli devo to tejẹ sọn olọn, bo tindo aṣẹpipa daho bọ gigo etọn hẹn aigba họ́n.  E sọ yí huhlọn do dawhá dọmọ: “E ko họ́! Babilọni Daho lọ ko họ́,+ podọ e ko lẹzun fininọ de na aovi lẹ podọ fide he gbigbọ* mawé lẹpo, ohẹ̀ mawé+ lẹ po dehe yin wangbẹna lẹpo po nọ whlá do!  Na akọta lẹpo ko nù ovẹn ojlo zogbe* fẹnnuwiwa zanhẹmẹ etọn tọn* mú,+ podọ ahọlu aigba ji tọn lẹ ko tindo mahẹ to fẹnnuwiwa zanhẹmẹ tọn* mẹ hẹ ẹ,+ bọ ajọwatọ* aigba ji tọn lẹ ko lẹzun adọkunnọ, na huhlọn gbẹzan fẹẹmẹninọ matin winyan etọn tọn wutu.”  Yẹn sọ sè ogbè devo sọn olọn mẹ dọmọ: “Mì tọ́n sọn e mẹ, omẹ ṣie lẹ emi,+ eyin mì ma jlo nado tindo mimá hẹ ẹ to ylando etọn lẹ mẹ, podọ eyin mì ma jlo nado yí to azọ̀nylankan etọn lẹ mẹ.+  Na ylando etọn lẹ ko hòpli dopọ kakajẹ olọn,+ podọ Jiwheyẹwhe ko flin nuyiwa mawadodo tọn* etọn lẹ.+  Wà na ẹn dile ewọ lọsu ko wà na mẹdevo lẹ do,+ mọwẹ, wà nuhe e ko wà lẹ na ẹn do whla awe ji;+ to kọfo+ he mẹ e kọ̀n ovẹn flusọ́ do, yí ovẹn flusọ́ do gọ́ ẹ na ẹn do whla awe ji.+  Obá he mẹ e pagigona ede bo zan gbẹzan fẹẹmẹninọ matin winyan tọn jẹ, na ẹn yasanamẹ po aluẹmẹninọ po jẹ obá enẹ mẹ. Na e nọ to didọ to ahun etọn mẹ dọmọ: ‘Yẹn sinai taidi ahọsi de, yẹn masọ yin asuṣiọsi, podọ yẹn ma na nọ aluẹmẹ pọ́n gbede.’+  Enẹwutu wẹ azọ̀nylankan etọn lẹ na wá to azán dopo gblamẹ, yèdọ okú, aluẹmẹninọ po huvẹ po, yè nasọ yí miyọ́n do fiọ ẹ gbidigbidi,+ na huhlọnnọ wẹ Jehovah* Jiwheyẹwhe, mẹhe dawhẹ etọn.+  “Podọ ahọlu aigba ji tọn lẹ he tindo mahẹ to kọndopọ fẹnnuwiwa zanhẹmẹ tọn* mẹ hẹ ẹ bo zan gbẹzan fẹẹmẹninọ matin winyan tọn hẹ ẹ lẹ na viavi bo na do awubla hia do e ji, to whenue yé mọ azọ̀ fifiọ etọn tọn hlan. 10  Na obu oyà he to yinyin sisá na ẹn tọn wutu, yé na ṣite to olá bo to didọ dọmọ: ‘Ṣo, ṣo, hiẹ otò daho lọ,+ yèdọ Babilọni hiẹ tòdaho huhlọnnọ lọ, na to gànhiho dopo mẹ wẹ whẹdida towe wá!’ 11  “Humọ, ajọwatọ aigba ji tọn lẹ to avivi bo to aluẹmẹ do ewọ ji, na mẹdepope masọ tin nado họ̀ ajọnu yetọn lẹpo ba wutu, 12  yèdọ ajọnu sika tọn, fataka tọn, zannu he họakuẹ tọn, peali lẹ tọn, alavọ dagbedagbe tọn, sopẹ́-vọ̀ tọn, avọ̀ sẹ́da tọn po avọ̀ vẹẹ ṣẹ́ṣẹ́ tọn lẹpo po; podọ nulẹpo he yè yí owhlẹ owán gblingblinnọ lẹ do basi; gọna núzinzan wunmẹ lẹpo he yè yí ajinnakú-dú, owhlẹ he họakuẹ, gànvẹẹ, gànyuu po mabli po do basi; 13  mọdopolọ kinamọni, nuwhẹ́nwan gblingblin, nuyọnwan, amisisa owán gblingblinnọ, nuyọnwan gblingblin, ovẹn, amì olivie tọn, linfin dagbedagbe, likun, oyìn, lẹngbọ, osọ́ lẹ, agbàn-kẹkẹ lẹ, afanumẹ lẹ po ogbẹ̀ gbẹtọvi tọn* lẹ po. 14  Mọwẹ, yèdọ atin sinsẹ́n dagbedagbe he hiẹ* nọ jlo ko yì sọn dè we, podọ onú dojó lẹ po onú whanpẹnọ lẹpo po ko busẹ sọn aimẹ bo ma na yin mimọ gbede ba. 15  “Ajọwatọ he nọ sà onú ehelẹ, he ko lẹzun adọkunnọ sọn ewọ dè lẹ na ṣite to olá, na obu oyà he to yinyin sisá na ẹn tọn wutu bo na viavi bosọ biọ aluẹmẹ, 16  bo na to didọ dọmọ: ‘Ṣo, ṣo, otò daho lọ, he do alavọ dagbedagbe, sopẹ́-vọ̀ po avọ̀ vẹẹ ṣẹ́ṣẹ́ po, bo yí aṣọ́donu sika tọn lẹ, zannu he họakuẹ lẹ po peali lẹ po do doaṣọ́,+ 17  na to gànhiho dopo mẹ wẹ adọkunnu daho mọnkọ lẹ ko yin vivasudo!’ “Podọ húnkùntọ-gán lẹpo, mẹhe nọ zingbejizọnlin gbọn ohù ji lẹpo, azọ́nwatọ ohún mẹ tọn lẹ podọ mẹhe nọ mọ dùdù gbọn ohù dali lẹpo, ṣite to olá 18  bo to awhádo dile yé pọ́n azọ̀ fifiọ etọn tọn hlan bo dọmọ: ‘Tòdaho tẹwẹ taidi otò daho ehe?’ 19  Yé sọ kọ̀n kọ́gudu do ota bo dawhá bosọ viavi bo biọ aluẹmẹ, bosọ dọmọ: ‘Ṣo, ṣo, otò daho lọ, ehe mẹ mẹhe tindo tọjihun to ohù ji lẹpo ko lẹzun adọkunnọ gbọn adọkunnu etọn lẹ dali, na to gànhiho dopo mẹ wẹ e ko yin vivasudo!’+ 20  “Jaya do e ji, hiẹ olọn E,+ podọ mì omẹ wiwe lẹ,+ apọsteli lẹ po yẹwhegán lẹ po, na Jiwheyẹwhe ko lá whẹdida do ewọ ji do ota mìtọn mẹ!”+ 21  Podọ angẹli huhlọnnọ de ze zannu he taidi gilisé daho de daga bo dlan ẹn do hùmẹ, bosọ dọmọ: “Mọ wẹ yè na dlan Babilọni, yèdọ otò daho lọ do odò po awuyiya po do, ewọ ma nasọ yin mimọ pọ́n gbede ba.+ 22  Podọ ogbè hànjitọ he to ajalẹn yetọn lẹ yizan tọn, hànsinọ lẹ tọn, ován-kúntọ lẹ tọn po opẹ̀n-kúntọ lẹ tọn po ma nasọ yin sisè to hiẹ mẹ gbede ba. Anazọ́nwatọ he nọ wà azọ́n depope ma nasọ vọ́ yin mimọ to hiẹ mẹ gbede ba, podọ nudidọ gilisé tọn depope ma nasọ vọ́ yin sisè to hiẹ mẹ gbede ba. 23  Hinhọ́n miyọ́ngbán tọn depope ma nasọ vọ́ họ́n to hiẹ mẹ gbede ba, podọ ogbè asisunọ yọyọ po asiyọyọ tọn depope po ma nasọ vọ́ yin sisè to hiẹ mẹ gbede ba; na ajọwatọ towe lẹ wẹ omẹ gboogbo aigba ji tọn lẹ bọ akọta lẹpo wẹ yin kiklọ gbọn afinyọnnuwiwa+ towe dali. 24  Mọwẹ, ewọ mẹ wẹ yè mọ ohùn yẹwhegán lẹ tọn, omẹ wiwe lẹ+ tọn podọ mẹhe yin hùhù to aigba ji lẹpo tọn te.”+

Nudọnamẹ Odò Tọn

Kavi vlavo, “gbọfufu; ohó gbọdo.”
Kavi “ovẹn homẹgble.”
Glẹki, pọlnẹia. Pọ́n Zẹm.
Glẹki, pọlnẹia. Pọ́n Zẹm.
Kavi “ajọwatọ tomẹyitọ.”
Kavi “flin sẹ́nhẹngba.”
Pọ́n Nud. A5.
Glẹki, pọlnẹia. Pọ́n Zẹm.
Kavi “alindọn.”
Kavi “alindọn towe.”